Ես շատ բարձր եմ գնահատում հայկական արտադրանքի հեռանկարները ԵՏՄ շուկաներում, եւ հատկապես Ռուսաստանում, որտեղ սպառողները շատ լավ են վերաբերում Հայաստանից եկած ապրանքներին, գնահատում են դրանց որակը:
Այս մասին Մոսկվայում ընթացող «Продэкспо-2015»-ի ժամանակ հայ գործարարների հետ կայացած հանդիպման ժամանակ հայտարարել է Եվրասիական տնտեսական հանձնաժողովի կոլեգիայի անդամ Արա Նռանյանը:
Արա Նռանյանը պատմել է հնարավորությունների մասին, որոնք ընձեռվել են հայ գործարարներին՝ ԵՏՄ-ին Հայաստանին անդամակցելուց հետո, ինչպես նաեւ ապրանքների մաքսային գրանցման նորարարությունների, արտադրանքի սերտիֆիկացման նորմերի, ալկոհոլի համար գործող ակցիզային քաղաքականության եւ այլնի մասին:
«Եթե նախկինում ներկրումների ծավալների ընդլայմանը խանգարում էին տարբեր արգելքները, ապա ԵՏՄ-ին միանալուց հետո դրանք հասցված են նվազագույնի: Ցանկանում եմ նշել, որ մոտ ժամանակներս առաջին անգամ կսկսվի հայկական արտադրության մսամթերքի ներկրումը ռուսական շուկա: Արդեն կան համապատասխան պայմանավորվածությունները: Բելառուսի հետ Հայաստանը նույնպես արդեն որոշակի առեւտրային կապեր է հաստատել: Ղազախստանի հետ դրանք թույլ են, սակայն վստահ եմ, որ այժմ կապերը կամրանան Միության բոլոր երկրների հետ»,- նշել է ԵՏՀ նախարարը:
Ըստ Նռանյանի, Հայաստանի եւ ԵՏՄ այլ երկրների միջեւ վերացվել են տարբեր ձեւականություններ, որոնք կապված էին ապրանքների, ծառայությունների, կապիտալի եւ աշխատուժի ազատ տեղաշարժի հետ: Դեռ բոլորը չեն հասկանում դա, որովհետեւ թե բնակչության, թե պետական մարմինների մոտ ընթանում է հարմարվելու գործընթացը:
news.am