ՎՊ նախագահի թեկնածու Իշխան Զաքարյանի վերաբերյալ ԱԺ ՀՅԴ խմբակցության դիրքորոշումը հայտնելիս խմբակցության ղեկավար Արմեն Ռուստամյանը նախ նշեց, որ իրենց տեսակետը կապ չունի Իշխան Զաքարյան անձի հետ:

Ըստ նրա` Հայաստանում սահմանադրականությունը խախտված է, իսկ դրա մշտադիտարկումն իրականացնող Վերահսկիչ պալատը պետք է առաջադրեր հակակշիռների լուրջ տարրեր: Սակայն խախտված են այդ հարաբերությունները, Սահմանադրության մշտադիտարկումը խախտված է: «Վերահսկիչ պալատի անկախությունից էլ բան չմնաց: Մեր աչքերի առաջ տեղի ունեցավ այդ անկախության չեզոքացումը»,- ասաց Արմեն Ռուստամյանը:

Նա կարծիք հայտնեց, որ նախագահի մոտ խորհրդակցությունից հետո մեղադրողները դարձան մեղադրվողներ: Վերահսկիչ պալատը սկսեց պաշտպանվել, քանի որ իրադրություն փոխվեց, ու ՎՊ-ն հայտնվեց լուրջ ճնշումների տակ: Ահա` ինչու, ըստ պատգամավորի, լուրջ բացահայտումներ ակնկալել ՎՊ-ից հնարավոր չէ: Արմեն Ռուստամյանը կարևորեց ընդդիմություն-իշխանություն միասնական օղակի գործունեությունը, որտեղ ընդդիմությունը իր գործառույթները պետք է իրականացներ: «ՎՊ նոր նախագահը չի շարունակելու այն, ինչ սկսել էր: Նա ենթակա է նշանակող-ազատողի կամքին: Նա չի կարող անկախ լինել»,- ասաց պատգամավորը:

Ռուստամյանը հայտարարեց, որ ՀՅԴ-ն անիմաստ է համարում մասնակցությունը քվեարկությանը, քանի որ չեն ակնկալում անկախություն ՎՊ նախագահից, նաեւ նշեց, որ Իշխան Զաքարյանի անձն այստեղ կապ չունի, պետական հիմքերի մասին է խոսք գնում:

yerkir.am