Մարտ 2011-ին գործադրութեան դրուած «Արաբական գարուն»-ը, աշխարհաքաղաքական հսկայական ծրագրի մը մէկ նոր փուլն էր, որ ի գործ դրուած էր արեւմտեան քաղաքական ուժերու կողմէ, միջազգային նոր դրոյթ ստեղծելու նպատակով:
«Արաբական գարնան» այս նոր փուլին արդէն նախորդած էին տարբեր փուլեր, որոնք սկսան արեւմըտեան բանակներու Աֆղանիստան ներխուժումով, ապա Իրաքի գրաւումով, հասնելու համար «Արաբական գարնան»:
Ուժանիւթի աղբիւրներու տիրապետման, արտահանման եւ փոխադրութեան տնտեսական եւ քաղաքական հսկայական ծրագիր մըն է «Արաբական գարուն»-ը, որ կ՛ուրուագծուի մեր դիմաց: Երկարաժամկէտ ծրագիր մը, որ նկատի ունի ոչ թէ գալիք տասնամեակները, այլ յիսնամեակներն ու հարիւրամեակները:
Ազատութիւն, ժողովրդավարութիւն եւ այլ լոզունգներ, որոնք բարձրացան «Արաբական գարնան» առիթով, ոչ այլ ինչ էին եթէ ոչ գեղեցիկ եւ խաբուսիկ շղարշ, որուն ետին թաքնուած էին գերպետական ուժերու դաւադիր ծրագիրները:
Ինչ կը վերաբերի Միջին Արեւելքին, այս ծրագիրը ի միտի ունի շրջանին մէջ գոյութիւն ունեցող ազգային պետութիւնները վերածել կրօնական պետութիւններու, սահմաններու նոր դասաւորումներով, որոնք կը ծառայեն արեւմուտքի տընտեսական եւ քաղաքական շահերուն: Պէտք չէ մոռնալ նաեւ Իսրայէլի գոյութիւնը, որպէս հրէական պետութիւն արդարացնելու միտումը: Ենթադրեալ իսլամական կրօնական այս նոր պետութիւնները դաւանական մնայուն հակամարտութեան մէջ պիտի մնան շրջանին մէջ, այլ կրօնական պետութեան մը հետ, որ Իրանի Իսլամական Հանրապետութիւնն է:
Մէկ կողմէն Թուրքիան, միւս կողմէն Սուէտական Արապիան մըրցակցութեան մէջ են հովանաւորողի դեր կատարելու կրօնական այս նոր պետութիւններուն, որոնք սկսան ուրուագծուիլ շրջանին մէջ: Առաջինը Մուսուլման Եղբայրներու շունչով, իսկ երկրորդը` Ուահապիութեան երանգով: Ամէն պարագայի Իսլամական Շարիայի գաղափարախօսութիւնն է, որ տարբեր աղանդներու երանգաւորումով խորքը կը կազմէ այս նոր իսլամական պետութիւններու ընկերային յարաբերութիւններուն (կամ սահմանադրութեան):
Քրիստոնէութեան եւ փոքրամասնութիւններու ներկայութիւնը Միջին Արեւելքի մէջ խոչընդոտ մըն է այս ծրագրի իրագործման, որովհետեւ Արեւելքի քրիստոնէութիւնը միշտ ջահակիրը եւ մղիչ ուժը եղած է արաբ ազգայնական գաղափարախօսութեան, իսկ Արեւմուտքի կողմէն այժմու պահանջուածը կրօնական գաղափարախօսութիւնն է եւ ոչ թէ ազգայնականը:
Ակնթարթով մը տեսանք, թէ ինչպէս Իրաքը պարպուեցաւ քրիստոնեայ տարրէն: Հազարամեակներու արմատ ունեցող այս քրիստոնէութիւնը արմատախիլ եղաւ իր բնօրրանէն, իսկ Սուրիոյ եւ Լիբանանի քրիստոնէութիւնը ամէն օր կը նօսրանայ զգալով վտանգը, որ կը սպառնայ իրեն: Ջարդերը, տեղահանութիւնը, վայրագ եւ անմարդկային արարքները, որոնք ի գործ կը դրուին իսլամականներու կողմէ, որոնք կը վայելեն Արեւմուտքի թաքուն հովանաւորութիւնը, ի միտի ունին յառաջացնել ահի ու սարսափի մթնոլորտ մը, որ պիտի նպաստէ Արեւմուտքին` այս ծրագրի իրագործման արագացման:
Ճիշդ այս շրջագծին մէջ պէտք է դիտել Ֆրանսայի իշխանութիւններու այն յայտարարութիւնը, թէ` Ֆրանսան պատրաստ է իր հողերուն վրայ ընդունելու Իրաքի հալածուած քրիստոնէութիւնը, այսինքն` Արեւմուտքի ծրագիրը Արեւելքի քրիստոնէութիւնը Արեւելքի մէջ պահելը չէ, այլ անոնց տեղահանումը դէպի եւրոպական երկիրներ, ուր անոնք իսլամական տարրի աճին հետ կապուած մեծ հարցեր ունին: Արեւելքի քրիստոնեաներուն Եւրոպա տեղադրելը համեմատաբար պիտի նպաստէ եւրոպական երկիրներուն մէջ տեմոկրաֆիք փոփոխութեան մը, որուն կարիքը ունին անոնք:
Եւ այս փոթորիկին մէջ իրենց գոյատեւման համար կը պայքարին հայկական գաղութները, Միջին Արեւելքի եւ յատկապէս Սուրիոյ մէջ:
Ճիշդ է, որ Միջին Արեւելքի թէ աշխարհի մէջ քաղաքական այլ ուժեր ոգի ի բռին կը պայքարին Արեւմուտքի վերոյիշեալ ծրագրին դէմ, սակայն Արեւմուտքի յամառ յարատեւութիւնը իր ռազմավարութեան մէջ պիտի երկարաձգէ այս հակամարտութիւնը, որուն թոհուբոհին մէջ հայկական գաղութները կրնան չդիմանալ:
Հայ քաղաքական միտքը ցարդ չէ կրցած ընկալել աշխարհաքաղաքական այս մեծ իրադարձութիւնը, որ կը կատարուի Արեւելքի մէջ եւ կամ ընկալելով հանդերձ, խուսափած է պատասխանատուութիւն վերցնելէ եւ ճիշդ այս պատճառով հայութեան կողմէ ցարդ առնուած քայլերը ուղղուած Միջին Արեւելքի եւ Սուրիոյ հայութեան, համեստ եւ տարտամ քայլեր են, շատ հեռու տեղի ունեցող վիթխարի իրադարձութիւններու տարողութենէն:
Տեղ մը պատասխանատու եւ ղեկավար շրջանակներէ կը լսենք լաւատես եւ ոգեւորիչ արտայայտութիւններ: Ուրիշ տեղ մը յոռետես եւ այպանողական մտքեր, եւ դեռ չհաշուենք կարգ մը հեղինակաւոր պատասխանատուներու կողմէ ի նպաստ սուրիահայ գաղութին գործ ընելու խաբուսիկ եւ ուռճացած հաղորդակցութիւններն ու տեղեկագրերը:
Պահանջուածը Միջին Արեւելքի հայութեան հայրենադարձութեան ծրագիրն է, որ արդէն ազգովին ուշացած ենք մշակելէ եւ գործադրելէ, այս ուղղութեամբ քաղաքական կամքի բացակայութեան պատճառով:
Շատեր կրնան մտահոգութիւն ունենալ սուրիահայ գաղութը պարպուելուն եւ հոն գործող հաստատութիւններուն եւ կալուածներուն մասին: Կը կարծենք, թէ անպայման կը մնայ հայ գաղութ Սուրիոյ մէջ, այնքան որ ամուր են արմատները սուրիահայ, մանաւանդ հալէպահայ գաղութին, ինչպէս որ կայ այսօր հայ գաղութ Պոլսոյ մէջ, հակառակ գործուած ցեղասպանութեան եւ զանազան ճնշումներուն:
Միջին Արեւելքի հայութեան հայրենադարձութիւնը նոր որակ պիտի բերէ հայրենական կեանքին: Այս կազմակերպուած գաղութներու հայութիւնը պիտի նպաստէ հայրենիքի ընկերային, տնտեսական, քաղաքական յառաջխաղացքին: Հակառակ անհեռատես եւ նեղ շահերէ մղուած հնչող շատ մը տեսակէտներուն, թէ Հայաստանը ի վիճակի չէ ընդունելու Միջին Արեւելքի հայութիւնը: Միտքեր, որոնք շատ հեռու են գիտական եւ ազգային մօտեցումներէ եւ չեն համապատասխաներ հայրենիքի եւ հայ ազգի իսկական շահերուն:
Հայրենադարձութեան ծրագիրը կ՛ենթադրէ ազգային մտածողութեամբ գիտական մօտեցում, որուն նախաձեռնողը պիտի ըլլայ հայրենի պետականութիւնը, հայկական մեծ կուսակցութիւններն ու կազմակերպութիւնները եւ եկեղեցական կեդրոնները:
Պահանջուածը սուրիահայութեան ի նպաստ ցուցադրական, բեմականացուած, զանազան վերնագրեր կրող համահայկական հաւաքներ չեն, այլ լուրջ աշխատանք` որոշումներ կայացնելու եւ գործադրելու նպատակով:
Ծրագրի իրագործման փուլերուն մէջ չէ բացառուած միջազգային կողմերու եւ այլ պետութիւններու ներդրումը, սակայն վերջին հաշուով նպաստաւորուողները պիտի ըլլան` հայ ազգն ու Հայաստանը:
Միջին Արեւելքէն դուրս եկած հայութիւնը պէտք է արմատաւորուի իր հայրենիքին` Հայաստանի մէջ եւ պէտք չէ փոշիանայ արեւմուտքի ոստաններուն մէջ: Ազգովին ստանձնենք այս յանձնարարութիւնը:
* * *
Յ.Գ. Այսօրուան տուեալներով սուրիահայ գաղութը կորսնցուցած է 2011-ի իր թիւին կէսէն աւելին:
Հայաթափուած են Ռագգան, Թէլ Ապիատը, Տէր Զօրը, Ռաս Ուլ Այնը, Եագուպիէն, Ղընեմիէն:
Նահատակուեցաւ` 99 հայ, վիրաւորուեցաւ` 300, առեւանգուեցաւ` 106, առեւանգուած կը մնայ 6 հայ: Քանդուեցան աւելի քան 1700 հայու բնակարաններ, կործանուեցան եւ կողոպտուեցան հայերու պատկանող աւելի քան 1000 խանութ, գործատեղ, գործարան:
Հալէպահայութեան սիրտը հանդիսացող Նոր Գիւղ թաղամասը կը շարունակէ մնալ աղէտեալ գօտի:
Քեսապի ոդիսականը ծանօթ է բոլորիս:
Սկսած է մեծնալ Սուրիոյ ծովեզերեայ քաղաքներուն հայ բնակչութեան թիւը:
Մեծ թիւով սուրիահայեր ապաստանած են Լիբանան, անոնց մեծ մաս կը դիմագրաւէ տնտեսական լուրջ դժուարութիւններ, յոյսը կապած Լիբանանէն անցնելու արեւմտեան երկիրներ, կամ Սուրիոյ վիճակը լաւանալու պարագային` կ՛ուզեն վերադառնալ Սուրիա:
Մեծ թիւով սուրիահայեր կը գտնուին Հայաստան, որոնցմէ փոքր տոկոս մը կրցած է հաստատուիլ, մեծ մասը սակայն անկայուն վիճակի մէջ է եւ կը ձգտի փոխադըրուիլ արեւմտեան երկիրներ, շատեր արդէն տեղափոխուած են Եւրոպա:
Յատկապէս Հալէպ մնացած հայութիւնը կը դիմագրաւէ շատ ծանր ապահովական, կենցաղային եւ տնտեսական դժուարութիւններ:
Եւ ողբերգութիւնը կը շարունակուի:
Տօքթ.Ներսէս Սարգիսեան
kantsasar.com
28/08/2014