Երեւանի ավագանու ընտրություններին միասնական ցուցակով մասնակցելու օրակարգով ՀՅԴ Հայաստանի Գերագույն մարմնի շենքում երեկ եռակողմ հանդիպում է տեղի ունեցել ՀՅԴ, «Ժառանգություն» եւ ԲՀԿ ներկայացուցիչների միջեւ: ՀՅԴ-ից քննարկմանը մասնակցել են Արմեն Ռուստամյանը եւ Աղվան Վարդանյանը, «Ժառանգությունից»՝ Ռուբեն Հակոբյանը եւ Հովսեփ Խուրշուդյանը, ԲՀԿ-ից՝ Վարդան Օսկանյանը եւ Նաիրա Զոհրաբյանը:
Թեեւ ՀԱԿ կուսակցության ներկայացուցիչները եւս կողմ են միասնական ցուցակին, սակայն այդ կուսակցությունը չի մասնակցել հանդիպմանը: Տարածվել են լուրեր, թե ՀԱԿ-ի մասնակցությանը դեմ է եղել «Ժառանգությունը»:
«Ժառանգության» մամուլի քարտուղար Հովսեփ Խուրշուդյանը Yerkir.am-ի հետ զրույցում սխալ համարեց տեղեկությունները, թե իրենք դեմ են ՀԱԿ-ի մասնակցությանը: «Մենք չենք եղել այդ հանդիպման նախաձեռնողը, եւ չեմ կարող ասել, թե ինչու չի մասնակցել ՀԱԿ-ը: Մենք բաց ենք բոլոր ընդդիմադիր ուժերի հետ համագործակցության համար: Երկրորդ օրն է, որ նույն ՀԱԿ-ի հետ մենք բանակցությունների մեջ ենք համագործակցության ձեւաչափերի ճշգրտման օրակարգով»:
ՀՅԴ Հայաստանի Գերագույն մարմնի անդամ Աղվան Վարդանյանն էլ Yerkir.am-ի հետ զրույցում ասաց հետեւյալը. «Քանի որ նախնական կոնսուլտացիաներ կային հենց այդ երեք ուժերի միջեւ, այս փուլում այս ֆորմատով է հանդիպումը կայացել»: Աղվան Վարդանյանի խոսքերով` ՀԱԿ-ի պարագայում կա որոշակի անորոշություն. նախկինը գոյություն չունի, նորը դեռ կազմակերպված չէ: ՀԱԿ-ի հետ հանդիպում եւս կլինի` անհրաժեշտության դեպքում: «Մենք ասել ենք, որ կողմ ենք ոչ իշխանական ուժերի համախմբմանը», – ասաց Աղվան Վարդանյանը:
Ինչ վերաբերում է հանդիպման արդյունքներին, ՀՅԴ Հայաստանի Գերագույն մարմնի անդամը նշեց, որ վերջնական որոշում չի կայացվել, քննարկումները շարունակվելու են:
«ԵՐԿԻՐ»
Արմեն Ռուստամյան. ՀԱԿ կարգավիճակը դեռ հայտնի չէ
ԲՀԿ, «Ժառանգություն» եւ ՀՅԴ Դաշնակցություն կուսակցությունների ներկայացուցիչների հերթական հանդիպման ավարտից հետո ԲՀԿ ներկայացուցիչներ Վարդան Օսկանյանն ու Նաիրա Զորաբյանը հրաժարվեցին որեւէ մեկնաբանություն տալ՝ ասելով, որ քննարկումը դեռ չի ավարտվել:
«Հարցեր այսօր քննարկվել է, բայց կա պայմանավորվածություն` որեւէ մեկնաբանություն այս պահին չենք անում»,- ասաց Նաիրա Զորաբյանը:
ՀՅԴ ներկայացուցիչ Արմեն Ռոստոմյանն էլ «Ա1+»-ի հարցին, թե ինչու այսօրվա հանդիպմանը հրավիրված չէր ՀԱԿ-ըմ պատասխանեց. «Մենք նույն ձեւաչափով ենք շարունակում, ովքեր արդեն միացել էին քննարկմանը, արդեն այստեղ էին: ՀԱԿ-ը նախ ինքը պետք է որոշի, կա-չկա, մանակցում է, չի մասնակցում: ՀԱԿ-ը որպես այդպիսին հայտնի չի, թե ինչ կարգավիճակում է»:
Նա նաեւ հավելեց, որ ՀՅԴ տեսակետը մնում է նույնը` ոչ իշխանական ուժերի միավորը ամենաճիշտ լուծումն է: « Դաշնակցությունը պատրաստ է դրան, անգամ իր որոշակի հավակնությունները սահմանափակելու գնով»,-ավելացրեց Արմեն Ռուստամյանը:
«Ա1+»
9 Մարտ 2013
