ՀՅԴ-ին առաջարկում են ներգրավվել ձեւավորվելիք հարթակում եւ մասնակից դառնալ «Հյուսիս-հարավ»-ի գործընթացներին


ՀՀ տրանսպորտի, կապի եւ տեղեկատվական տեխնոլոգիաների նախարարությունն արձագանքել է ՀՅԴ Բյուրոյի տնտեսական հետազոտությունների գրասենյակի բաց նամակին, որը վերաբերում էր «Հյուսիս-հարավ» ճանապարհային միջանցքին:

Նախարարության պատասխանում ասվում է.

«Հյուսիս-հարավ ճանապարհային միջանցքի ներդրումային ծրագիրը», լինելով ՀՀ խոշորագույն ռազմավարական ծրագրերից մեկը, ՀՀ ղեկավարության եւ հանրության ուշադրության կենտրոնում է: Ցանկացած մասնագիտական եւ փորձագիտական ուսումնասիրություն ծրագրի պատասխանատուների կողմից խրախուսվում է։

ՀՀ տրանսպորտի, կապի եւ տեղեկատվական տեխնոլոգիաների նախարարության, «Տրանսպորտային ծրագրերի իրականացման կազմակերպություն» ՊՈԱԿ-ի եւ ՀՅԴ Բյուրոյի տնտեսական հետազոտությունների գրասենյակի ներկայացուցիչների միջեւ մինչ այս արդեն տեղի է ունեցել հանդիպում, որի ընթացքում հանգամանալից պարզաբանումներ են տրվել նրանց կողմից հրապարակայնորեն բարձրացված յուրաքանչյուր հարցադրման վերաբերյալ։

Բացի այդ, նախարարությունը պատրաստակամություն է հայտնել լայն համագործակցության՝ ծրագրի վերաբերյալ նրանց տրամադրելու ցանկացած փաստաթուղթ (բացառությամբ, եթե դրանց տրամադրումը եւ/կամ հրապարակումը օրենքով կամ պայմանագրերով սահմանափակված չեն)։

Մեկ անգամ եւս ընդգծում ենք, որ ծրագրի պատասխանատուները շահագրգիռ են, որպեսզի «Հյուսիս-հարավ ճանապարհային միջանցքի ներդրումային ծրագրի» հետ կապված ցանկացած հարց պատշաճ պարզաբանված լինի ինչպես հետազոտական գրասենյակի, այնպես էլ հանրության համար։

Ի դեպ, հանրության հետ սերտ համագործակցության պատրաստակամության մասին հուլիսի 18-ին լրագրողների հետ կայացած հանդիպման ընթացքում հայտնել է նաեւ ՀՀ տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանը։ Նախարարն խոսել էր հանրային հարթակ ստեղծելու մտադրության մասին, որտեղ ներգրավված անձինք կմասնակցեն այն գործընթացներին, որոնք տեղի են ունենում նախարարության աշխատանքների շրջանակներում։

ՀՅԴ Բյուրոյի տնտեսական հետազոտությունների գրասենյակի ներկայացուցիչներին եւս առաջարկում ենք ներգրավվել նախարարին կից ձեւավորվելիք հարթակում, մասնակից դառնալ նախարարության, այդ թվում՝ «Հյուսիս-հարավ» ծրագրին առնչվող գործընթացներին։

Տեղեկացնենք նաեւ, որ ՀՅԴ Բյուրոյի տնտեսական հետազոտությունների գրասենյակի պահանջած տվյալների մի մասը տեղադրված է «Տրանսպորտային ծրագրերի իրականացման կազմակերպություն» ՊՈԱԿ-ի պաշտոնական կայքում։

ՀՅԴ հայտարարությունը՝ Հյուսիս-հարավ ճանապարհային միջանցքի ներդրումային ծրագրի» թափանցիկության ապահովման մասին

Տպել Տպել