Օգոստոսի 28-ին կայանալիք Թուրքիայի նորընտիր նախագահի երդմնակալության արարողությանը Հայաստանի արտաքին գործերի նախարար Էդվարդ Նալբանդյանի մասնակցությունը մեկնաբանելու համար, ՀՅԴ Մամլո դիվանի լրագրողը դիմեց ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանին։
«Հաշվի առնելով հանդերձ մեր տարածաշրջանում եւ նրա շուրջ տեղի ունեցող զարգացումները, որոնք նոր իրավիճակներ են ստեղծում, ինչը չի կարելի անտեսել, այդուհանդերձ նախարար Նալբանդյանի մասնակցությունը Էրտողանի երդմնակալությանը չի կարելի ողջունել՝ ոչ միայն ընտրապայքարի ժամանակ Էրտողանի կատարած հակահայ հայտարարության պատճառով, այլ հատկապես եթե այդ մասնակցությունը նպատակ է հետապնդում վերակենդանացնել Հայաստան-Թուրքիա արձանագրությունները։ Էրտողանը ե՛ւ որպես մարդու, ե՛ւ որպես Թուրքիայի վարչապետի եւ որպես Թուրքիայի նախագահի թեկնածուի՝ թեկուզ ակամայից՝ ցույց է տվել Հայաստանի եւ հայության նկատմամբ իր անկեղծ զգացումներն ու մտածումները, ինչը ոչ մեկ ձեւով արժանի չի դարձնում նրա երդմնակալությանը՝ Հայաստանի Արտգործնախարարի մասնակցությունը։
Դաշնակցությունը բազմիցս կրկնել է, որ Հայաստանը պետք է իր ստորագրությունը հետ վերցնի այդ արձանագրություններից. փոխարենը՝ մեր իշխանությունները փորձում են վերակենդանացնել նրանք, հակառակ Թուրքիայի թշնամական պահուածքին»։
