Կիրո Մանոյանը` հայ-թուրքական արձանագրությունները ԱԺ-ից հետ կանչելու մասին

Սա առաջին քայլն է արձանագրությունները վերջնականապես վնասազերծելու ուղղությամբ:

Այս մասին yerkir.am-ի հետ զրույցում ասաց ՀՅԴ Բյուրոյի անդամ, ՀՅԴ Բյուրոյի Հայ դատի եւ քաղաքական հարցերի գրասենյակի պատասխանատու Կիրո Մանոյանը` անդրադառնալով Հայաստան-Թուրքիա արձանագրությունները ՀՀ ԱԺ-ից հետ կանչելու վերաբերյալ ՀՀ նախագահ Սերժ Սարգսյանի որոշմանը:

«Սա ողջունելի քայլ է, բայց բավարար չէ: Անհրաժեշտ է ամբողջությամբ վնասազերծել և ստորագրությունները հետ կանչել»,- ասաց նա և հավելեց, որ արձանագրությունները հետ կանչելու հավանականությունը միշտ էլ եղել է:

Մանոյանի խոսքով` այս մասին ՀՀ նախագահն արդեն խոսել էր դեռևս նախորդ տարվա սեպտեմբերին` Հայաստան-Սփյուռք համահայկական 5-րդ համաժողովի և և ՄԱԿ-ի Գլխավոր ասամբլեայի իր ելույթներում:

«Թուրքիայի ղեկավարությունն այսօրվա ճշմարտությունները գլխիվայր է ներկայացնում, իբր իրենք բարեկամության ձեռք են մեկնել Հայաստանին, և Հայաստանն իբր օդում է թողել իրենց մեկնած ձեռքը»,- ասաց նա և հույս հայտնեց, որ մինչև ապրիլի 24-ը հայ-թուրքական արձանագրություները վերջանականապես հետ կկանչվեն: Նշենք, որ Հայ Յեղափոխական Դաշնակցությունը բազմիցս պահանջել է, որ Հայաստանն իր ստորագրությունը հետ կանչի այդ արձանագրություններից:

yerkir.am

Դաշնակցությունը «ողջունելի, բայց ոչ բավարար է» համարում ցյուրիխյան արձանագրությունները ԱԺ-ից հետ կանչելը

ՀՅԴ Բյուրոյի Հայ Դատի և քաղաքական հարցերի գրասենյակ պատասխանատու Կիրո Մանոյանը նախագահ Սերժ Սարգսյանի կողմից Ազգային ժողովից Հայաստան – Թուրքիա արձանագրությունները հետ կանչելը «ողջունելի է, բայց ոչ բավարար» քայլ է համարում:

«Սա ընդամենը Ազգային ժողովի օրակարգից հանում է արձանագրությունները, բայց մենք կարծում ենք, որ անհրաժեշտ է արձանագրությունների տակից Հայաստանի ստորագրությունը հետ կանչել, որպեսզի իսկապես իրավականորեն այդ արձանագրությունները այլևս գոյություն չունենան», – «Ազատության» հետ զրույցում ասաց Մանոյանը և շարունակեց․ – «Օրակարգից հանելը, ճիշտ է, ինչ-որ տեսակետի, կեցվածքի դրսևորում է, բայց բավարար չէ, որովհետև տակավին իրավականորեն դրանք «կենդանի են» և շարունակում են մնալ որպես լծակ Թուրքիայի ձեռքում»:

«Արդեն մոտ վեց տարի է անցել Հայաստան-Թուրքիա արձանագրությունների ստորագրումից: Այս ամբողջ ընթացքում Հայաստանը մշտապես հետևողական դիրքորոշում է ցուցաբերել արձանագրությունները կյանքի կոչելու հարցում: Սակայն պետք է փաստել Թուրքիայի իշխանությունների քաղաքական կամքի բացակայությունը, արձանագրությունների տառի ու ոգու աղավաղումները և նախապայմանների շարունակաբար արծարծումը: Դրան զուգահեռ, Հայոց ցեղասպանության 100-ամյա տարելիցի նախաշեմին, նոր թափ է ստանում ժխտողականության և պատմության խմբագրման քաղաքականությունը», – արձանագրությունների հետ կանչելու վերաբերյալ ԱԺ նախագահ Գալուստ Սահակյանին ուղղված նամակում գրել է նախագահ Սերժ Սարգսյանը:

Դիտարկմանը, թե գուցե ներքաղաքական իրավիճակը կամ Ցեղասպանության 100-ամյա տարելիցն է պատճառը, որ նախագահը որոշեց դիմել այս քայլին, Կիրո Մանոյանն արձագանքեց, թե իր համար այս որոշումհ անսպասելի չէր, քանի որ դեռ սեպտեմբերին երկրի նախագահն այս մասին խոսել էր Հայաստան – Սփյուռք համաժողովում, նաև ՄԱԿ-ի Գլխավոր ասամբլեայում ունեցած ելությում:

Հարցին, թե գուցե ՀՅԴ-ՀՀԿ կուսակցությունների՝ վերջին շրջանում բարելավված հարաբերություններն են խթանել այս որոշման կայացումը, Մանոյանը պատասխանեց․ – «Մենք արձանագրությունների տակից Հայաստանի ստորագրության հետ կանչելու խնդիրը դրել ենք ոչ միայն Հանրապետականի հետ մեր քննարկումների ժամանակ, այլ բոլոր կուսակցությունների հետ: Բոլորը չէ, որ համաձայն են եղել, բայց կան նաև այլ կուսակցություններ, որոնք ևս համաձայն են: Կարող է նախագահը մտածել է, որ սա հասարակության մոտ բավական դրական արձագանք ունենալիք մեկ քայլ է, դրա համար էլ որոշել է անել այդ քայլը հիմա»:

Կիրո Մանոյանը համոզմամբ՝ Հայաստանի ստորագրությունը օր առաջ պետք է հետ կանչվի, և այդ դեքպում նախագահի այսօրվա քայլը կլինի ոչ միայն ողջունելի, այլև բավարար․ – «Ապրիլի 24-ը պարզ է, որ խորհրդանշական է: Ցանկալի է, որ ստորագրությունը մինչ այդ հետ կանչվի: Մենք ուղղակիորեն չենք ասում՝ անպայման ապրիլի 24-ին այն իմաստով, որ արդեն պետք է երեկ, երեք ամիս առաջ, մեկ տարի առաջ արվեր: Դրա համար էլ ինչքան շուտ արվի, այնքան լավ»:

azatutyun.am

Նախագահի որոշումը ճիշտ քայլ է ճիշտ ուղղությամբ, բայց ոչ բավարար

«Նախագահի որոշումն արձանագրություններն ամբողջությամբ վնասազերծելու ուղղությամբ ճիշտ քայլ է, ողջունելի է, բայց ոչ բավարար, որովհետև, տակավին, այդ արձանագրություններն իրավականորեն կենդանի են, Հայաստանի շահերի տեսանկյունից իրենց մեջ պարունակում են վտանգներ: Այսինքն ճիշտ քայլ է ճիշտ ուղղությամբ, բայց անհրաժեշտ է արձանագրությունների տակից հետ վերցնել ստորագրությունները»,- Panorama.am-ի հետ զրույցում ասաց ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը:

Հիշեցնենք, որ նախագահ Սերժ Սարգսյանն այսօր նամակով դիմել է ՀՀ ԱԺ նախագահ Գալուստ Սահակյանին՝ տեղեկացնելով Հայաստան-Թուրքիա արձանագրությունները ՀՀ ԱԺ-ից հետ կանչելու վերաբերյալ իր որոշման մասին:

Նա նշեց, որ ՀՅԴ-ն հենց սկզբից, երբ արդեն պարզ էր, որ Թուրքիան առանց նախապայմանների Հայաստանի հետ հարաբերությունները հաստատելու պատրաստ չէ, պահանջում էր հետ վերցնել ստորագրություններն՝ այդ քայլով ամբողջությամբ վնասազերծելով այդ արձանագրությունները:

Ինչ վերաբերում է միջազգային հանրության արձագանքին, ըստ Կ. Մանոյանի, գրեթե բոլորի համար էլ արդեն պարզ էր, որ Թուրքիան ի սկզբանե պատրաստ չէր Հայաստանի հետ առանց նախապայմանների հարաբերություններ հաստատել:

«Արևմուտքը սկսել է բաներ ասել, որոնք հակասում են այն ժամանակ իր ասածներին: Արձանագրությունները ստորագրելուց անմիջապես հետո ասում էին, որ ակնկալում են ողջամիտ ժամկետներում արձանագրություններն առանց նախապայմանների կվավերցվեն: Այսօր արդեն և ԱՄՆ-ը, և Եվրամիությունը, սկսել են այլ բան ասել. պարզ է, մինչև ղարաբաղյան հիմնախնդիրը չկարգավորվի, հայ-թուրքական հարաբերությունները չեն կարգավորվի: Արևմուտքը, կարծում եմ, հասկանում է, որ այս պայմաններում անիմաստ է արձանագրություններն այս տեսքով պահել, ղարաբաղյան հակամարտության հիմնախնդրի կարգավորումից հետո նոր կբանակցեն»,- ասաց Կ. Մանոյանը:

Միաժամանակ նա ընդգծեց. «Ինչ էլ ասի Արևմուտքը, մեղքի բաժին ունի, քանի որ չի կարողացել Թուրքիային պարտադրել առանց նախապայմանների Հայաստանի հետ հարաբերություններ սկսել և շրջափակումը հանել»:

panorama.am