9 Յուլիսին, Ժընեւում հրապարակուած յատուկ հաղորդագրութեամբ, ծանուցուեց Թուրք-Հայկական Հաշտութեան Յանձնաժողով ՚անուան տակ գործող խմբի ստեղծման մասին, որի նպատակն է իբր խթանել թուրքերի եւ հայերի միջեւ փոխըմբռնման ու բարի կամքի զարգացումը, նաեւ խրախուսել Հայաստանի ու Թուրքիայի միջեւ յարաբերութիւնների բարելաւումը՚:
Հիմնուելով մինչ այժմ հրապարակուած պաշտօնական տեղեկութիւնների, ինչպէս նաեւ՝ խմբի անդամների հրապարակային ելոյթներում հնչած տեսակէտների վրայ, Հ.Յ.Դ. Բիւրոն յայտարարում է.
Դէմ չլինելով երկու հարեւան ժողովրդների եւ պետութիւնների միջեւ ազատ երկխօսութեանբ հարցերը լուծելու սկզբունքին, այդուամենայնիւ, մերժում ենք արտաքին ուժերի կողմից դրդուած, հանգամանքից զուրկ մարդկանց կողմից հետապնդուող եւ հայկական շահերից չմեկնող նման գործունէութիւնը:
Ոչ ոքու արտօնուած չէ, երկու ժողովրդների միջեւ ՙհաշտութեան՚ շղարշի տակ, փորձել նսեմացնել Հայաստան-Թուրքիա յարաբերութիւնների հարցի տարողութիւնը եւ շրջանցելով Հայկական Ցեղասպանութեան Թուրքիայի կողմից ճանաչման հարցը, վտանգել նաեւ նրա միջազգային ճանաչման թափը եւ հայկական պահանջատիրութիւնը:
Հաշտութիւն չի կարող իրականանալ առանց պատմական ճշմարտութիւնը ընդունելու: Հայ-թուրքական որեւէ երկխօսութիւն կարող է արդիւնաւորուել միա՛յն Թուրքիայի կողմից Հայկական Ցեղասպանութեան փաստը ընդունելուց յետոյ, որը սակարկութեան առարկայ չէ:
Հայաստան-Թուրքիա կամ հայ-թուրքական որեւէ երկխօսութիւն նաեւ ձախողութեան է դատապարտուած այնքան ժամանակ, երբ Թուրքիան շարունակում է Արցախի հարցի կապակցութեամբ իր կողմնակալ դիրքորոշումը եւ չի վերացրել Հայաստանի Հանրապետութեան շուրջ իր շրջափակումը: Արցախի հարցի խաղաղ կարգաւորման բանակցութիւնների ներկայ հանգրուանում, Հայաստան-Թուրքիա յարաբերութիւնները առ երեւոյթ բարելաւելու այս նախաձեռնութիւնը նպատակ ունի՝ Թուրքիային մասնակից դարձնել բանակցային գործընթացին եւ ճամբայ հարթել նրա դէպի Արեւելք քաղաքական ազդեցութեան ծաւալմանըՙ
հաշտութեան անուան տակ, ըստ էութեան, վտանգաւոր այս նախաձեռնութիւնը նպաստում է միայն Թուրքիայի եւ իր բարեկամների դիրքերի ամրապնդմանը, ընդդէմ Հայ Դատի եւ ի հաշիւ Հայաստանի ազգային անվտանգութեան:
Հ. Յ. Դաշնակցութիւնը բացարձակապէս մերժում է արկածախնդրական այս գործունէութիւնը եւ ՀՀ պատկան իշխանութիւններից պահանջում է` յստակեցնել իր դիրքորոշումը այս եւ նմանօրինակ նախաձեռնութիւնների նկատմամբ, որոնք բացառապէս կոչուած են ապակողմնորոշել Հայաստանի Հանրապետութեան քաղաքականութիւնը տարածաշրջանում:
Հ.Յ.Դ. ԲԻՒՐՕ
13 Յուլիս, 2001
Ք©Երեւան
