Դավիթ Լոքյանը՝ Էդմոն Մարուքյանին
Այսօր` կառավարության հետ հարցուպատասխանի ժամանակ, ԱԺ պատգամավոր Էդմոն Մարուքյանը հարց ուղղեց տարածքային կառավարման նախարարի պաշտոնակատար Դավիթ Լոքյանին: Կառավարությունը սեպտեմբերին որոշում էր կայացրել Վանաձորին 160 միլիոն դրամ գումար հատկացնելու մասին` մարզպետարանի միջոցով՝ Վանաձորի ֆինանսական վիճակի բարելավման համար:
Պատգամավորի խոսքով՝ Վանաձորում նախընտրական շրջան է, և հանրապետական թեկնածուները դա ներկայացնում են որպես իրենց ձեռքբերում, և որ այդ գումարից չորս ամսվա աշխատավարձեր են տալու:
«Ինչի՞ համար է տրամադրվել այդ գումարը, անտեղի է այս շահարկումը որպես նախընտրական ձեռքբերում ներկայացնելը»,- նշեց Մարուքյանը:
Դավիթ Լոքյանը պատասխանեց, որ պրոցեսն ավելորդ թատերականացվում է, և դա թեկնածուների կողմից ձեռքբերում ներկայացնելը անթույլատրելի է: «Օբյեկտիվ ու սուբյեկտիվ պատճառներով ձևավորվել է բյուջետային որոշակի դեֆիցիտ: 45 միլիոն դրամ` աղբահանության վճարների գանձում չի իրականացվել քաղաքապետարանի կողմից, 12 միլիոն դրամ էլ մանկապարտեզների վարձավճարներ չեն գանձվել: Քաղաքապետարանի գործունեության մեջ պետք է ուղղումներ մտցվեն: Բյուջեից որոշակի մաս օգտագործվել է ճանապարհների բարեկարգման վրա: Այս տարի 65 միլիոն դրամի լրացուցիչ օժանդակություն ենք հատկացրել Վանաձորին` նախորդ տարվա 126 միլիոնի փոխարեն: Իսկ քաղաքական շահարկումները և ընտրական պրոցեսները խորհրդարան բերելը ճիշտ չեն»,- ասաց նա:
Էդմոն Մարուքյանը բարձրաձայնեց Վանաձորի քիմպրոմի թալանի մասին, որ խողովակները մարդկանց չեն հասնում, մինչդեռ` աճուրդով այդ խողովակները գնել են:
Դավիթ Լոքյանը պատասխանեց. «Կարծում եմ` Վանաձորի ընտրությունների լոբբինգը տեղափոխել ենք այս դահլիճ: Այդ հարցի պարզաբանումը կարող էիք վաղօրոք ունենալ: Սուբյեկտիվ ու օբյեկտիվ պատճառներից ելնելով` մենք չէինք կարող համայնքի` շուրջ 1300 աշխատակիցների չօժանդակել աշխատավարձերի հարցում»:
yerkir.am
