Սիրիահայերին օգնելու նպատակով ստեղծված «Օգնիր եղբորդ» նախաձեռնության շրջանակներում տարբեր բարերարներից, անհատներից եւ կազմակերպոււթյուններից նվիրաբերվել է 41 մլն դրամ, 750 հազար ռուսական ռուբլի եւ շուրջ 31 մլն դրամի պարենամթերք:
Այս մասին, այսօր, դեկտեմբերի 19-ին «Ուրբաթ» մամուլի ակումբում լրագրողների հետ հանդիպման ժամանակ ասել է «Օգնի՛ր եղբորդ» նախաձեռնության անդամ Լիլիթ Գալստյանը:
Սիրիահայ մանուկների համար տարեվերջին կկազմակերպվեն տարեմուտի հանդեսներ եւ նրանց կտրվեն ամանորյա նվերներ:
Ասուլիսի մյուս բանախոսը՝ ՀՅԴ Բյուրոյի անդամ, ԱԺ պատգամավոր Վահան Հովհաննիսյանը նշել է, որ նախաձեռնությունը շարունակում է իր աշխատանքը բավականին ակտիվ, որոշ շեշտադրումներ ստիպված են փոխել:
Նաեւ նշել է, որ ինքնաթիռով օգնությունը Հալեպ տեղափոխելը խնդիր էր առաջացնում այն հայաշատ շրջաններ տանելու հարցում, քանի որ ճանապարհները փակ են, այժմ կենտրոնացել են տեղում հայ բնակչությանը գումար հասցնելու վրա, որը այս փուլում ավելի հարմար է: Չի բացառվում, որ նորից ինքնաթիռներով օգնություն ուղարկեն, սակայն այս պահին նպատակահարմար են գտնում գումարով օգնել:
Ըստ Վահան Հովհաննիսյանի պատերազմի պատճառով այստեղ հայտնված մարդկանց պահանջները տարբեր են․ – «Ամենամեծ եւ մեզ համար անսպասելի պահանջը վերմակներն էին՝ պարզ վերմակները, որովհետեւ ձմեռ է, ցուրտ է, եւ մարդիկ ծածկվելու կարիք ունեն։ Մենք ստիպված եղանք պատվիրել հարյուրավոր վերմակներ։ Բացի դրանից, իհարկե, պարենամթերքի մատակարարումը նույնպես շարունակվում է։ Դա անընդհատ կատարվում է Դաշնակցության երիտասարդական կենտրոնից։ Դա մենք սիստեմատիկ անում ենք»։
Գնահատելով պետության հոգածությունը եւ օգնությունը սիրիահայերին՝ բանախոսները նշել են, որ այսօր կարեւոր է կացավայրի եւ աշխատատեղերի խնդրի լուծումը:
Ամփոփելով «Օգնիր եղբորդ» նախաձեռնության գործունեությունը
«Օգնիր Եղբորդ» քաղաքացիական նախաձեռնությունը մեկնարկեց ս.թ. սեպտեմբերի 18-ին։ Առիթը մոտ մեկ տարի Սիրիայում շարունակվող եղբայրասպան հակամարտությունն էր, որի ողբերգական հետևանքները բացահայտ էին ինչպես Սիրիայի ողջ ժողովրդի, այնպես էլ մեր հայրենակիցների համար։ Պատերազմի ավերիչ ընթացքն անդառնալի կորուստներ էր հասցնում և շարունակում է հասցնել մեր ամենակենսունակ համայնքներից մեկին՝ սիրիահայ համայնքին։
Անտարբեր լինելու իրավունք չունեինք և չունենք։ Պահն էր և է, երբ ողջ հայությունը պետք է ցույց տար իր միասնականությունը, օգնության ձեռք մեկնելով ինչպես սիրիահայ, այնպես էլ Սիրիայի կարիքավոր ընտանիքներին։
Մեր եղբայրներին պատերազմի արհավիրքի դեմ մենակ չթողնելու կոչը լայն արձագանք գտավ։ Եվ ինչպես ակնկալում էինք, նախաձեռնությունը չունեցավ ոչ աշխարհագրական և ոչ էլ գաղափարախոսական սահմաններ։ Մեր տասնյակ համաքաղաքացիներ, հայրենի մտավորականներ, քաղաքական գործիչներ և գործարարներ իրենց նյութական և բարոյական աջակցությունը ցուցաբերեցին «Օգնիր եղբորդ» նախաձեռնությանը:
Նախաձեռնության շրջանակներում տարբեր բարերարներից, անհատներից և կազմակերպություններից նվիրաբերվել է 41մլն 312660 ՀՀ դրամ, 750 000 ռուսական ռուբլի և շուրջ 31մլն 033210 ՀՀ դրամի պարենամթերք (կից հաշվետվությունը)։
Նրանց և մի շարք բարերարների հատկացումներով բեռնված «Օգնիր եղբորդ» քաղաքացիական նախաձեռնության առաջին մարդասիրական ինքնաթիռը «Զվարթնոց» միջազգային օդանավակայանից դեպի Հալեպ ուղևորվեց հոկտեմբերի 15-ին՝ տանելով 14 տոննա պարենամթերք և դեղորայք։ Թռիչքն իրականացրեց «Էյր Արմենիա» ընկերության AN-12 բեռնատար ինքնաթիռը՝ հայկական անձնակազմով։
Հոկտեմբերի 22-ին Սիրիական ավիաուղիների Երևան-Հալեպ թռիչքով Սիրիա տեղափոխվեց մոտ երկու տոննա մարդասիրական օգնություն՝ այդ թվում առաջին անհրաժեշտության դեղորայք։
«Oգնիր եղբորդ» նախաձեռնութան հումանիտար օգնության երրորդ խմբաքանակն ուղարկվեց նոյեմբերի 21-ին, թռիչքը դարձյալ իրականացվեց Երևանի Զվարթնոց միջազգային օդանավակայանից «Էյր Արմենիա» ընկերության բեռնատար ինքնաթիռով: Հալեպ ուղևորված 13 տոննա բեռը՝ բաղկացած էր 12-15 կիլոգրամանոց արկղերից և պարունակում էր պարենամթերք, այդ թվում՝ կաթի փոշի և մեկ տոննա պանիր:
Հալեպ ուղարկված մարդասիրական օգնությունը ստանձնել են տեղի Կարմիր մահիկի միջազգային կազմակերպությունն ու Հայ Առաքելական Եկեղեցու Բերիո Թեմի Ազգային առաջնորդարանը և համահամայնքային «Շտապ օգնության» հանձնախմբի կազմակերպմամբ բաժանել կարիքավոր ընտանիքների, այդ թվում սիրիացիների։
Նախաձեռնությունն իր օգնության ձեռքն է մեկնել նաև Հայաստանում հաստատված սիրիահայ մեր հայրենակիցներին։ Լեռնային Ղարաբաղի Հանրապետության Քաշաթաղի շրջանում հաստատված 20 սիրիահայ ընտանիքների բնակարանաշինական կարիքները հոգալու նպատակով «Օգնիր եղբորդ» նախաձեռնությունը 5000000 (5մլն) դրամի փոխանցում է կատարել «Քաշաթաղ» հիմնադրամին։ 230 հոգու տրամադրվել է սպորտային կոշիկ և մարզական հագուստ։ 600 ընտանիքների տրամադրվել են 15 կգ-անոց պարենային արկղեր և 600 հոգու տաք ծածկոցներ։
Սիրիահայ մանուկների համար տարեվերջին կկազմակերպվեն տարեմուտի հանդեսներ և նրանց կտրվեն ամանորյա նվերներ։
«Օգնիր եղբորդ» քաղաքացիական նախաձեռնությունը իր խորին երախտագիտությունն է հայտնում մեր կոչին անդրադարձած բոլոր-բոլորին և վստահություն հայտնում, որ շարունակելու ենք համազգային համախմբման այս նվիրական գործը։
«ՕԳՆԻՐ ԵՂԲՈՐԴ» քաղաքացիական նախաձեռնություն
