Արցախեան շարժումի 30-ամեակի նշումը բազմաթիւ խորհուրդներ վերարժեւորելու առիթ է: Համախմբում, ինքնապաշտպանութիւն, բանակաշինութիւն, ազատագրում, պետականութիւն, հանրապետութիւն:

Դար մը առաջ մայիսեան հերոսամարտերու եւ հանրապետութեան կերտումի պատմադրոշմ իրադարձութիւններէն ետք, արցախեան շարժումը մեր ժամանակակից պատմութեան ամէնէն բախտորոշ շրջադարձն է, որ մեզ վերակերտեց իբրեւ ազգ եւ պետութիւն:

Մեր արդի պետականութեան եւ անկախութեան վերականգնման ակունքներուն` կայացած երեւոյթ է արցախեան շարժումը, որ հայութեան մէկ կարեւոր հատուածը ցեղասպանութեան ենթարկուելու սպառնալիքէն փրկելու առընթեր երաշխաւորեց հայրենիքի անվտանգութիւնը:

Արցախը հոգեփոխեց մեզ: Ցեղասպանութիւն, Արեւմտահայաստանի եւ արեւմտահայութեան կորուստ, ապա երկուքուկէս տարուան յարութենէն ետք, անկախութեան զիջում եւ տարածքներու բռնակցում: Արցախահայութեան շարժումը շատ արագ վերածուեցաւ համայն հայութեան յաղթանակին, որ հոգեշարժի ենթարկեց ազգը:

Մէկ կողմէ քաղաքակիրթ եղանակով, ժողովրդավարական հիմունքներով, միջազգային օրէնքին ընդառաջ արցախահայութիւնը ամբողջացուց ազգերու ինքնորոշման իրաւունքի կենսագործման սկզբունքները, միւս կողմէ պարտաւորուեցաւ դէմ դնել հակառակորդի անընդհատ կրկնուող ոտնձգութիւններուն, սադրանքներուն, ռազմական արկածախնդրութիւններուն:

Այսպիսով, ազատագրուեցաւ հայրենի Արցախը, որ իր կարգին երաշխաւորեց Հայաստանի Հանրապետութեան անվտանգութիւնը, այդպիսով նաեւ` պետականութեան վերականգնումն ու կայացումը:

Հայրենիքի սահմաններու պաշտպանութեան առաջադրանքին առընթեր, այժմ ազգովին թեւակոխած ենք իրաւաքաղաքական կարեւորագոյն փուլ: Հետզհետէ թափ կը հաւաքէ նահանգային եւ քաղաքային մակարդակներու վրայ Արցախի Հանրապետութեան ճանաչման շարքը: Աշխատանքը կը համալրուի տարբեր խորհրդարաններու մէջ գործող կուսակցութիւններու համապատասխան բանաձեւերու որդեգրումներով, պաշտօնական Ստեփանակերտը ներկայացնող դէմքերու աշխարհաքաղաքական օրակարգերով զբաղող միջազգային կեդրոններ այցելութիւններով, տարբեր երկիրներու խորհրդարանականներու Արցախ ժամանումով, հակամարտութեան էութեան մասին համաշխարհային ամէնէն նշանաւոր լրատուամիջոցներու լրագրողներու հաղորդումներու, տեսանիւթերու եւ վերլուծականներու հրապարակումներով: Այս բոլորին առընթեր` հակառակորդի ձեռնարկած տեղեկատուական պատերազմին միացեալ համակարգումով, համահայկական լրատուադաշտի ներկայացուցիչներու Արցախի մէջ յաճախակի համախմբուելով, համագործակցելով եւ նպատակաուղղուած աշխատանքի ծաւալումով:

Արցախեան շարժումը, այո՜, միաւորած է համայն հայութիւնը որ առաջնային օրակարգ ճշդած է Արցախի Հանրապետութեան միջազգային ճանաչումը :

Երեսնամեակ մը առաջ ծայր առած շարժումը յանգած է Արցախի Հանրապետութեան կայացումին, բանակաշինութեան, պետականութեան վերականգնումին, հայրենիքի անվտանգութեան երաշխաւորումին, սփիւռքի հայրենակեդրոն մտածողութեան եւ նոր, միացեալ աշխատակարգերու եւ կառոյցներու գոյառման: Մէկ խօսքով` հայկական աշխարհի միաւորման:

Բոլորս կը գտնուինք զինուորական եւ քաղաքական խրամատներու մէջ` կողք-կողքի: Պահպանելու համար այսօրուան փաստացի սահմանները եւ իրաւական ճանաչում ապահովելու Արցախին: «Անյաղթելի մի բուռ աշխարհ»-ին:

«Ազդակ»-«Ապառաժ» բացառիկ համարի խմբագրական

aztagdaily.com