Այսօր ԱԺ ավանդական ճեպազրույցում ԱԺ ՀՅԴ խմբակության ղեկավար Արմեն Ռուստամյանը եւս մեկ անգամ հայտարարել է, որ ընտրություններից մի քանի օր առաջ ՀՅԴ-ն իր ընտրազանգվածին կոչ կանի, թե ինչպես քվեարկեն:
Նա ընդգծել է, որ շտապելու կարիք չկա, իրավիճակի փոփոխությունները, կարծես, անսպասելի են, եւ մինչեւ վերջին պահն էլ հայտնի չէ՝ ընտրությունները կհետաձգվե՞ն, թե՞ ոչ:
«Ես հակված եմ գնալ ընտրության եւ քվեաթերթիկի վրա գրել` բոլորին դեմ»,- հայտարարել ՀՅԴ պատգամավորը: Նա հիշեցրել է, որ առաջ, եթե քվեաթերթիկների հիսուն տոկոսի վրա կար բոլորին դեմ նշումը, ընտրություններն անվավեր էին ճանաչվում, եւ ափսոսանք հայտնել, որ ՀՅԴ-ի նախաձեռնությունը` որ օրենքի այդ կետը վերականգնվի, չանցավ:
«Ընտրություններին մեր չմասնակցելը պայքարի ձեւ է, պետք է մեր երկրում վերջ դնել նման ընտրությունների: ՀՀ-ում չկա ժողովրդավարական ընտրություն, ՀՀ-ում ժողովուրդը չի որոշում իր ապագան, եթե այդպես լիներ մեկ անգամ գոնե իշխանությունը կփոխվեր ընտրությունների միջոցով»,- ընդգծել է Ռուստամյանը:
Հարցին, թե կշնորհավորե՞ն Սերժ Սարգսյանին հաղթանակի կապակցությամբ, նա պատասխանել է. «Ինչը շնորհավորենք, երբ ընտրությունները շինծու են եւ ժողովրդավարական ընտրություններից այնքան հեռու են, որ իմաստ չունի խոսել հաղթողի եւ պարտվողների մասին»:
ՀՅԴ պատգամավորը նշել է, որ անհեթեթ իրավիճակ է ստեղծվել երկրում, երբ իշխանություններն իրենք իրենց համար ստեղծել են վիրտուալ իրականություն, ուր ամեն ինչ լավ է, իսկ ով դրա դեմ է խոսում՝ թշնամի է: Երկրում ստեղծված իրավիճակը, ըստ Ռուստամյանի, շատ ծանր է, ընտրական գործընթացներն էլ չեն արտացոլում մեր իրականությունը: Ըստ Ռուստամյանի՝ Սերժ Սարգսյանին կշնորհավորեն նրանք, ովքեր կհամարեն, որ նորմալ ընտրություններ են եղել:
ՀՅԴ պատգամավորը շեշտել է նաեւ, որ նախագահի որոշ թեկնածուներ, մասնակցելով ընտրություններին, թվում էր` պետք է քննադատեն իշխանությանը, բայց ավելի շատ անդրադառնում են նրանց, ովքեր չեն մասնակցում ընտրություններին: Ռուստամյանը վստահ է, որ այդ թեկնածուները մեծ ծառայություն են մատուցում իշխանություններին՝ ֆոն ստեղծելով, թե ընտրությունները մրցակցային են, ինչի մասին ամեն օր խոսում է նաեւ Սերժ Սարգսյանը:
«Այս ընտրությունները կանխորոշված են: Պարզ է, թե ով է հաղթելու, եւ ի՞նչ կապ ունի, թե մյուս թեկնածուները որ տեղերը կգրավեն, քանի տոկոս կհավաքեն, երկրի ապագայի վրա դա ազդելո՞ւ է: Կանխորոշված հաղթողը ինքնագոհ շարունակելու է ղեկավարել երկիրը», – հայտատարել է Արմեն Ռուստամյանը: