Հարցազրույց ՀՅԴ ԳՄ ներկայացուցիչ Արմեն Ռուստամյանի հետ

-Ըստ parliamentmonitoring.am կայքի տվյալների` խորհրդարանի ամենաշատ «ձեռնպահ» քվեարկած պատգամավորների տասնյակում 5-ը դաշնակցական են. ոչ «դեմ», ոչ «կողմ» կեցվածքը խմբակցության կեցվածքն է ընդհանրապե՞ս:

-Մենք ձեռնպահ քվեարկում ենք այն դեպքում, երբ տվյալ օրենքի բացասական ու դրական հետևանքները միմյանց հավասարակշռում են, ու չենք ուզում չտեսնելու տալ այդ դրականը: Մենք ելույթներով էլ մեր «ձեռնպահ» քվեարկությունը միշտ հիմնավորել ենք: Ինքնանպատակ «դեմ» քվեարկելը, ինչ է թե ընդդիմություն ենք, մեզ համար անընդունելի է, չնայած եղել է դեպք, որ խմբակցություններից մեկը դեմ էր քվեարկել անգամ օզոնային շերտի պահպանության հարցին, որովհետև ընդդիմություն էր: Իսկ «կողմ» մենք քվեարկում ենք այն դեպքում, երբ դա բխում է մեր սկզբունքներից, ու տեսնում ենք, որ գոնե կես քայլ է արվում դեպի մեր ծրագրային նպատակները:

-Նախորդ նստաշրջանի ընթացքում ոչ իշխանական ուժերի օրենսդրական նախաձեռնություններից ընդունվել է միայն ՀՅԴ-ի 2 նախագիծ: Գիտենք, որ որևէ նախագծի ընդունում խորհրդարանում պայմանավորված է մեծամասնության դիրքրորոշմամբ. ինչո՞վ է բացատրվում մեծամասնության այս բարեհաճ վերաբերմունքը ՀՅԴ-ի նկատմամբ:

-Նախ ասեմ, որ բացի Ձեր նշած 2 ընդունված նախաձեռնություններից, ընդհանուր առմամբ մենք խորհրդարանում իրականացրել ենք մեր ծրագրային 7 կետերից բխող գործողություններ, ներկայացրել ենք մեր գլոբալ մոտեցումները կառավարության ծրագրի հաստատման ու ՎՊ հաշվետվության ժամանակ: Աշխատատեղերի ստեղծում, արժանապատիվ վարձատրություն, հակակոռուպցիոն պայքարում ընդդիմության մասնակցություն. կառավարությունը այս կետերը մեզանից է վերցրել: Մենք նաև առանցքային մասնակցություն ենք ունեցել «Դեպի ծով ելք չունեցող երկրների տարանցիկ առևտրի տարանցիկ առևտրի մասին» համաձայնագրի ընդունման հարցում: :

Իսկ այն, որ ընդդիմությունից միայն մեր նախագծերն են ընդունվել, մեզ առանձնապես չի ուրախացնում: Դրա պատճառը, սակայն, պարզ է. Դաշնակցությունը ունի անցած ճանապարհ, պատմություն, կենսագրություն, փորձառություն, թե ընդդիմության, թե իշխանության հետ աշխատելու փորձ: Մենք վեր ենք հանում հարցեր, որոնց, ուզեն թե չուզեն, անդրադառնալու են, մինչդեռ մյուս ուժերը մեր փորձառոթւյունը չունեն: Բազմաթիվ են, սակայն, օրինակները, երբ մեծամասնությունը մերժել է մեր առաջարկությունը, ու հետո նույն բանը, մեկ ստորակետի փոփոխությամբ, ինքն է ներկայացրել, արդեն որպես պլագեատ: Սա միայն նրա համար, որ չգրվի, թե ՀՅԴ-ի առաջարկությունն է: Մենք խանդի տեսարաններ չենք սարքում, կարևորը, որ առաջարկը ընդունվի: Իրականում, մեծամասնությունը ինչ-որ ժեստ չի անում Դաշնակցությանը, ուղղակի գիտի, որ մեզ մշտապես մերժելով՝ ավելի խոցելի վիճակում է դնում իրեն:

-Անցած մեկ տարվա ընթացքում ընդդիմությունը մի քանի անգամ հանդես եկավ միասնական քվեարկությամբ, ինչը, սակայն, շոշափելի արդյունք չտվեց. կարո՞ղ ենք ասել, որ ոչ իշխանական ուժերի միասնական գործողությունները խորհրդարանում դատապարտված են ձախողման:

-Այս գումարման Ազգային ժողովում մենք ունենք մի վիճակ, որը ոչ իշխանական ուժերին թույլ է տալիս միավորվելու միջոցով մի քիչ մեծացնել ճնշումը իշխանության վրա: Այդ միավորումը պետք է լինում որոշակի շեմեր հաղթահարելու համար: Նվազագույնը շեմը 1/5-րդն է` 27 պատգամավոր` ՍԴ դիմելու համար: Սա ընդդիմությունը ունի: Մյուսը` 1/3-ն է` արտահերթի նախաձեռնությամբ հանդես գալու համար. սա էլ կա: Բայց մի շեմ էլ մեծամասնության համար կա. որոշ հարցեր ընդունելու համար նրան պետք է 3/5-րդի կողմ քվեարկությունը, այսինքն, 79 կողմ ձայն, ինչը ՀՀԿ-ն և ՕԵԿ-ը միասին չունեն: Դրա կարիքը մեծամասնությունը զգալու է աշնանանյին նստաշրջանում` գլխավոր դատախազի, ՎՊ նախագահի ընտրությունների ժամանակ: Իրենք ստիպված են լինելու հաշվի նստել փոքրամասնության հետ, փոքրամասնությունն էլ պետք է օգտվի ԱԺ կանոնակարգի` իրեն տրված հնարավորություններից:

-Խորհրդարանական փոքրամասնությունը կազմված է ընդդիմությունից և ոչ իշխանական ԲՀԿ-ից. Դուք վստա՞հ եք, որ հարկ եղած դեպքում փոքրամասնությունն իր քվեարկությամբ մեծամասնությանը չի օգնի:

-Հենց այսպիսի վիճակներում են ուժերը դրսևորվում: Մեր մասին ես կարող եմ ասել, որ այս իմաստով խնդիր չունենք: Մեր խմբակցության բոլոր դիրքրորոշումները 100%-ով նույնն են բոլոր անդամների համար: Մեզ հետ պետք է աշխատել որպես քաղաքական ուժի հետ, ընդունեն մեր մոտեցումները կամ չընդունեն, բայց աշխատել մեր առանձին պատգամավորների հետ, դա անհնար է, մինչդեռ կան խմբակցություններ, որոնք հաճախ միասնական քվեարկություններ չեն ունենում: Աշնանը կտեսնենք, թե ինչ կլինի:

-Ասացիք, որ ընդդիմությունը ունի կանոնակարգով իրեն տրված հնարավորություններ, մինչդեռ մեծամասնությունն էլ ունի այդպիսի հնարավորություններ. օրինակ, բացակայեցիք ԱԺ հատուկ նիստից, աշխատավարձից պահումներ արեցին:

-Դա, իհարկե, օրենքի խախտում էր: Մենք քաղաքական դիրքորոշում ենք ունեցել, որքան ուզում են պահեն, եթե ունենք քաղաքական դիրքորոշում, չենք նայելու` աշխատավարձից պահում կանեն թե ոչ: Բայց այն, ինչ կատարվեց, եթե չասեմ էթիկայի, ապա պրակտիկայի խախտում էր հաստատ: Ընդդիմության արտահերթին իրենք չմասնակցեցին ու պատճառաբանեցին, թե քաղաքական դիրքրորոշում է ու հարգելի է, որովհետև դրա մասին նախապես տեղեկացրել էին ԱԺ նախագահին: Մինչդեռ նախագահի երդմնակալության հատուկ նիստին չմասնակցելու վերաբերյալ մեր քաղաքական դիրքորոշումը մենք ի լուր աշխարհի էինք հայտնել, հատուկ հայտարարություն էինք արել, գրավոր փաստաթուղթ տարածել, բայց պարզվեց, որ մեր բացակայությունը, միևնույն է, անհարգելի է: Իրենցը հարգելի էր, մերը` անհարգելի: Սա երկակի ստանդարտների մասին է խոսում:

-ՀՅԴ Բյուրոյի ներկայացուցիչ Հրանտ Մարգարյանը «Ազատություն» ռադիոկայանին ասել էր, թե վարչապետը պատերազմ է հայտարարել ՀՅԴ-ին: Այդ պատերազմը շարունակվո՞ւմ է:

-Բայց հետո էլ վարչապետի մամուլի ծառայությունից պարզաբանել էին, թե այդպիսի պատերազմ չկա:

-Այսինքն, վե՞րջ վարչապետ-ՀՅԴ հակամարտությանը:

-Պատերազմի կամ հակամարտության խնդիր չկա: Մենք ունենք քաղաքական հակասություններ, գործում ենք տարբեր ճամբարներում, և մեր ընդդիմադիր լինելը արձանագրվել է տարբեր փաստերով: Ամենահետևողականը մենք ենք քննադատել այս կառավությանը, նաև նախորդին, որը սրանից գրեթե չի տարբերվում: Մենք 2 անգամ անվստահություն ենք հայտնել այս վարչապետի գլխավորած կառավարությանը, մեր հակասությունը երկար պատմություն ունի: Ինչ-որ տեղ վարչապետն ու իր ներկայացուցիչները փորձել են այլ ձևերով ազդել Դաշնակցության վրա, ոչ քաղաքական մեթոդներով, ինչը մեզ ավելի է մոբլիզիացնում. որքան շատ են ճնշում Դաշնակցությանը, այնքան ավելի ենք ամրանում:

-Այսինքն, հիմա Դաշնակցությանը ճնշո՞ւմ են:

Միշտ են այդ ճնշումները եղել` իշխանությունների կողմից, զանազան այլ մրցակից քաղաքական ուժերի կողմից: Դա նորմալ ենք ընդունում, ու մեր նյարդերը տեղի չեն տալիս, մինչդեռ իրենք համ մեծամասնություն են, համ էլ ընդդիմոթւյուն-իշխանություն մրցապայքարին, առճակատումներին չեն դիմանում: Վերջին շրջանում, մանավանդ, եղան վարչապետի հետ կապված պրոբլեմներ, ու ես հասկանում եմ, որ զուտ մարդկային առումով մարդը կարող է նյարդային պոռթկում ունենալ: Ամեն դեպքում, մեր վերաբերմունքը կառավարության ու նրա քաղաքական գծի նկատմամբ չի փոխվել: Մենք պայքարել ու պայքարելու ենք բացառապես քաղաքական եղանակներով, բացահայտ, թափանցիկ և ոչ թե ետնաբեմում ու գաղտնի: Մենք մեր ասած ամեն մի խոսքին տեր ենք:

20.07.2013
parliamentmonitoring.am