ՀՅԴ Լիբանանի Կեդրոնական կոմիտէն ներկայացնող պատուիրակութիւն մը այցելեց հանրապետութեան նախագահ զօր. Միշել Աունի: Պատուիրակութեան մաս կը կազմէին Կեդրոնական կոմիտէի ներկայացուցիչ, երեսփոխան Յակոբ Բագրատունի, փոխներկայացուցիչ Աւետիս Կիտանեան եւ Րաֆֆի Աշքարեան:
Երեսուն վայրկեան տեւած հանդիպումին առանցքը կազմեցին նախագահական նոր նստաշրջանի ընթացքին առնուելիք անհրաժեշտ քայլերը` երկրի միասնականութեան եւ զարգացման առնչութեամբ:
Քննարկուեցան կառավարութեան կազմութեան հոլովոյթը եւ այդ իմաստով երեւցող ու թաքուն դժուարութիւնները, ինչպէս նաեւ ընտրական նոր օրէնքով մը երեսփոխանական ընտրութիւններ կատարելու հրամայականը:
Պատուիրակութիւնը կարեւորութեամբ շեշտեց կառավարութեան արագ կազմութեան անհրաժեշտութիւնն ու հայ համայնքի քանակական եւ որակական մասնակցութեան պահանջը:
Քննարկումի նիւթ դարձաւ նաեւ Թուրքիոյ արտաքին գործոց նախարարի Պէյրութ այցելութիւնը:
aztagdaily.com
