ՀՅԴ պատգամավոր Արծվիկ Մինասյանի հարցազրույցը «Հրապարակ»-ին
– Պարոն Մինասյան, հաշվի առնելով Արմեն Ռուստամյանի վերոնշյալ հայտարարությունը, կարո՞ղ ենք ասել, որ գոնե ՀՅԴ-ի պարագայում այդ հանդիպումները նախագահական ընտրությունների հետ որեւէ առնչություն ունենալ չեն կարող, եւ ավելորդ է խոսել նաեւ այս համատեքստում հավանական ընդդիմադիր միասնական թեկնածուի մասին: Դրա մասին է վկայում նաեւ այն, որ ԲՀԿ-ի հետ հանդիպումից հետո ՀՅԴ-ն հայտարարեց, որ նախագահական ընտրություններին վերաբերող հարց չի քննարկել, մինչդեռ ՀԱԿ-ԲՀԿ հանդիպումից հետո չբացառեցին միասնական թեկնածուով հանդես գալու տարբերակը:
– ՀՅԴ-ԲՀԿ հանդիպման մասին արդեն հայտարարածից ավելին ասել չեմ կարող, քանի որ չեմ մասնակցել եւ տեղյակ չեմ մանրամասն, թե ինչ են քննարկել: Սակայն կարող եմ ասել, որ մեզ մոտ քննարկվում են բազում սցենարներ, բայց հիմնական խնդիրը հետեւյալն է: Մենք հանդես ենք եկել օրակարգով եւ համարում ենք, որ Հայաստանի առջեւ ծառացած գլխավոր մարտահրավերներն այն 7 կետերն են, որոնք հրապարակվեցին Դաշնակցության անվամբ Գերագույն ժողովի կողմից հաստատված ձեւով: Երկրորդ. ի սկզբանե դեռեւս Գերագույն ժողովից հետո ասել ենք, որ քաղաքական քննարկումների շարք պետք է սկսենք Դաշնակցության կողմից հրապարակված օրակարգային հարցերի մասով: Երրորդ հաստատում. ասել ենք եւ պնդում ենք, որ որեւէ թեկնածուի հարց հիմա քննարկելը նշանակում է տապալել հիմնական խնդրի լուծումը, այն է՝ Հայաստանի առջեւ ծառացած խնդիրները, անձը երկրորդական պլան է մեզ համար: Երբ հիմա փորձ են անում նորից խոսել թեկնածուի մասին, նշանակում է՝ փորձ են անում տապալել հիմնական խնդրի լուծումը, դրա համար մենք չենք խոսում այդ մասին, մենք ասում ենք՝ քաղաքական քննարկումների արդյունքում պետք է ձեւավորվի վերջնական տեսակետ եւ այդ վերջնական տեսակետը կհրապարակվի արտակարգ Գերագույն ժողովի ժամանակ, երբ Դաշնակցությունն իր բոլոր քննարկումների արդյունքում կգա եզրակացության: Այդ եզրակացությունը չի բացառում որեւէ տարբերակ՝ բոյկոտից մինչեւ միասնական թեկնածու կամ առանձին մասնակցելու տարբերակ: Մեզ համար անձը երկրորդական խնդիր է, օրակարգը ճիշտ դասավորելու խնդիրն է առաջնային: Եվ չենք էլ սեփականաշնորհում դաշտը, մենք ասում ենք՝ իր օրակարգը պետք է ունենա:
– Ըստ էության հնարավոր համարո՞ւմ եք, որ ՀՅԴ-ն սատարի թե ՀԱԿ-ի, թե ԲՀԿ-ի, թե «Ժառանգության» թեկնածուին:
– Ոչ, ես հիմա հնարավոր չեմ կարող համարել մի բան, որը պրոցեսի արդյունքում եզրահանգման չեմ եկել: Եթե հիմա խոսում ենք որեւէ ներկայացուցչի պաշտպանության մասին, նշանակում է կեղծ գործընթաց ենք անում: Մենք ազնիվ, արդար պահանջներ ենք առաջադրում, ինչի՞ ենք ուզում տապալել հնարավոր համագործակցությունը: Ի վերջո, ազգային համաձայնությունը կարող է տեղի ունենալ հարցերի եւ ոչ թե անձի շուրջ: Մեր պատմությունն էլ է ցույց տվել, որ երբ անձի շուրջ ես համախմբվում, անպայման ունենում ես պառակտում, մենք ասում ենք, որ այս անգամ ուզում ենք հակառակից շարժվել, գնանք դեպի ակունք եւ ասենք՝ ինչ խնդիրներ է այսօր դրված:
– Պարոն Մինասյան, ըստ էության, ԲՀԿ-ն է այդ խորհրդակցությունների նախաձեռնողը, որը երկու հարց է օրակարգում առաջարկում, կարծում եք այդ երկու հարցերով կարելի՞ է լայն կոնսոլիդացիա ստեղծել, եւ արդյո՞ք դրանք են մեր երկրի առջեւ ծառացած առաջնային խնդիրները:
– Այդպիսի բան չկա…
Իմիջիայլոց ասեմ ձեզ, ԲՀԿ-ն, որ երկու կետով առաջարկություն է արել… մի քիչ հետ նայեք, էլի, այդ երկու կետերն ընդամենը ամիսներ առաջ մենք եւ «Ժառանգությունն» էինք բարձրացնում, վերջ: Դրանից հետո հիմա խոսել նորից առաջամարտիկի մասին, կարծում եմ՝ դա էլ մի նոր երեւույթ է, որը կտանի տապալման: Եկեք չասենք, թե առաջամարտիկն ով է՝ ՀՅԴ-ն, ԲՀԿ-ն, ՀԱԿ-ը, իշխանությունը: Մենք առաջադրել ենք օրակարգային հարցեր, եթե կան ուժեր, որոնք կավելացնեն օրակարգային հարցերը, խնդրեմ, եթե չկան, 7-ը արհեստականորեն կրճատել պետք չէ: Եվ չպետք է կենտրոնանալ երկու հարցերի շուրջ:
– Բայց ԲՀԿ-ից կարծես թե հստակ պատասխան մինչ օրս չենք լսել՝ պատրա՞ստ են արդյոք այդ կոնսուլտացիաների օրակարգում ընդգրկել ձեր բոլոր 7 կետերը, փոխարենը երկուստեք հայտարարվել է, որ խորհրդակցությունները շարունակվելու են:
– Ի վերջո, այդ 7 կետերը պետք է ամբողջականության մեջ քննարկել, սկսած բիզնեսը քաղաքականությունից տարանջատելուց, ավարտած Հայաստանի արտաքին մարտահրավերների հաղթահարումով: Սրանք բոլորն իրար հետ փոխկապակցված են, եւ յուրաքանչյուր կետ ուժեղացնում է նախորդին: Եվ այնպես չէ, որ, ասենք, մենք երկու կետում համաձայնություն ունենք, վերցնենք եւ գնանք առաջ:
– Էլ չենք խոսում գոյություն ունեցող տեսակետի մասին, որ այդ երկու հարցերը նախագահական ընտրությունների հետ ուղիղ կապ չունեն:
– Ես պնդում եմ, որ ուղիղ կապ ունեն, որովհետեւ այն մարդը, որը հավակնում է առաջնորդել Հայաստանն առաջիկա մի քանի տարիների ընթացքում, նրա կեցվածքը պետք է լինի այս հարցերի վերաբերյալ: Եվ եթե մենք այսօր կարող ենք օգտագործել այս առիթը եւ հնարավորություն ընձեռել ծառացած մարտահրավերների վերաբերյալ կուսակցությունների, հասարակության վերաբերմունքը պարզելու, սա միայն օգուտ կարող է տալ:
– Պարոն Մինասյան, իսկ լավատե՞ս եք, որ քաղաքական ուժերը կընդունեն ձեր առաջարկած բոլոր կետերը:
– Ես չգիտեմ, քաղաքական ուժերը ժամանակին ունեցել են տարբեր տեսակետներ առանձին-առանձին՝ նույն հայ-թուրքական արձանագրությունների եւ այլնի հետ կապված: Տա Աստված, որ յուրաքանչյուր ուժ քաղաքական կամք գտնի իր մեջ եւ ճանաչի, որ դրանք իսկապես քաղաքական օրակարգի կետեր են, եւ երկրորդ, անկեղծորեն իր տեսակետն արտահայտի, որովհետեւ եթե չունենանք այդ անկեղծությունը, չասենք, այլ զուտ կեղծ, իմիտացիոն գործընթացով մտածենք՝ ինչպես անենք, որ նախագահական ընտրություններում մեր թեկնածությունն առաջադրվի, կամ մեզ պաշտպանեն, մենք նորից կունենանք հերթական ֆիասկոն ազգի նկատմամբ: Ազգային ֆիասկո պետք չէ:
– Կարելի է ենթադրել, որ ձեր առաջարկած թեկուզ մեկ կետի անտեսման, քաղաքական օրակարգ չընդգրկվելու պարագայում ՀՅԴ-ն չի՞ շարունակի գործակցությունն ընդդիմադիր ուժերի հետ:
– Նայած ինչ կետ, եւ եթե այնպիսի կետ է դուրս մնում, որը թուլացնելու է ընդհանուր պետականությունը, իհարկե, մենք առարկելու ենք այդ մոտեցմանը, բայց եթե կետեր են, որ նրբերանգներ են պարունակում, օրինակ, մենք ասում ենք խորհրդարանական համակարգ, մենք առաջարկում ենք ոչ թե վերացնել նախագահի ինստիտուտը, ոչ, ավելի շատ խորհրդարանին տալ լիազորություններ, գործադիրի ձեւավորման, նախարարների անհատական պատասխանատվության կանչման, ինչպես նաեւ մարզպետների նոր ընտրության միջոցով ձեւավորել լիազոր ներկայացուցչական մարմիններ: Մինչդեռ խորհրդարանական կառավարման բազմաթիվ մոդելներ կան:
– Ձեր ներկայացրած պլատֆորմում կա կետ նաեւ բիզնեսը քաղաքականությունից տարանջատելու վերաբերյալ: Այդ կետի առաջքաշումն ու ընդունումը որքանո՞վ է ռեալ, հաշվի առնելով, որ ՀՅԴ-ում էլ կան գործարարներ, իսկ ԲՀԿ-ն առհասարակ գործարարների հիմքի վրա կազմված կուսակցություն է:
– Տեսնում եք՝ ասում եք Դաշնակցությունում կան մարդիկ, եւ եթե մենք այդ վճռականությունն ունենք արդեն, քսան տարի ունենք, նշանակում է մենք կաշկանդված չենք այդ մարդկանցով եւ պատրաստ ենք երեւույթն արմատախիլ անել, որպեսզի օլիգարխիան որոշում կայացնելու իրավասություն երկրի պետական կարեւոր հարցերի ուղղությամբ չունենա:
Լուսինե Շահվերդյան
«ՀՐԱՊԱՐԱԿ»
