Հունվարի 12-ին Գյումրիում տեղի ունեցած սպանդից փրկված, սակայն մեկ շաբաթ անց մահացած` 6 ամսական Սերյոժա Ավետիսյանի հուղարկավորությանը ներկա էին նաև Դաշնակցության ներկայացուցիչներ:
«Սա համազգային սուգ է, քանի որ խոսքը հայոց սրբագույն արժեքներից մեկի` ընտանիքի ոչնչացման մասին է: Ցանկացած հայ, աշխարհի որ ծայրում էլ լինի, չի կարող սա նորմալ ընդունել և չսգալ»,- yerkir.am-ի հետ զրույցում ասաց ԱԺ ՀՅԴ խմբակցության պատգամավոր Արծվիկ Մինասյանը:
Ըստ նրա` այժմ մեր առջև մի քանի հիմնական խնդիրներ են դրված` լինել միասնական, հետևել գործի ամբողջական, խորքային բացահայտմանը, արդար դատավճռի հասնել և այսուհետ բացառել նման երևույթները:
Անդրադառնալով գործի իրավական խնդրին` պատգամավորը նշեց, որ հաճախ իրավական գործընթացները մենք շփոթում ենք ազգային պահանջների հետ, սակայն սա այդ դեպքը չէ: «Մենք պետք է իմանանք, որ այս ստահակն առաջին հերթին պետք է դատվի Հայաստանի օրենսդրությամբ` թե’ միջազգային իրավունքի, թե’ երկկողմանի իրավահարաբերությունների տիրույթում, որևէ մեկը չի կարող Հայաստանի իրավապահ մարմնից այդ իրավունքը վերցնել»,- ասաց նա և ընդգծեց, որ այսօր կարևորը հանցագործության լիարժեք բացահայտումն է:
Մինասյանի խոսքով` դատավճիռը պետք է կայացվի Հայաստանի Հանրապետության անունից: «Շատ կարևոր է, որ այս փուլում հայ-ռուսական իրավապահ մարմինները գործեն փոխըմբռնման սկզբունքի հիման վրա»,- ասաց նա և հավելեց, որ եթե անկեղծություն կա ռուսների կողմից, նշանակում է նրանք ամեն ինչ պետք է անեն, որպեսզի հայ իրավապահների որևէ իրավական գործողություն չսահմանափակվի: «Դա կլինի նրանց կողմից արված հայտարարությունների սկզբունքին համաձայն»,- ընդգծեց պատգամավորը:
