Բնապահպանության նախարար Արծվիկ Մինասյանը Tert.am-ի հետ զրույցում, խոսելով բնապահպանական խնդիրների մասին, նշեց, որ չի եղել այնպիսի մի գործողություն կամ գործ, որ որպես էկոնոմիկայի նախարար իր վարքագծով ավելի վնասի բնությանը: «Սակայն եղել են դեպքեր, երբ մենք խոսում էինք տնտեսության զարգացման մասին` անտեսելով, կամ առանձին հատուկ ուշադրություն չդարձնելով էկոլոգիական խնդիրներին: Հիմա եթե դուք ինձ 7 ամսվա մեջ կներկայացնեք այնպիսի մեղադրանք, որ որպես էկոնոմիկայի նախարար ես ավիրել եմ բնությունը, կարծում եմ, որ այդպիսի դեպք չեք գտնի»,-ասաց նա:

-Պարո՛ն Մինասյան, Դուք քարոզարշավի ընթացքում անդրադառնում եք բնապահպանական խնդիրներին, որոնք առաջանում են խոշոր ձեռնարկությունների գործունեության պատճառով։ Բնապահպանության նախարար դառնալուց հետո՞ իմացաք այդ խնդիրների մասին։ Չէ՞ որ դրանից առաջ էկոնոմիկայի նախարարն էիք և ինչ-որ առումով խրախուսում էիք այդ ձեռնարկությունների զարգացումը:

-Այո, բնապահպանության նախարար դառնալով շատ ավելի խորությամբ ես տիրապետում այն վիճակին, որը ունենք: Շատ հարցեր կային, որ որպես էկոնոմիկայի նախարար կամ որպես պատգամավոր ընդհանուր ձևով ես նայում, բայց երբ զբաղեցնում ես մի պաշտոն, որտեղ առաջնահերթը բնապահպանական խնդիրներն են, ավելի լիարժեք է դառնում պատկերը, թե ինչու կայուն զարգացումը կառուցված է երեք հիմնարար՝ սոցիալական, տնտեսական և էկոլոգիական սկզբունքի վրա, և ինչու է կարևոր հատկապես տնտեսության զարգացոււմը կառուցել կանաչ էկոնոմիկայի հենքի վրա: Ես չեմ դադարել տնտեսագետ լինելուց, սակայն ինձ համար սկզբունքային նշանակություն ունեն էկոլոգիական խնդիրների տեսակետից ընդունելի տնտեսական նախաձեռնությունները: Չի եղել այնպիսի մի գործողություն կամ գործ, որ որպես էկոնոմիկայի նախարար իմ վարքագծով ես ավելի վնասեմ բնությանը, սակայն եղել են դեպքեր, երբ մենք խոսում էինք տնտեսության զարգացման մասին՝ անտեսելով, կամ առանձին հատուկ ուշադրություն չդարձնելով էկոլոգիական խնդիրներին: Հիմա համոզված ասում եմ, որ այնպես է ստացվել, որ ես իմ աշխատանքային գործունեության մեջ այս կայուն զարգացման 3 հենասյուներով պաշտոններ եմ զբաղեցրել՝ աշխատանքի և սոցիալական հարցերի փոխնախարար, էկոնոմիկայի նախարար և հիմա բնապահպանության նախարար:

-Այսինքն՝ որպես պաշտոնյա նաև պատասխանատու եք այն խնդիրների համար, որոնք կան այդ ոլորտներում:

-Ես կարծում եմ, որ ցանկացած անձ պետք է պատասխանատվություն զգա: Անկախ նրանից, որ ես 5,5 ամիս է, ինչ զբաղեցնում եմ Բնապահպանության նախարարի պաշտոնը, սակայն փաստ է, որ որպես նախարար պետք է կրես այդ պատասխանատվությունը՝ առանց մեղքը բարդելու որևէ մեկի վրա, և փորձես դուրս գալ այդ վիճակից: Կոնցեպտուալ մի քանի առաջարկներ մենք ներկայացրել ենք և նաև մեր նախընտրական ծրագրում են դրանք գրված: Բնական ռեսուրսները՝ որպես համաժողովրդական սեփականություն, կառավարման մի նոր հայեցակարգի կարիք ունեն, որպեսզի այս ռեսուրսների յուրաքանչյուր միավորի նկատմամբ մեր քաղաքացին զգա, որ ինքը սեփականատեր է, ոչ թե դա մեկ կամ մի խումբ մարդկանցն է: Ի վերջո, բնական ռեսուրսները միայն այս սերնդի սեփականությունը չեն, սա նաև ապագա սերունդներինն է: Բնությունը կարող է կլանել այնքան, որքան իր բնական կարողությունն է, չի կարող դրանից ավելին կլանել: Հետևաբար, այս սկզբունքները պետք է փոխեն նաև մեր տնտեսական քաղաքականությունը:

-Այսինքն՝ հիմա փորձում եք լուծել խնդիրներ, որոնք նախկինում ոլորտի շահից ելնելով կամ անտեսել եք, կամ նպաստել եք այդ խնդիրների առաջացմանը:

-Դուք բաներ եք ասում, որոնք իմ ասածի հետ ընդհանրապես կապ չունեն: Ես ասում եմ այն, ինչ եղել է՝ երեք հիմնարար սկզբունքի վրա հավասարապես կառուցված չի եղել: Եթե մենք, օրինակ, որևէ տնտեսական նախաձեռնություն ենք իրականացնում, սա նշանակում է, որ այս նախաձեռնությունը պատշաճ փորձաքննություն պետք է անցնի: Այսօրվա փորձաքննության համակարգը բավարար չէ, որ դա լիարժեք իրականացվի: Իմ ասածը շատ պարզ է: Անկախ նրանից, թե ով է ինչ ժամանակին արել, մենք պետք է կանգնենք և գիտակցենք, որ կայուն զարգացում ունենալու համար այս բոլոր բաղադրիչները անհրաժեշտ են: Հիմա եթե դուք, եթե ինձ 7 ամսվա մեջ կներկայացնեք այնպիսի մեղադրանք, որ որպես էկոնոմիկայի նախարար ես ավիրել եմ բնությունը, կարծում եմ, որ այդպիսի դեպք չեք գտնի: Եթե կուզենաք մեղադրանք ներկայացնել որպես աշխատանքի և սոցիալական հարցերի փոխնախարար՝ տարի ու կես զբաղեցրած պաշտոնում ինչ-որ մի վնաս եմ տվել, ուրախ կլինեմ ստանալու այդ պատկերը:

-Ո՞ւմ եք մեղավոր համարում այն բանում, այսօր ավերված է բնապահպանության ոլորտը, քանի որ դուք ասացիք, որ այդ ոլորտում շատ խնդիրներ կան, պատասխանատու տեսնո՞ւմ եք:

-Այն համակարգը, որը ձևավորված է եղել: 90-ական թվականներից սկսած մենք մեր բնական ռեսուրսները անխնա շահագործել ենք, տարբեր պատճառներ դնելով՝ ասելով, որ ծանր է վիճակը, պատերազմի մեջ ենք, այնուհետև էներգետիկ ճգնաժամը, և այլ և այլ:

-Դուք չե՞ք կարողացել փոխել այդ համակարգը:

-Տեսե՛ք, անկախության հռչակագրում գրված է միտք. Հայաստանի ընդերքը, ջրային ռեսուրսները, հողը, համաժողովրդական սեփականություն են: Ես ցանկանում եմ հարցնել՝ 1991 թվականին ձևակերպված այս միտքը ինչո՞ւ չկիրառվեց, ինչու համաժողովրդական սեփականությունը դարձավ մասնավոր սեփականություն։ Պատճառն այն է, որ մենք հետևողական չէինք՝ իբրև երկիր, պետություն, պատասխանատուներ ենք բոլորս: Հիմա հնարավորություն է տրված, որ մենք կարողանանք փոփոխել, մեր սխալների վրա՝ որպես երկիր, որպես պատասխանատուներ կառուցել ճիշտ ճանապարհ, և դրա համար իմ հորդորն է, կոչն է՝ միավորել մեր ջանքերը, իսկ եթե չենք կարողանում միավորել, դա այլ խնդիր է: Ինձ և մեր քաղաքական ուժի համար կայուն զարգացումն այլընտրանք չունի:

tert.am