Մեր նպատակը իսկապես ժողովրդին իշխանությունը վերադարձնելն է, հինգ տարի այսպես սպասել այլևս չի լինի: Քիչ առաջ Երևանի «Անի» հյուրանոցում հրավիրած ազգային օրակարգի ձևավորման միտված գագաթաժողովի ժամանակ այս մասին հայտարարեց ՀՅԴ խմբակցության պատգամավոր, նույն կուսակցության Երևանի ավագանիների ցուցակը գլխավորող Արմեն Ռուստամյանը․«Ո՞րն է այն ճանապարհը, որը մեզ ավելի շուտ կհասցնի նպատակին՝ երկու ճանապարհ ունենք․նախ պետք է վերացվի այն համակարգը, որը ծառայում է իշխող վարչակարգին:

Պետք է հրաժարվել այս քաղաքական համակարգից՝ նախագահական համակարգից, քայլ առ քայլ իշխանությունը մոտեցնել ժողովրդին, պետք է նաև նոր խորհրդարանական ընտրություններ պահանջենք և այն պետք է իշխանությունը ձևավորող միակ ատյանը լինի:

Մենք պետք է կարողանանք փաստել, որ կեղծիքների ծավալն ազդել է ընտրությունների արդյունքների վրա, եկեք նորից ընտրություններ անցկացնենք, կեղծված ընտրություններով երկիր չենք կառուցի»:

Ա․ Ռուստամյանը հավելեց՝ չի կարող կոռուպցիայի դեմ պայքարի ղեկավարը լինել վարչապետը, որովհետև հենց իրենք են կոռուպցիան․«Առջևում Երևանի ավագանու ընտրություններն են: Մենք գնացինք առանձին-առանձին, բայց վստահ եմ,որ եթե բոլորս աշխատենք մեկ տրամաբանության շրջանակներում, ապա հաղթանակած դուրս կգանք: Կարևոր չէ, ընդդիմության որ ուժն ինչքան ձայն կստանա, բայց միայն դրանից իշխանությունները սարսափում են:

Մենք հինգ տարի չենք սպասելու, պետք է փոխենք քաղաքապետին, ընդդիմադիր քաղաքապետը վստահեցնում եմ երկրում շատ բան կփոխվի: Մի բան է՝ առանց այդ լծակի, մեկ այլ բան՝ այդ լծակով: Եթե լինի ընդդիմադիր քաղաքապետ՝ մեզ երթեր, հանրահավաքներ չեն կարող արգելել: Այս քաղաքապետը պարզ է, որ արգելում է: Սա ընտրված քաղաքապետ չէ, սա նշանակված է, պետք չէ խաբել, որ Տարոն Մարգարյանին են ընտրում՝ ընտրում են նրան նշանակողին և ազատողին:

Արմեն Ռուստամյան. «Մենք պետք է 7 չափենք, մեկ կտրենք ու կտրելը պետք է անենք միասին»

Այսօր «Անի պլազա» հյուրանոցում այսօր հրավիրած հավաքի ժամանակ երբ Րաֆֆի Հովհաննիսյանը ներկայացրեց ՀՅԴ Հայաստանի Գերագույն մարմնի ներկայացուցիչ Արմեն Ռուստամյանին եւ խոսքը տվեց նրան՝ հավաքվածները միաբերան սկսեցին բղավել՝ «Մի-ա-ցում»:

Արմեն Ռուստամյանը ողջունեց Րաֆֆի Հովհաննիսյանի այսօրվա առաջարկները եւ նշեց, որ իսկապես պետք է վերաիմաստավորել, վերակազմավորել այս շարժումը, որպեսզի այն շարունակական լինի:

Նա նաեւ ասաց, որ իր նպատակն է հզորացնել այս շարժումը. «Առաջին իսկ պահից մենք տեսնում ենք, որ կան գուցե դժվարություններ: Պետք է այս սկզբունքի հիման վրա առաջ գնալ, ինչպես Րաֆֆին ասեց՝ մենք պետք է 7 չափենք, մեկ կտրենք, 7-ը չափելը պետք է անենք միասին, բայց կտրելն էլ պետք է անենք միասին»: Պարոն Ռուստամյանը նաեւ համաձայնեց այն մտքին, որ 5 տարի այսպես սպասել չի կարելի. «Մենք ունենք լիարժեք հնարավորություն, որը չօգտագործել չի կարելի: Պատճառների պատճառը պետք է վերացնել, որը պահպանում է իշխող վարչախմբին: Այս համակարգը պետք է փոխվի: Պետք է նախ հրաժարվել էս նախագահական համակարգից: Հրաժարվել, քայլ առ քայլ իշխանությունը մոտեցնել ժողովրդին: Իսկապես ես հավատում եմ, որ պետք է արագորեն անցնել խորհրդարանական համակարգին, լինի նոր խորհրդարան: Նոր խորհրդարանը իշխանությունը ձեւավորող միակ ատյանը լինի»:

Ըստ պարոն Ռուստամյանի՝ պետք է թույլ չտալ, որ ամեն անգամ իշխանությունները ասեն, թե այո, եղել են կեղծիքներ, բայց չեն ազդել ընտրությունների արդյունքների վրա. «Լավ էլ ազդել են»: Խոսելով ավագանու ընտրություններին առանձին-առանձին մասնակցելու մասին՝ պարոն Ռուստամյանն ասաց, որ դեռ ուշ չէ եւ ամեն ինչ կորած չէ. «Տարոն Մարգարյանին չեն ընտրում, նրան նշանակողին են ընտրում: Դոմինգոյի համերգում տեղի ունեցած ինչ-որ մի դրվագի համար չեն կարող քաղաքապետ փոխել, այդպիսի բան չի կարող լինել»:

Նա առաջարկեց փոխել այս վիճակը. «Մենք հնարամիտ ազգ ենք, ես հավատում եմ, որ եթե մենք խնդիր ենք դրել, վերեւից ներքեւ այդ շարժումը կկազմակերպվի, երբ անհրաժեշտ է՝ կազմակերպված երթեր, ցույցեր անել, պետք է թույլ չտալ, որ տարբեր սադրիչներ մտնեն եւ խանգարեն, նպատակից շեղեն: Այդ կառույցը պետք է օր առաջ կազմավորել՝ ղեկավար մարմնից մինչեւ մարզեր: Հայ մարդը, որ գալիս է հանրահավաքի, լսի ինչ պետք է անի իր թաղում: Այդպես է ստեղծվել Ղարաբաղյան շարժումը եւ այդպես էր ղեկավարվում: Հիմա ստեղենք Նոր Հայաստանի կոմիտեներ, անունը կարեւոր չէ: Պետք է վերականգնենք ժողովրդի իշխանությունը Հայաստանում»:

Հռիփսիմե ՋԵԲԵՋՅԱՆ
aravot.am