ՀՅԴ-ի նախընտրական ցուցակը դեռ վերջնական պատրաստ չէ: Tert.am-ի հետ զրույցում ասաց ՀՅԴ խմբակցության քարտուղար Աղվան Վարդանյանը՝ նշելով, որ համապատասխան ժամկետներում կներկայացնեն այն: Պատգամավորն ասաց, որ համամասնական ցուցակի եռյակը շատ չի տարբերվի իրենց նախորդ ցուցակներից: Աղվան Վարդանյանն ասաց, որ Դաշնակցությունն այսօր «մոդա թելադրող» քաղաքական ուժ է, ոչ թե մոդայիկ, ինչպիսին են այն ուժերը, ովքեր փորձում են դաշինքներ կազմել:
– Քաղաքական ուժերն այսօր զբաղված են նախընտրական ցուցակների կազմմամբ: 2017թ.-ի խորհրդարանական ընտրությունների ՀՅԴ նախընտրական ցուցակները ե՞րբ պատրաստ կլինե՞ն:
– Ցուցակները դեռ վերջնական պատրաստ չեն: Համապատասխան ժամկետներում այն կներկայացնենք: Մեր ընտրատարածքային շտաբներն այսօր ինտենսիվ աշխատում են ռեյտինգային ցուցակների ցանկի ձևավորման վրա: Ճիշտ ժամկետներում մեր բոլոր փաստաթղթերը, կուսակցության համամասնական ու ռեյտինգային ցուցակները պատրաստ կլինեն:
– Մամուլը գրեց այն մասին, որ ՀՅԴ-ն օգնություն է խնդրել ՀՀԿ-ից ռեյտինգային ցուցակներում «մարդկանց ընդգրկելու» համար: Այդպե՞ս է:
– Ուշադրություն մի դարձրեք նման լուրերին, շան տեղ մի դրեք: ՀՅԴ-ի մարդկային ռեսուրսները լի ու լի բավարարում են: ՀՅԴ-ն այսօր այն կազմակերպված ուժն է, որը հանրապետության բոլոր տարածքներում ունի իր կառույցները, քաղաքական մեծ թիմը: Մենք ընտրությունների ենք գնալու ոչ միայն ՀՅԴ-ական կուսակցականներով, այլև մեր արժեքները կիսող համակիրներով: Մեր ռեսուրսները լի ու լի բավարար են:
– Ո՞ւմ եք ձեզ մրցակից համարում:
– Բոլորին: Այսօր ընդհանուր փնտրտուք է ընթանում՝ դաշինքներ կազմելու, միավորումներ ստեղծելու ուղղությամբ: Բոլորն էլ մրցակիցներ են: Բայց ի տարբերություն շատերի մենք ունենք մեր առավելությունները: Վստահ եմ, որ նաև մեր շնորհիվ բարեփոխված նոր կառավարման համակարգը, այնպիսի քաղաքական ուժերի տեղն է, ինչպիսին է Դաշնակցությունը, այսինքն՝ կայուն, հետևողական, սկզբունքները մշտապես պահպանած:
Երկրի արտաքին ու ներքին խնդիրներն այսուհետ լուծվելու են խորհրդարանում, ուստի ԱԺ-ում որքան շատ լինեն սկզբունքային քաղաքական ուժերն, այնքան պետությունն ամուր դիրքեր կունենա:
– Ինչպե՞ս եք մրցակցելու իշխող ՀՀԿ-ի հետ, երբ քաղաքական համագործակցության հուշագիր ունեք, իշխանության մաս եք կազմում, բայց միևնույն ցուցակով կամ դաշինքով չեք մասնակցում ընտրություններին:
– Ամեն ինչ շատ պարզ է: Հիմա քաղաքական դաշտում ձևավորվում են դաշինքներ, ուժեր, որոնք այսօր իշխանության մաս չեն, բայց նրանք էլ չէ՞ միմյանց հետ մրցակցելու են: Երեկ կարդացի, որ նոր դաշինք է ձևավորվում, որը համագործակցության մասին համաձայնագիր է պատրաստվում ստորագրել, ինչպես ՀՅԴ-ն ու ՀՀԿ-ն: Տերմիններն էլ նույնն են…
Մենք տարբեր քաղաքական ուժեր ենք, ՀՅԴ-ն երբեք չի կորցրել իր անկախությունը, ինքնուրույնությունը: Մենք կարողացել ենք այս տարիների ընթացքում երկրի առջև ծառացած առաջնահերթությունները պետական քաղաքականության ուղղություն դարձնել: Վստահ ենք, որ ճիշտ ճանապարհ ենք ընտրել, վստահ ենք, որ սկսված փոփոխություններն առավել արդյունավետ կլինեն, եթե ՀՅԴ-ն մեծամասնություն լինի, նաև իշխանությունը չունենա բացարձակ մեծամասնություն, որպեսզի հարցերը միմյանց համոզելով լուծվեն: Վստահ եմ, որ հասարակության գերակշիռ մասը գիտակցում է, որ այսօր օրակարգում են ՀՅԴ առաջադրած հիմնական խնդիրները, որոնց լուծման ուղղությամբ դրական փոքր տեղաշարժեր՝ առաջին սաղմերը կան: Դրանք ավելի արագ ու արդյունավետ կլինեն, երբ ՀՅԴ-ն ավելի մեծ տեղ ունենա ապագա պառլամենտում:
Բոլորն աջ ու ձախ ընկած դաշինքներ են ստեղծում: Այսօր ամենամոդայիկ բառը «դաշինք»-ն է դարձել: Բայց ՀՅԴ-ն մոդայիկ չէ, ՀՅԴ-ն մոդան թելադրողն է: Այդ նաև մենք ենք ստեղծել այս պայմանները՝ խորհրդարանական կառավարման համակարգը, որ մյուսներն ակտիվորեն դաշինքներ են կազմում, փորձում են ներգրավվել հաջորդ խորհրդարան: Բոլորն այսօր գնում են ընտրությունների՝ մոռանալով, որ սա նաև մեր վաստակն է, որ իրենք վստահություն ունեն ընտրություններով բան փոխելու վերաբերյալ: Մենք հանգիստ, խաղաղ մեր գործը անում ենք:
Կամ, խոսում են՝ իշխանափոխությունից, համակարգափոխությունից: Բոլորը տարիներ շարունակ խոսում էին, թե նախագահին փոխենք, իշխանությունը փոխենք: Մենք դա արդեն արել ենք, փոխել ենք համակարգը: Այդ ի՞նչ պետք է այսօր անեք, որ մենք չենք արել: Սևացնելով, փնովելով, որևէ բան չես փոխի: Հարցերը լուծվում են աշխատանքով:
– Գուցե ՀՀԿ-ի ու ՀՅԴ-ի ամբիցիաները միմյանց խանգարում են դաշինքով հանդես գալու համար, քանի որ դուք մեծամասնություն կազմելու ակնկալիք ունե՞ք:
– Համաձայն չեմ ձեր մեկնաբանության հետ: Յուրաքանչյուր քաղաքական ուժ, երբ մտնում է ընտրարշավի մեջ, ամեն ինչ անում է, որ առավելագույն ձայներ ստանա: Ես չեմ կարող ասել՝ ՀՀԿ, դու ամեն ինչ մի արա, որ ձայն չստանաս: Ո՛չ: Ամեն մեկն անելու է իր հնարավորությունների համատեքստում:
– ՀՀԿ-ի հետ ստորագրած քաղաքական համագործակցության մասին հուշագիրն անժամկետ է: Միշտ խոսվել է այն մասին, որ ընտրություններից հետո պարզ կդառնա՝ կշարունակվի՞ արդյոք այդ համագործակցությունը, թե ոչ: Ի՞նչ արդյունքներ եք ակնկալում՝ համագործակցությունը շարունակելու համար:
– Ամեն ինչ կախված է ընտրությունների արդյունքներից: Որևէ մեկը չի կարող երաշխավորել, թե ապրիլի 3-ին մենք ինչ խճանկար կունենանք, ինչ պատկեր, ուժերի ինչ դասավորվածություն և դրանից հետո ինչ քննարկումներ կընթանան:
– Ի՞նչ արդյունք պետք է գրանցեք, որ շարունակեք համագործակցությունը:
– Բարձր արդյունք, շատ բարձր արդյունք:
tert.am
