Շարունակելով իր աւանդութիւնը, մեծարելու այն քաղաքական գործիչներուն, որոնք տարիներու ընթացքին մեծ ներդրում ունեցած են և մինչև այսօր սատար կը հանդիսանան Հայ Ազգի իրաւունքներուն և անոր արդար դատին, Ուրուկուայի Հ.Յ.Դ. Հայ Դատի Յանձնախումբը Չորեքշաբթի 23 Հոկտեմբեր 2013ի երեկոյեան ժամը 7ին, «Գրիսթալ Փալաս» պանդոկի հանդիսասրահին մէջ, ներկայութեամբ երկրի քաղաքական ոլորտը ներկայացնող կարևոր անձնաւորութիւններու, որոնց կարգին՝ Ուրուկուայի փոխնախագահ Տանիլօ Ասթորի, Արտաքին Գործոց նախարար տոքթ. Լուիս Ալմակրօ, Ծերակոյտի անդամ և երկրի առաջին տիկին՝ Լուսիա Թօփօլանսքի, Զբօսաշրջիկութեան և Մարմնամարզի նախարար Լիլիան Քէշիշեանի, Հ.Յ.Դ. Բիւրոյի անդամ և Ընկերվար Միջազգայնականի փոխ-նախագահ ընկ. Մարիօ Նալպանտեան, Հայաստանի Հանրապետութեան պատւոյ հիւպատոս Ռուբէն Աբրահամեան, Հայց. Առաք. Եկեղեցւոյ հոգևոր Առաջնորդ Գերշ. Տ. Յակոբ Արք. Գըլընճեան, տասնեակ պատգամաւորներ, հայ միութիւններու ներկայացուցիչներ և այլ հրաւիրեալներ։
Հայ Դատի պաշտպան մեծարուած երեք քաղաքական գործիչներն էին Ծերակոյտի անդամ Ռաֆայէլ Միքէլինի, պատգամաւոր Ռուբէն Մարթինէս Ուէլմօ և Խորհրդարանի նախկին նախագահ, ու այժմ պատգամաւոր, Խորխէ Օռիքօ։
Բացման խօսքով հանդէս եկաւ Հ.Յ.Դ. Հայ Դատի ՅաՆձնախումբի անդամ ընկ.հի Տիանա Իթութմազեան, նշելով թէ մեծարանքի արժանացած քաղաքական այս դէմքերը իրենց քաջարի աշխատանքով, նուիրուածութեամբ և դերակատարութեամբ, մաս կը կազմեն մեր նորագոյն պատմութեան, իբրև հայ ժողովուրդի շատ մօտ բարեկամներ։
Առաջինը, որուն պատիւը ունեցաւ ներկայացնելու ընկ. Մարիօ Նալպանտեանը, ծերակուտական Ռաֆաէլ Միքէլինին էր։ Ընկ. Նալպանտեան Հայ Դատի այս մեծ պաշտպանին նկատեց իբրև իր սկզբունքներուն հետևողական, երկխօսութեան ատակ անձնաւորութիւն մը, որ մղիչ ուժը հանդիսացաւ ՓԱՐԼԱՍՈՒՐի (Հարաւային Ամերիկայի երկիրներու միացեալ Խորհրդարան) մէջ Հայոց Ցեղասպանութեան ճանաչման, ինչպէս նաև պետական մակարթակով Հայոց Ցեղասպանութեան թանգարան մը ստեղծելու գլխաւոր դերակատարը։
Երկրիս առաջին տիկին և Ծերակոյտի անդամ Լուսիա Թօփօլանսքի, ներկայացնելով պատգամաւոր Ռուբէն Մարթինէս Ուէլմոն, նկատել տուաւ որ Հայ Դատի պաշտպան մը ըլլալէ աւելի, ան Հայ Դատը ուսումնասիրող քաղաքական գործիչ մըն է և հայկական հարցով բաւական պաշար հաւաքած է և առաջ կ՜երթայ։ Ինչ կը վերաբերի մեծարեալներուն, Թօփօլանսքի հաստատեց թէ այս երեք ընկերներուն մէջ հայերը ունին հզօր պաշտպաները իրենց դատին։
Ուրուկուայի փոխ-նախագահ Տանիլօ Ասթօրի, Խորհրդարանի նախկին նախագահ և այժմ պատգամաւոր Խօրխէ Օռիքօն ներկայացնելէ առաջ ըսաւ թէ Ուրուկուայը, ըլլայ կառավարութիւն թէ ժողովուրդ, մեծ սէր կը տածէ հանդէպ հայ ժողովուրդին, իսկ անոր անձին մէջ հայութիւնը ունի ոչ միայն իր դատի զօրակից մը, այլև մարդու իրաւունքի և ժողովուրդներու ինքնորոշման հզօր պաշտպան մը։
Երեք մեծարեալներն ալ յուզուած, իրենց հանդէպ ցուցադրուած Հ.Յ.Դ. Հայ Դատի Յանձնախումբի կողմէ եղած այդ յատուկ յարգանքին, շնորհակալական խօսքի ընթացքին կրկին հաստատեցին իրենց յանձնառութիւնը կարելի բոլոր միջոցներով՝ պաշտպան կանքնիլ հայ ժողովուրդի իրաւական դատին։
Վերջաւորութեան, Հ.Յ.Դ. Հայ Դատի Յանձնախումբի կողմէ մեծարեալներուն յանձնուեցան խորհրդանշական յուշանուէրներ, պղինձի վրայ աշխատուած մեր ոսկեղնիկ ԱԲԳ-ը։
Հ.Յ.Դ. Հայ Դատի Յանձնախումբ
Մոնթէվիտէօ – Ուրուկուայ
