Հայ օգնության միությունը շարունակում է սատարել հայ զինվորներին, հատկապես՝ դիրքապահներին: Օգոստոսի 20-ին հօմուհիները կրկին Արցախում էին:
Հայ օգնության միությունը հավատարիմ է իր կարգախոսին` ժողովրդիս հետ, ժողովրդիս համար։
ՀՕՄ-ն այսօր միավորում է երկու տասնյակից ավելի պետությունների շուրջ 15.000 նվիրյալ հայուհիների՝ աշխարհում հանդես գալով որպես կայացած, իր առաքելության կարեւորությունը գիտակցող խոշորագույն բարեսիրական կառույցներից մեկը: Հօմուհիները հերթական նախաձեռնությամբ օգոստոսի 20-ին ուղեւորվեցին Արցախ:
Մինչ առաջապահ զորամասեր հասնելը, առաջին կանգառը Քարվաճառում էր, որտեղ հօմուհիները ծաղիկներ խոնհարեցին Արցախի հերոս, Շուշիի առանձնակի գումարատակի փոխհրամանատար Պետրոս Ղեւոնդյանի հուշաքարին:
Հաջորդիվ արդեն պաշտպանական շրջանի զորամասն էր, որտեղ նրանք հանդիպեցին զորամասի հրամանատարին՝ տեղում քննարկեցին առկա անելիքներն ու առաջիկա խնդիրները: Հանդիպման ավարտից հետո մասնակիցները զինվորների եւ հրամանատարական կազմի հետ միասին խոնարհվեցին Շահեն Մեղրյանի կիսանդրու առջեւ՝ նման կերպ վառ պահելով արցախյան ազատամարտը կերտողներից մեկի հիշատակը:
ՀՕՄ -ի Հայաստանի Շրջանային վարչության ատենապետուհի Դիանա Հովսեփյանի խոսքով, մեր ազգային պայքարում պարտադիր չէ, որ բոլորի ձեռքին զենք լինի, բայց կարեւոր է, որ բոլորս լինենք զենք բռնողների կողքին, քանզի դա էլ է պայքար: Զինվորի թիկունքն ապահովելը եւս պատվաբեր առաքելություն է:
«Արցախի հայ օգնության միությունն իր հերթին ունի հատուկ ծրագիր, այն է՝ «Այցելություն դիրքապահին», այս նախաձեռնությունն իրականացվում է 2012 թվականից»,- ասաց նա:
«Այցի 2-րդ օրը հօմուհիները եղան եւս մեկ սահմանային զորամասում, որտեղ իրենց սկզբունքներին համապատասխան ծանոթացան տեղի առօրիային եւ առկա խնդիրներին»,- ասում է Կարինե Դադայանը՝ ՀՕՄ-ի միավորի ատենապետուհին:
Արցախյան ուղեւորությունը եզրափակվեց Դադիվանքում՝ մոմավառությամբ:
