1938-ին Դերսիմում տեղի ունեցած կոտորածը եւս ցեղասպանություն էր:
Այս մասին այսօր Արեւմտահայերի հարցերի ուսումնասիրման կենտրոնում տեղի ունեցած քննարկման ժամանակ հայտարարել է Դերսիմահայերի փոխօգնության ու հավատքի միության նախագահ Միհրան Փրկիչ Գյուլթեկին:
Ըստ նրա՝ 1915-ի ցեղասպանության ու 1938-ին Դերսիմի կոտորածների հարցերը շատ կարեւոր են: «Կոտորածների միջոցով թուրքական ղեկավարները փորձել են լուծել միաժամանակ հայերի ու ալավիների հարցը, որոնք այն ժամանակ միավորվել էին: Պետությունը ժամանակին մեծ տարբերություն էր դնում ալվիների ու երկրում բնակվող մյուս մահմեդականների միջեւ: Դերսիմի ալավիներին «անհավատ» էին կոչում»,-ընդգծել է Գյուլթեքին:
Նա նշել է, որ դերսիմահայերը երկու անգամ են ապրել ոչնչացման վտանգը ու մինչ օրս վախենում են իրենց հայեր կոչել:
Նա նաեւ վրդովված նշել է, որ Թուրքիայի, այսպես կոչված, պատմաբանները գիտեն ամեն ինչ, բացի Դերսիմի իրադարձություններից: