Առավոտյան Թուրքիայի երեք սահմանային կետերից հարձակում էր տեղի ունեցել Սիրիայի Քեսաբ քաղաքի վրա: Տեղի բնակչությունը տեղափոխվել էր Լաթակիա և մոտակա Էքիզոլուք շրջանը: Անվտանգության նկատառումներով բնակիչներն տեղափոխվել են սիրիական Ծաղկաձորի շրջան:
Բերիո լուրերի ֆեյսբուքյան էջը նոր մանրամասներ է հաղորդում հարձակման վերաբերյալ։
Ըստ այդմ, ընդդիմադիր զինյալները Իդլիբից հեռանալուց հետո, ամիսներ շարունակ հավաքված են եղել այդ գոտում, Թուրքիայի կողմից երեք սահմանային կետերից հարձակվել են Քեսաբի վրա և սկսել են գնդակոծել բնակավայրերը։
Քեսաբցի շատ հայեր ավելի վաղ արդեն ապաստան էին գտել ապահով շրջաններում։ Սիրիական զորքը ևս ներկա է եղել այնտեղ, սակայն ոչ բավարար թվով, բայց այսօրվա հարձակումից հետո հավելյալ ջոկատներ են հասել օգնության։
Սիրիական օդուժը հարվածներ է հասցնում ընդդիմադիր խմբավորումների հավաքատեղերին։ Մյուս կողմից կառավարական զորքը փակել է Պասիթի ճանապարհը՝ բնակչության անվտանգությունն ապահովելու համար։
Բախումները շարունակվում են։
Հաղորդվում է, որ սիրիական զորքը շարունակում է հարվածներ հասցնել ընդդիմադիրների կարևոր կետերին ու պաշտպանում է ավանը՝ փորձելով հետ մղել ընդդիմադիրներին։
Քեսաբի շրջակայքում թուրքմենական գյուղեր կան։ Հաղորդվում է, որ բախումների հետևանքով զոհեր կան, սակայն նրանց ինքնությունը դեռևս պարզ չէ։