Հայ Յեղափոխական Դաշնակցությունը և Հանրապետական կուսակցությունը կոալիցիոն բանակցությունների մեջ են. այս մասին այսօր ԱԺ-ում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը:
Հարցին, թե ովքեր են կոնկրետ բանակցում՝ Ռուստամյանը պատասխանեց, թե ՀՅԴ և ՀՀԿ ղեկավարությունը՝ առանց անուններ նշելու:
«Ենթադրում եմ, որ այն համագործակցությունը, որի մասին դուք տեղյակ եք, պետք է շարունակվի, որովհետև, ի վերջո, դա անժամկետ էր, պայմանավորված չէր որևէ ձևաչափով, այլ խնդիրների լուծմամբ էր պայմանավորված, իսկ այն հարցերը, որ համագործակցության մեջ արձանագրված են, դրանց զգալի մասը լուծված չեն»,- ասաց Ռուստամյանը:
Ըստ նրա՝ ՀՅԴ-ի խնդիրն է շարունակել ամեն ինչ անել այդ հարցերի վերջական լուծմանը հասնելու համար:
Իսկ մինչ այդ Ռուստամյանը շեշտեց, որ ՀՅԴ-ն գոհ է ընտրություններում իրենց արդյունքներից՝ հաշվի առնելով «դաժան պայքարը», և գտնում է, որ նախորդ ընտրությունների համեմատ աճ են արձանագրել:
Իսկ դիտարկումներին, թե ՀՅԴ-ն ընտրություններին վարչական ռեսուրս է կիրառել, պատասխանեց, որ եթե կիրառելու լինեին, նախորդին էլ կկիրառեին, երբ արդյունքները բավարար չէին:
Ռուստամյանը նշեց, որ բանակցությունները չեն ենթադրում, որ կլինի համապատասխան ՀՅԴ պորտֆելների կամ մարզպետների թվի ավելացում: «Խոսում ենք նոր ստեղծված իրավիճակում նոր որակով համագործակցության մասին, որովհետև համագործակցության մեկ տարվա փորձ ունենք, և սա լավ առիթ է հասկանալու՝ որքանով ենք կարողացել այդ համագործակցությունն ավելի արդյունավետ օգտագործել՝ ի շահ մեր պետության, և այդտեղ էլ անելիքներ կան»,-ասաց նա:
Դիտարկմանը, թե ինչպես են տեսնում համագործակցություն մի քաղաքական ուժի հետ, որը հենց ՀՅԴ-ի գնահատականով ընտրողներին ակնհայտ ուղղորդել է, Արմեն Ռուստամյանը պատասխանեց. «Նախ՝ քաղաքականությունը հնարավորինի արվեստ է, և մենք չենք կարող գործել այդ տրամաբանությունից դուրս։ Եվ ուրեմն պետք է այնպիսի գործիքներ ունենանք, որ հնարավորություն կտան մեր առջև դրված խնդիրները լուծելու: Այս ընտրություններն էլ ցույց տվեցին, որ բոլոր նրանք, ովքեր խոսում էին ինչ-ինչ արդյունքների մասին, դրանք ձեռք են բերել համագործակցության դեպքում և դա փաստ է»,-ասաց նա և նշեց, որ այս ընտրությունները լավ առիթ էին «պոռոտախոսությունից» ազատվելու համար։
Իսկ թե ինչպես եղավ, որ Փարպի գյուղում հենց իրենց դիմումով ընտրությունների արդյունքներն անվավեր ճանաչվեցին, Ռուստամյանը նշեց, որ Փարպիում ընտրությունների անվավեր ճանաչվելը հենց համագործակցության, ներսից աշխատելու արդյունք է: «Համատեղ եկանք այն եզրակացության, որ չէր կարող այդ աստիճանի խայտառակ, ակնհայտ, ճչացող, ուղղորդված ընտրությունները համարվել նորմալ: Գոնե մի տեղ դա պետք է արձանագրվի, որ սա անընդունելի է, և ստեղծված նոր ընտրական համակարգը պարտավոր է դրան արձագանքել»,-ասաց նա:
Ռուստամյանը նշեց, որ բազմիցս ասել են, որ ընտրակաշառք բաժանվել է, չնայած նրան, որ կոչ էին անում չտրվել դրանց, ինչը, սակայն, իրենց չհաջողվեց: Թե ովքեր են երևույթի ծնողները, ասաց, թե բոլորն էլ բաժանել են՝ նաև ընդդիմադիր ուժերից:
Հարցին՝ ՀՅԴ-ից է՞լ են եղել, պատասխանեց, որ եթե կա նման փաստ, պետք է ներկայացնել: «Դժվարությունն այն է, որ հանցագործություն է՝ թե՛ ընտրակաշառք տվողի, թե՛ վերցնողի դեպքում: Մինչև ժողովուրդը չհասկանա, որ քանի վերցնում է, զրկված է լինելու իր ընտրական իրավունքից…»,-ասաց նա:
Հարցին՝ իշխանության հետ չհամագործակցելու դեպքում հնարավոր չէ՞ որևէ արդյունքի հասնել, ինչպես հաջողվեց Փարպի գյուղում անվավեր ճանաչել ընտրությունները, Ռուստամյանը պատասխանեց.
«Ոչ, իրենք ուղղակի հիմնավոր և ճիշտ մեթոդներով ու գործիքներով են աշխատում, որ հասնում են արդյունքի»:
tert.am