ՀՀՇ-ական իշխանությինը վերածուեց աւտորիտար վարչակարգի

Արցախեան ազատագրական պայքարի ալիքի վրայ Հայաստանում իշխանութեան եկած քաղաքական ուժը շատ շուտով սկսեց նահանջել իր ազգային, ժողովրդավարական սկզբունքներից՝ աստիճանաբար վերածուելով աւտորիտար վարչակարգի:

Տնտեսական, ընկերային սխալ քաղաքականութեան, խմբակային շահադիտութեամբ իրականացուած սեփականաշնորհման հետեւանքով փլուզուեց եւ փոշիացուեց երկրի տնտեսական ներուժը, ինչը յանգեցրեց ընկերային բեւեռացման, ժողովրդի ճնշող մեծամասնութիւնը յայտնուեց աղքատութեան մէջ, հարիւր հազարաւորները ստիպուած եղան հեռանալ հայրենիքից:

Ամէն գնով սեփական իշխանութիւնը պահպանելու ինքնանպատակ ձգտումը ի վերջոյ մղեց նաեւ քաղաքական բռնութիւնների, արգելուեց Հ.Յ.Դ. գործունէութիւնը, հալածանքների ենթարկուեցին քաղաքական բազմաթիւ գործիչներ, փակուեցին մի շարք պարբերականներ, անցկացուեցին խորհրդարանական եւ նախագահական կեղծ ընտրութիւններ եւ Սահմանադրութեան անօրէն հանրաքուէ:
Հայաստանի կառավարիչները բացառեցին ազգային գաղափարախօսութիւնը, ետ կանգնելով հայ ժողովրդի ազգային-քաղաքական հիմնախնդիրներից, որպէս տրամաբանական արդիւնք՝ Արցախեան հարցում հանդէս գալով պարտուողական դիրքերից:
Այս քաղաքականութեան խոր ճգնաժամը յանգեցրեց Լեւոն Տէր-Պետրոսեանի հրաժարականին:
Նախագահական ընտրութիւններում Հ.Յ.Դաշնակցութիւնը պաշտպանեց Ռոբերտ Քոչարեանի թեկնածութիւնը՝ յենուելով գաղափարական նոյնութիւնների, Արցախեան խնդրում յստակ եւ ազգային դիրքորոշումներով առաջնորդուելու, նախընտրական ծրագրում տնտեսական աճի, աշխատատեղերի ստեղծման, ընկերային եւ քաղաքական բեւեռացման վերացման, երկրի թալանի եւ անօրինականութեան հեղինակներին պատասխանատուութեան կանչելու սկզբունքների վրայ:
Հ.Յ.Դ. Հայաստանի Գերագոյն Ժողովը՝ արձանագրելով, որ թէեւ կարճ ժամանակում քաղաքական եւ հասարակական կեանքի շատ բնագաւառներում վերափոխումների միտումը ակնյայտ է, այսուհանդերձ փաստում է.

– Շարունակում է գործել 1995 թուականին կեղծիքների հիմքի վրայ ստեղծուած Ազգային Ժողովը, որը խոչընդոտող դեր է խաղում ժողովրդավարացման ընթացքի նկատմամբ,
– Ընդհանուր առմամբ պահպանւում է նախկին կադրային սխալ քաղաքականութեան սկզբունքը,
– Անցած ամիսներին պահպանուել է գործազրկութեան ծայրայեղ ծանր պատկերը, ընկերային բեւեռացումը,
– Գիւղացիութիւնը դեռեւս զրկուած է գոյութիւն ունեցող տեխնիկական, նիւթական, ֆինանսական ներուժից ամբողջապէս օգտուելու հնարաւորութիւնից,
– Աղէտի գօտու հարցում դրսեւորուող դրական միտումների հետ մէկտեղ, շարունակում են սուր կարիքի մէջ մնալ անօթեւան տասնեակ հազարաւոր մարդիկ,
– Որեւէ էական տեղաշարժ չի նկատւում հասարակութեան անապահով խաւերի նուազագոյն կենսամակարդակը բարձրացնելու ուղղութեամբ,
– Առողջապահութեան ոլորտում շարունակում է տիրել նախկին անմխիթար վիճակը: Բնակչութեան մեծամասնութիւնը զրկուած է բժշկական օգնութիւն ստանալու հնարաւորութիւնից:

Ելնելով յիշեալ հաստատումներից Հ.Յ.Դ. Հայաստանի Գերագոյն Ժողովը յայտարարում է.

Հայ Յեղափոխական Դաշնակցութիւնը շարունակելու է հետապնդել հասարակական կեանքի բոլոր ոլորտների կառուցուածքային արմատական փոփոխութիւնների իրականացման խնդիրը:
Պաշտպանելով ՀՀ նախագահի ազգանպաստ ծրագրերը՝ Հ.Յ.Դ. անկաշկանդօրէն եւ հետեւողականօրէն կը շարունակի պահանջել դրանց կենսագործումը:
Հ.Յ. Դաշնակցութիւնը պաշտպանելով ժողովրդի շահերը՝ հանդէս կը գայ արատաւորուած համակարգի դէմ, կը հակազդի ապազգային, հակաժողովրդական, անօրինական երեւոյթներին:
Հ.Յ. Դաշնակցութիւնը կը հետապնդի երկրում օրինականութեան լիակատար հաստատման, առկայ ընկերային-տնտեսական իրավիճակի մեղաւորներին իրաւական պատասխանատուութեան ենթարկելու հարցերը:

Հ.Յ.Դ. Հայաստանի Գ. Գերագոյն Ժողովի դիւան
Երեւան