Ֆրանսիայի նախագահ Ֆրանսուա Օլանդի Թուրքիա կատարելիք այցի նախօրեին՝ հունվարի 25-ին եւ 26-ին, Ֆրանսիայի տարբեր քաղաքներում բողոքի ցույցեր են անցկացվել ընդդեմ Թուրքիայի՝ ԵՄ անդամակցության, որոնք կազմակերպել է Ֆրանսիայի հայկական կազմակերպությունների համակարգող խորհուրդը: Ցույցեր տեղի են ունեցել Փարիզում, Մարսելում, Լիոնում ու Մոնպելյեում:

Ինչպես գրում է «Nouvelles d’Arménie»-ն, Փարիզում հունվարի 26-ին՝ չնայած շատ վատ եղանակին, 400 ցուցարարներ հավաքվել էին Տրոկադերո հրապարակում, որպեսզի դատապարտեն Թուրքիայի հեռացումը ժողովրդավարության արժեքներից ու այդ երկրի կողմից Հայոց ցեղասպանության ժխտումը, ինչպես նաեւ հայտարարեն, որ Եվրոպայում նա տեղ չունի:

Ֆրանսիայի հայկական կազմակերպությունների համակարգող խորհրդի նախագահ Մուրադ Փափազյանը շնորհակալություն է հայտնել ասորի-քաղդեական, հունական, քրդական ու կիպրոսյան համայնքների ներկայացուցիչներին ակցաներին մասնակցելու համար ու դատապարտել է Թուրքիային լրագրողների ձերբակալությունների, մարդու, կանանց ու քրդերի իրավունքները ոտնահարելու, Կիպրոսի շրջափակման ու իր քաղաքացիներ կողմից Սիրիայում ահաբեկչության տարածման համար:

Սակայն նա նշել է նաեւ անհրաժեշտության մասին «աշխատել այն ուղղությամբ, որպեսզի Թուրքիան հայտնվի ճիշտ ուղու վրա», ընդգծել է նա, որ «Էրդողանի հետ դա հնարավոր չէ»՝ հավելելով, որ «Գյուլենի հետ նույնպես ավելի լավ չի լինելու»: «Եվրոպական միություն Թուրքիայի մուտ գործելու հարցը պետք է փոխգործակցի այդ պետության առաջընթացին: Սակայն քանի դեռ այդ պետությունը շարունակում է մնալ այս դիրքում, մենք պետք է մշտապես խոչընդոտենք Թուրքիայի անդամակցությանը ԵՄ»,- հայտարարել է Մուրադ Փափազյանը: Իսկ խորհրդի մեկ այլ համանախագահ Արա Թորանյանը նշել է. «Հարցն այժմ այն է, թե Եվրոպան վերջնական արդյունքում «կքեմալականացվի»՝ տրվելոց Անկարայի զանգվածային ազդեցությանը, թե Թուրքիան ներողություն կխնդրի ու կփոխհատուցի վնասը»:

Ֆրանսիայում քրդական միավորումների ֆեդերացիայի ներկայացուցիչ Լեոն Հայդարը դատապարտել է Թուրքիային հայերի եւ ասորի-քաղդեացիների ցեղասպանության համար, ինչպես նաեւ այն փաստի համար, որ այդ պետությունը 40 տարի ճնշում է քուրդ ժողովրդին Քրդստանում շարունակվող պատերազմով: Իսկ Ֆրանսիայի ասորի-քաղդեացիների միավորման նախագահ Դանիել Օգյուստը ցավով հայտնեց իր անվստահությունը Ֆրանսուա Օլանդին, ում գաղափարապես ինքը մոտ է, սակայն ով դեռ չի կատարել իր խոստումը ընդունել հայերի, ասորի – քաղդեացիների եւ հույների ցեղասպանության ժխտումը դատապարտող օրինագիծը:

«Nouvelles d’Arménie»-ի համաձայն մոտ 300 մարդ հունվարի 25-ին, չնայած ցրտին ու քամուն, հավաքվել էր Մարսելի Բուշ-դյու-Ռոն դեպարտամենտի վարչության շենքի առաջ: Բողոքի ցույցին ներկա էին հայկական եկեղեցու, կիպրոսյան, հունական, ասորի-քաղդեական կազմակերպությունների, պատգամավորներ Գի Տեսյեյի, Քրիստոֆ Մասսայի, Անրի Ժիբրաելի, տեղական իշխանության մարմինների ներկայացուցիչներ:

Պատգամավոր Վալերի Բուայեն դարձյալ հայտարարել է իր վճռական դիմակայության մասին ԵՄ Թուրքիայի մուտք գործելու վերաբերյալ, ինչպես նաեւ դատապարտել է Թուրքիայի կողմից ֆինանսավորվող կազմակերպություններին, ինչպես օրինակ Բոսֆորի ինստիտուտն է, Ֆրանսիայի ներքին գործերին միջամտելու համար: Պատգամավորներ Գի Տեսյեի անունից Ժան-Պիեր Բերբերյանը հաստատել է նրա կտրականապես դեմ լինելը Թուրքիայի մուտք գործելուն ԵՄ:

Ինչպես գրում է «Le Progrès»-ը, Լիոնում նույնպես բողոքի ակցիա է տեղի ունեցել: Շաբաթ առավոտյան 200 մարդ հավաքվել է Լիոնում քաղաքապետարանի շենքի առաջ: նախաձեռնության նպատակն էր հիշեցնել իրենց դիմակայության մասին «թուրքակայն պետության կողմից ժխտման հանդեմ, որը տեղ չունի Եվրոպայում», այն ժամանակ, երբ Ֆրանսուա Օլանդը պետական այց է կատարում Թուրքիա:

news.am