Սեպտեմբերի 10-ին ՀՀ էկոնոմիկայի նախարարի պաշտոնակատար Արծվիկ Մինասյանն ընդունել է Ֆրանսիայի ԱԺ Սոցիալիստական խմբակցության ղեկավար Բրյունո Լը Ռուի գլխավորած պատվիրակությանը:

Ողջունելով հյուրերին Հայաստան այցի կապակցությամբ` նախարարը մանրամասնորեն ներկայացրել է հայ-ֆրանսիական առևտրատնտեսական հարաբերությունները, անդրադարձել երկու երկրների միջև ներմուծման և արտահանման ծավալներին, ընդգծել, որ դրանք բարձր մակարդակի հասցնելու համար ներուժն առկա է:

Արծվիկ Մինասյանը կարևորել է նաև երկու երկրների գործարարների հանդիպումներն ու քննարկումներն աշխուժացումը:

Հանդիպման ընթացքում անդրադարձ է եղել Հայաստանի ներդրումային գրավչությանը, դեպի ԵԱՏՄ և իրանական շուկա մեր երկիրը որպես հարթակ օգտագործելու հնարավորություններին, զբոսաշրջության զարգացման միտումներին:

Նախարարի պաշտոնակատարը նաև ներկայացրել է ՀՀ-ում Ֆրանսիայի արտակարգ և լիազոր դեսպանի հետ հանդիպումների ընթացքը, նշել այն առաջարկների մասին, որոնք զարկ կտան հայ-ֆրանսիական տնտեսական հարաբերություններին, մասնավորապես, անդրադարձել դեսպանատանը տնտեսական անկախ խորհրդատուի պաշտոնի ստեղծման նպատակահարմարությանը, ինչը մեծապես կնպաստեր խնդիրների արագ և նպատակային լուծմանը:

Շնորհակալություն հայտնելով Արծվիկ Մինասյանին` երկու բարեկամ երկրների տնտեսական հարաբերությունների վիճակի մանրամասն ներկայացման համար, Բրյունո Լը Ռուն համաձայնել է, որ Հայաստան-ֆրանսիա տնտեսական հարաբերությունները զարգացման մեծ ներուժ ունեն:

Անդրադառնալով տնտեսական խորհրդատուի պաշտոնին` ֆրանսիացի պատգամավորը նույնպես նշել է դրա կարևորությունը և հավաստիացրել, որ դեսպանի հետ հանդիպմանն անշուշտ հարցը կբարձրացնի:

Գոհունակություն հայտնելով հանդիպման և անկեղծ զրույցի համար կողմերը ևս մեկ անգամ հայտնել են համագործակցության խորացման պատրաստակամությունը ու հայ-ֆրանսիական տնտեսական հարաբերությունների զարգացմանը միտված հանձնառությունը:

Պատվիրակությանը մաս էին կազմում Շարլ Փափազյան՝ ՀՅԴ Արեւմտյան Եվրոպայի Կենտրոնական կոմիտեի ներկայացուցիչ, եւ Հարութ Մարտիրոսյան՝ Հայ Դատի Ֆրանսիայի հանձնախմբի նախագահ։

Հանդիպմանը մասնակցեց նաեւ ՀՅԴ Բյուրոյի անդամ Կիրո Մանոյանը։

mineconomy.am