«Ովքեր են Փայլակ Հայրապետյանի ունեզրկման հեղինակները. օֆշորային եռյակը» հոդվածում «Հետքը» տեղեկացրել էր, որ Կիպրոսում գրանցված «WLISPERA HOLDINGS LIMITED» օֆշորային ընկերության բաժնետերերից մեկը ՀՀ վարչապետ Տիգրան Սարգսյանն է: Ի պատասխան՝ վարչապետը դիմել է ՀՀ գլխավոր դատախազություն` խնդրելով պարզել, թե ով է գրանցել «WLISPERA HOLDINGS LIMITED»-ը, եւ ինչպես է իր անունը հայտնվել ընկերության բաժնետերերի ցանկում:

ԱԺ-ում Yerkir.am-ի հետ զրույցում ԱԺ ՀՅԴ խմբակցության պատգամավոր Վահան Հովհաննիսյանը նշեց. «Բայց ինչո՞ւ է վարչապետը մեր դատախազություն դիմել, թող Կիպրոսի դատախազություն դիմեր»:

Պատգամավորը համոզված է, որ եթե անգամ պարզվի Տիգրան Սարգսյանի մեղավորությունը, ոչ մի բան էլ տեղի չի ունենա: ՀՀ-ում իրավական համակարգը, ըստ նրա, խայտառակ թերի է, եւ դա չի բացատրվում օրենքների թերիությամբ, թեեւ սուտ է, որ մեր օրենքները լավն են, բայց չեն կիրառվում: Ըստ Հովհաննիսյանի` օրենքներն էլ են վատը, բայց նույնիսկ դրանք չեն կիրառվում ամբողջությամբ: «Որեւէ պետական պաշտոնյայի նկատմամբ, այդ թվում` նաեւ վարչապետի, նման կասկածը միշտ կմնա կասկած, քանի ապացուցական բազային թույլ չեն տա կուտակել կրիտիկական մասսա»,- նշեց պատգամավորը:

Սերժ Սարգսյանը վարչապետ Տիգրան Սարգսյանին, Հովհաննիսյանի կարծիքով, «պահում է», որովհետեւ կա քաղաքական հաշվարկ, սակայն այդ հաշվարկը սխալ է:

12 տարի առաջ նորմալ իրավաբան տղա էիր

ԱԺ-ում 2012թ. բյուջեի կատարողականի քննարկումների ժամանակ, լրագրողների խնդրանքով, արդարադատության նախարար Հրայր Թովմասյանն անդրադարձել էր ՀՅԴ խմբակցության պատգամավոր Վահան Հովհաննիսյանի հայտնի հայտարարությանը եւ «ցավ հայտնել, որ ԱԺ-ում ինտելեկտուալ պատգամավորներից մեկը ուժի դիրքերից է խոսում»: «Դեռ տասներկու տարի առաջ, երբ ոչ ոք ինձ չէր սատարում, ես իմ ընտրատարածքում այնքան ձայն եմ հավաքել, որ ինքը ընդհանրապես որեւէ ընտրատարածքում այդքան ձայն երբեւէ հավաքե՞լ է, թե՞ ոչ»,- հայտարարել էր Հրայր Թովմասյանը:

Այսօր ԱԺ-ում Վահան Հովհաննիսյանն անդրադարձավ Հրայր Թովմասյանի այդ հայտարարությանը: «Բա Հանրապետական չէիր տասներկու տարի առաջ, կհավաքեիր… Նորմալ իրավաբան տղա էիր, գնացել էիր, ինքնուրույն քո ուժերով մասնակցում էիր, իհարկե, կարող է եւ հավաքեիր: Այն ժամանակ քեզ չէին ծեծի դալանում: Իսկ հիմա տեսնեմ` եթե նախագահի ամբողջ ուժը, ամբողջ պետական ապարատը ձեզ չպաշտպանի, տեսնեմ` ո՞նց եք ձայն հավաքելու»,- նշեց Հովհաննիսյանը:

Դիտարկմանը, թե արդարադատության նախարարը նաեւ ցավ է հայտնել, որ ԱԺ ինտելեկտուալ պատգամավորներից մեկը ուժի դիրքերից է խոսում, ՀՅԴ-ական պատգամավորն ընդգծեց, որ եթե Թովմասյանը ենթադրում է, որ իր այդ ելույթը ուժի դիրքերից խոսել էր, դա նախարարի մասին բավականին բան է ասում: «Ուժի դիրքերից խոսում են հենց իրենք: Օրինակ` Հրայր Թովմասյանը, երբ իրեն բնորոշ հանգիստ, հանդարտ ոճով, որը շատ լավ ոճ է երեւի Շվեյցարիայում, ասում է` դե, նորմալ ա ամեն ինչ, բոլոր տեղերում էլ այսպես ա, ամեն տեղ էլ ընդդիմությունն ասում է` այլեւս այսպես հնարավոր չէ, ամեն տեղ էլ այսպես ա… Եղբա’յր, ամեն տեղ էլ այդպես է, այո’, Գերմանիայում էլ, Ֆանսիայում էլ, բայց Գերմանիայից, Ֆրանսիայից չի փախչում ժողովուրդը, քեզնից փախչում է: Տարբերությունն այդքան է ընդամենը: Դրա համար մենք բորբոքվում ենք ու ստիպված են խոսել, իրենց լեզվով ասած «ուժի դիրքերից»,-հայտարարեց Հովհաննիսյանը:

10/03/2013
yerkir.am