ՀՅԴ խմբակցության ղեկավար Արմեն Ռուստամյանն այսօր Վերահսկիչ պալատի նախագահ Իշխան Զաքարյանին հարց ուղղեց՝ կապված նրա ներկայացրած 2012-ի հաշվետվության հետ:

Նրա խոսքերով՝ «Հովիկ Աբրահամյանը մատը դրեց զարկերակի վրա, որի մասին մենք բոլորս ուզում էինք խոսել: Շատ լավ է, որ ԱԺ նախագահն ինքն է մտահոգություն հայտնում: Մենք մի աշխատաոճ ենք որդեգրել, որ բացարձակապես անհայտ է, թե հետո ուր ենք գնում: Լավ, բացահայտվեց, հետո ի՞նչ, ո՞ւր ենք այսպես ուզում գնալ հասնել: Վարչապետը հայտարարեց, որ օնլայն ռեժիմով կարող ենք տեսնել, թե անգամ մի գրիչը ինչ գնով ենք առնում, ումից ենք առնում եւ այլն: Բայց ձեր եզրակացությունը, որ կարդում ենք, դուրս է գալիս, որ մենք օնլայն ռեժիմով մեծ հանցանքների մասին տեղեկացնում ենք հասարակությանը: Լավ, եթե սենց պիտի աշխատենք, դուք էլ օնլայն ռեժիմով պատասխանեք այդ բոլոր ասածներին ու սենց մնա՞ վիրտուալ տարածքում: ՎՊ-ի գործառույթն այն է, որ մենք գործիք ունենք վերահսկելու բյուջեի ծախսերը: Դուք ձեր հաշտվետվության ոճը փոխեք, անդրադարձեք նախորդ հարցերի հետեւանքներին: Ասեք՝ պատասխանը ձեզ գոհացրե՞ց, թե՞ չէ: Եթե այսպիսի հետեւողականությամբ չվերահսկենք, մենք իմաստ չենք տեսնում այս հաշվետվությունների մեջ: Մենք մեր ոճով ստիպենք, որ իրենք անդրադառնան այս բաձրացված հարցերին, դրա արդյունքները տեսնենք»:

Իշխան Զաքարյանն ընդունեց Արմեն Ռուստամյանի կարծիքը: Նա մտահոգություն հայտնեց հայտնաբերված խախտումների ծավալի հետ կապված՝ «701 միլիարդի խախտումներ, որոնք վերաբերում են գնումների, շինարարության ոլորտին, մնացածը 301 միլիարդը թոշակ-նպաստ համակարգն է: Այս դաշտն անցանք: Ես լիովին կիսում եմ ձեր առաջարկը»:

Հռիփսիմե ՋԵԲԵՋՅԱՆ
aravot.am
13/06/2013