«Շարունակուում է 2010թ. Բելառուսի նախագահական ընտրութիւնների թեկնածու Միկալայ Ստատկեվիչի բանտարկութիւնը։ Օրական տեղի են ունենում մարդու իրաւունքների կոպիտ խախտումներ, ներառեալ՝ քաղբանտարկեալների խոշտանգումներ եւ ռեժիմին նկատմամբ իրենց տեսակէտը արտայայտող ընդդիմադիրի հալածանքները։ 2010 թուականի ընտրութիւններից ի վեր, Բելառուսը առաւել եւս խորացրել է բռնատիրական, մենատիրական ռեժիմը։ Այդ ռեժիմի նկատմամբ տնտեսական պատժամիջոցները պէտք է շարունակուեն, սակայն պէտք է անել աւելին՝ իշխանութիւնների վրայ ճնշումը մեծացնել այնքան՝ որ կարելի լինի դրական փոփոխութիւններ ձեռք բերել։ Սա ենթադրում է նուազագոյնը Միկալայ Ստատկեվիչի եւ Բելառուսում բոլոր միւս քաղբանտարկեալների ազատ արձակումը եւ ընդդիմադիր քաղաքական գործիչների եւ ակրիւիստների առօրեայ ճնշումների աւարտը։

«Ուկրաինայում, նախագահի եւ իշխանութիւնների կողմից առնուած քայլերը խստօրէն սահմանափակել են ժողովրդավարական ազատությունները։ Ընդդիմադիր կուսակցութիւնների ղեկավարներ են հալածանքի ենթարկուել քաղաքական պատճառներով, եւ առաջ է քաշուել պետական կառոյցների կիրառումը որպէս քաղաքական վրէժխնդրութեան գործիքի եւ ընտրովի արդարութեան։ Պէտք է վերջ տալ դէպի մենատիրութիւն տանող այս անկումին, յարգելով այն սկզբունքը՝ թէ քաղաքական վէճերը պէտք է լուծել ժողովրդավարական միջոցներով՝ քուէատուփի ճանապարհով եւ խորհրդարանում, առանց դիմելու քաղաքական նպատակներով հալածանքների եւ քրէական դատարաններում կեղծուած վճիռների։ Քաղբանտարկեալները, ներառեալ նախկին վարչապետ Յուլիա Տիմոշենկոն, պէտք է ազատ արձակուեն 2012թ.-ի աշնան կայանալիք ընտրութիւններից առաջ, որպէսզի հնարաւորութիւն տրուի բաց, մրցակցային ընտրարշաւի։

«2012թ. հոկտեմբերին Վրաստանում նախատեսուած խորհրդարանական ընտրութիւնները վճռական նշանակութիւն ունեն ժողովրդավարութեան զարգացման համար, որպէսզի հող պատրաստուի 2013 թուականի նախագահական ընտրութիւններում՝ անկախութիւնից ի վեր առաջին անգամ ժողովրդավարական միջոցներով իշխանութեան փոխանցման, երբ կ՚աւարտուի գործող նախագահի պաշտօնավարման երկրորդ եւ վերջին ժամկէտը։ Այս տեսանկիւնից, կենսական է վերջ տալ քաղաքական գործընթացի վրայ դրուած ճնշումներին եւ ստեղծել արդար եւ մրցակցային պայմաններ քաղաքական մրցակցութեան համար։ Վրաստանը պէտք ունի մամուլի ազատութեան, վերջ պէտք է տրուեն գործող ուժին ի նպաստ վարչական միջոցների օգտագործմանը եւ ընդդիմադիր կուսակցութիւնների եւ ակտիւիստների դէմ ճնշումներին։

«Հիմնուած Ընկերվար Միջազգայնականի 2010թ. նոյեմբերի Փարիզի Խորհուրդի ժողովում Լեռնային Ղարաբաղի հակամարտութեան վերաբերեալ միաձայնութեամբ ընդունուած յայտարարութեան վրայ, Յանձնախումբը իր մտահոգութիւնը յայտնեց Ադրբեջանի վերջին յայտարարութիւնների վերաբերեալ, թէ Հայաստանի եւ Լեռնային Ղարաբաղի հետ շփման գծից յետ չի քաշելու իր դիպուկահարներին, ինչպէս նաեւ՝ հակառակ ԵԱՀԿ Մինսկի խմբի համանախագահներին տրուած երաշխիքներին՝ Ղարաբաղ-Հայաստան քաղաքացիական թռիչքների վերսկսման դէմ ուղղուած սպառնալիքների կապակցութեամբ։ Հակամարտութեան երկու կողմերում դերակատարների հետ իր աշխատանքը շարունակելու համար, Ընկերվար Միջազգայնականը կապեր պիտի ստեղծի եւ երկխօսութիւն հաստատի Ադրբեջանում նման հայեացքների տէր քաղաքական զրուցակիցների հետ։

«Մասնակիցներ դրական գնահատեցին այն փաստը, որ միջազգային համայնքը հետզհետէ եկել է ընդունելու, թէ չճանաչուած պետութիւնում ապրելը այդ միաւորի քաղաքացիներին չի զրկում մարդու հիմնական իրաւունքներից եւ ազատութիւններից, ինչպէս նաեւ միջազգայնօրէն ճանաչուած քաղաքացիական եւ քաղաքական իրաւունքներից, ներառեալ՝ «ուղղակի կամ ազատօրէն ընտրուած ներկայացուցիչներ միջոցով հասարակական կեանքը վարելու մասնակցութեան» իրաւունքից, ինչպէս ամրագրուած է ՄԱԿ-ի Ընդհանուր ժողովի 2200A (XXI) բանաձեւով որդեգրուած Քաղաքացիական եւ քաղաքական իրաւունքների միջազգային պայմանագրի 25a յօդուածում։ Այս տեսանկիւնից պէտք է դիտարկել Լեռնային Ղարաբաղում կայացած վերջին ընտրութիւնները։

«Յանձնախումբը իր երախտագիրութիւնն է յայտնում Մոլդովայի դեմոկրատական կուսակցութեանը՝ հիւրընկալելու համար ժողովը եւ գնահատում է նրա աւանդը Մոլդովայի հանրապետութեան քաղաքական կեանքին եւ զարգացմանը, երբ ամուր կերպով հաստատում է ընկերվար ժողովրդավարութիւնն ու ամրացնում բազմակուսակցական ժողովրդավարութիւնը երկրում։ Մերձդնեստրի հարցում, Յանձնախումբը պաշտպանում է ՄԴԿ-ի եւ Մոլդովայի կառավարութիւնում իր գործընկերների նախաձեռնութիւնները՝ աստիճանաբար քայլերի ձեռնարկում՝ տեւական լուծումի համար պայմաններ ստեղծելու նպատակով։