Ըստ տարածքային կառավարման նախարար Դավիթ Լոքյանի ապրիլից հետո ՀՅԴ-ի պորտֆելների մասով բան չի փոխվելու:
«Չկան այդպիսի բանակցություններ: Ենթադրում եմ, որ այն ինչ դաշնակցությունն ունի կշարունակի պահպանել, եթե քաղաքական համաձայնությունը կկայանա»,- այսօր ԱԺ-ում լրագրողների հետ զրույցում ասաց Դավիթ Լոքյանը:
Հարցին, թե նա շարունակելո՞ւ է պաշտոնավարել, Լոքյանն ասաց.
«Ես գուցե չշարունակեմ ղեկավարել, բայց կուսակցությունն այդ կառավարության կազմում կլինի: Մենք կոալիցիան շարունակելու ենք, իսկ թե ես նախարար կմնամ, թե՝ ոչ, չեմ կարող ասել»,- ասաց նա:
ՀԺ-ի հարցին, թե այդ քննարկումները ՀՅԴ-ում ե՞րբ են սկսվելու՝ արդյո՞ք նախարարների փոփոխություն լինելու են, Լոքյանը նշեց, որ ներկուսակցական քննարկումները դեռ չեն սկսվել, մինչեւ ապրիլի սկիզբ չեն էլ սկսելու:
«Ես ԳՄ անդամ եմ, այդ հարցը չենք քննարկել, նման խնդիր չկա ձեւակերպված»:
Լրագրողի հարցը լսելով, թե քաղաքական որոշումները կայացնելիս ՀՅԴ ենթարկվելու է ՀՀԿ-ի՞ն, Լոքյանը նեղսրտեց:
«Ինչու՞ պետք է ենթարկվենք ՀՀԿ-ի առաջարկներին, որոշումներին, երբ մենք մեր որոշումներն ենք կայացնում»,-ասաց նա, իսկ հստակեցմանը, թե ՀՀԿ-ն կոալիցիայի մեծ եղբայրն է, Լոքյանն արձանագրեց.
«Կոալիցիայում մեծ ու փոքր եղբայրներ չեն լինում: Կոալիցիայում քաղաքական ուժեր են, որոնք միասին որոշում են ինչ ճանապարհ են անցնելու»:
«ՀԺ»-ի հարցին, թե ի՞նչ կարծիք ունի Սերժ Սարգսյանի վարարտադրության դեմ պայքարող ուժերի գործողությունների մասին, Դավիթ Լոքյանն արձագանքեց.
«Ես կարծում եմ, որ անիմաստ է: Պետք է կարողանան ասել՝ ինչերի հետ համաձայն չեն»,- ասաց նա:
«Հայկական Ժամանակ»
armtimes.com