ՀՀ էկոնոմիկայի նախարար Արծվիկ Մինասյանն այսօր Ազգային ժողով զեկուցման էր եկել հայկական առաջին բջջային հեռախոսով։
Այն ամբիոնից ցուցադրելով՝ նա ասաց. «Կարծում եմ, որ մեզնից պետք է նաև սկսենք հայկական ապրանքանիշով առաջին ապրանքների իրացումը»:
Նա ներկայացրեց «Ավելացրած արժեքի հարկի» մասին ՀՀ օրենքում լրացում կատարելու մասին օրենքի նախագիծն առաջին ընթերցմամբ ընդունելու մասին հարցը:
«Այս օրինագծի ստեղծման անհրաժեշտությունը պայմանավորված է նրանով, որ մի շարք տնտեսության ոլորտներում միջազգային դոնոր կազմակերպությունները նախատեսում են աջակցություն ցուցաբերել դրամաշնորհների տեսքով։ Մեր գործող օրենսդրության համաձայն՝ այդ դրամաշնորհներով մատուցվող ծառայությունները և ձեռքբերվող ապրանքները հարկվում են ավելացված արժեքի հարկով, ինչը խոչընդոտ է հանդիսանում համ ծրագրի արդյունավետության ապահովման, համ դոնոր կազմակերպությունների կողմից համապատասխան աջակցությունը իրականացնելու հարցում, որովհետև լրացուցիչ քսան տոկոս ավելի բեռնվածություն պետք է ունենա»,-ասաց նա:
Այսպիսով` նախարարն ասաց, որ առաջարկում են, որ սուբսիդիաների, սուբվենցիաների, դրամաշնորհային ծրագրերի շրջանակներում իրականացվող գործարքները, գործառությունները ազատվեն ավելացված արժեքի հարկից, եթե նշված ծրագրերը արժանանան ՀՀ կառավարության կողմից ձևավորված մասնագիտական հանձնաժողովի դրական եզրակացության:
Արծվիկ Մինասյանը հայտնեց, որ ընդունում են նաև այն առաջարկը, ըստ որի՝ մասնագիտական հանձնաժողովում ներգրավված կլինեն հանրային սեկտորի և ԱԺ ներկայացուցիչները:
«Մենք ընդունում ենք այդ առաջարկը, ավելին` շնորհակալ ենք դրա համար»,-հավելեց նա:
