Tert.am-ի հետ զրույցում ՀՅԴ խմբակցության ղեկավար Արմեն Ռուստամյանը անդրադառնալով հարցին, որ եռյակը 44 ստորագրություններով իշխող մեծամասնությունից պահանջում է արտահերթության կարգով քննարկել կառավարման ճգնաժամի հարցը, ասաց, որ այդ աշխատաոճը իրենց համար անընդունելի է, քանի որ եթե մի բան չի քննարկվում իրենց հետ, պարզապես կատարված փաստի առաջ կանգնեցնելու ձևն իրենց համար անընդունելի է։
Ի պատասխան հարցի, որ արդյո՞ք ՀՅԴ–ն նեղացած է եռյակից՝ հանրահավաքի 12 կետերի մասին ՀՅԴ-ի դիրքորոշումը չընդգրկելու համար, նա ասաց. «Եթե պայմանավորվում ենք, պետք է հարգվեն այն կողմերի միջև, որոնք պայմանավորվածությունը ձեռք են բերում»:
– Պարո՛ն Ռուստամյան, եռյակը ներկայացնող ոչ իշխանական ուժերը 44 ստորագրություններով իշխող մեծամասնությունից պահանջում են արտահերթության կարգով քննարկել կառավարման ճգնաժամի հարցը: Ձեր խմբակցության անդամների ստորագրությունը կա՞ր այդ 44- ի թվում:
-Ոչ:
-Ձեզ չեն դիմել, դրա համա՞ր:
-Մենք այդ աշխատաոճը չենք ընդունում: Եթե մի բան չի քննարկվում մեզ հետ, պարզապես կատարված փաստի առաջ են կանգնեցնելու ձևը մեզ համար անընդունելի է, մենք այդ ոճով որևէ մեկի հետ չենք աշխատում:
-Այսինքն՝ ձեզ փորձել են փաստի առաջ կանգնեցնե՞լ:
– Եթե մեզ հետ չեն քննարկում, իհարկե, փաստի առաջ կանգնեցնել է: Եվ եթե մենք մի բան ստորագրում ենք, ստորագրում ենք մի բանի տակ, որը քննարկել ենք միասին, տեքստը մեզ հետ համաձայնեցված է:
-Այսինքն՝ եռյակը տեքստը քննարկե՞լ է, հետո վերջում տեքստը, ինչպես ասում են, բերել են ՀՅԴ-ին են դեմ տվել, դուք էլ հրաժարվել եք:
-Պարզ չեմ ասո՞ւմ՝ ոճը մեզ համար անընդունելի է:
-Իսկ ընդհանուր առմամբ, համաձա՞յն եք Ձեր գործընկերների հետ, որ կա կառավարման ճգնաժամ:
-Ընդհանուր առմամբ, այդ մասին մենք վաղուց ենք խոսել, և այդ հայտարարության պահով չէ, որ պիտի որոշվեր: Կրկնում եմ՝ մենք վաղուց ենք ասել՝ ճգնաժամ կա և այն պայմանավորված է նաև առկա համակարգի գոյությամբ:
-Իսկ չե՞ք կարծում, որ սա Դաշնակցությանը քննադատողների համար լրացուցիչ հիմքեր կտա: Գիտեք՝ ինչ են ասում
սովորաբար, որ դուք «կողմ ըլլալով դեմ եք»:
-Դրանք անգիր արած ֆրազներ են: Եվ Դաշնակցությանը քննադատությունների մեջ ես մինչև հիմա որևէ բովանդակային բան չեմ տեսել: Դրանից եկել ենք այն եզրակացության, որ քննադատողները կքննադատեն՝ անկախ նրանից , թե մենք կասենք՝ երկինքը կապույտ է, թե չէ: Եթե իրենք որոշել են, որ պետք է քննադատեն: Սովորական քաղաքական պայքար է, և ցավում եմ, որ իրենք անցնում են քաղաքական պայքարի վատ դաշտ՝ ցեխ շպրտելով և այլն:
-Իսկ չե՞ք կարծում, որ նեղացածություն ունենք եռյակի հանրահավաքի 12 կետերի մասին ՀՅԴ-ի դիրքորոշումը չընդգրկելու համար, ինչի մասին, ի դեպ, ասել էիք՝ կոռեկտ չի:
-Դաշնակցությունը երբեք ոչ մեկից չի նեղանում, Դաշնակցությունն իր բնավորության մեջ նեղանալու էդպիսի գիծ չունի: Մենք ասել ենք շատ հստակ՝ բաներ կան, որ իրար հետ պայմանավորվում ենք, եթե պայմանավորվում ենք, պետք է հարգվեն այն կողմերի միջև, որոնք պայմանավորվածությունը ձեռք են բերում: Թող պայմանավորվածությունը խախտողներն իրենք պատասխան տան և հասկանան, որ դա քաղաքական դաշտում աշխատելու ճիշտ ձև չէ: Եվ սա, առաջին հերթին, հարվածում է այդ մարդկանց իմիջին, որովհետև մենք տեր ենք մեր ձեռք բերած բոլոր պայմանավորվածություններին: Կոնկրետ խոսքը 12 կետերին էր վերաբերում, Դաշնակցությունն ունեցել է շատ խորքային մասնակցություն այդ տեքստի մշակման մեջ և, բնական է, որ մենք պայմանավորվել էինք, որ այդ ամփոփումն էլ կատարեինք միասին: Եթե իրենք մեզ ներկայացնում են փաստաթուղթ և ասում են՝ Ձեր տեսակետը , մենք այն փոխանցում ենք իրենց թղթի վրա՝ որպես առաջարկություն, և եթե այն տանում են, այնուհետև անտեսում են, և եռյակի կողմից են որոշում, ուրեմն՝ դա իրենց խնդիրն է: Եվ, իհարկե, մեր հասարակության խնդիրն է, այդ ամեն ինչը ճիշտ գնահատի:
-Կարծում եք՝ ձեր ու եռյակի մեջ հիմա արդեն ջրբաժա՞ն է տեղի ունեցել արդեն այս մեկ-երկու դեպքերից:
– Ոչ, մենք հեռուն գնացող նման եզրակացություններ չենք անում, որպեսզի այդպիսի անիմաստ տպավորություն չթողնենք հասարակության մեջ, որ մինչև հիմա քառյակ էր, հիմա դարձավ եռյակ: Մենք մինչև հիմա ասել ենք, չէ՞, քառյակ է այնքանով, քանի դեռ չորսը համաձայն են, եռյակ է այնքանով, քանի երեքն են համաձայն:
-Բայց հիմա 4 են համաձայն, ՀԺԿ –ն էլ է հայտնվել:
-Իրենց գործն է, ի՞նչ կապ ունի, 10–րդ էլ կարող է հայտնվի, դառնա տասնյակ: Մենք հարց ունե՞նք:
-Պարո՛ն Ռուստամյան, շուրջ երկու և ավելի ժամ խմբակցության անդամներով ՝ սահմանադրական փոփոխությունների հանձնաժողովի անդամ Վարդան Պողոսյանի հետ միասին փակված էիք, ի՞նչ հարցեր էիք քննարկում:
– Աշխատանքային քննարկում էր:
-Ձեր խմբակցության անդամ Արծվիկ Մինասյանը որպես իր անձնական տեսակետ , սահմանադրական փոփոխությունների մասին ասել էր՝ որակյալ փաստաթուղթ է: Չե՞ք կարծում, որ մի քիչ շտապեցիք, որովհետև ՀՀ Նախագահ Սերժ Սարգսյանը պատրաստվում է հայեցակարգի քաղաքական բաղադրիչ պարունակող փոփոխությունների գնահատականը տալ փետրվար-մարտ ժամանակահատվածում:
-Ես համարում եմ՝ ուշ է, 25 տարի է՝ նույն բանն ենք ասում:
– Իսկ ինչպե՞ս կմեկնաբանեիք՝ որն էր ՀՀ Նախագահի մամուլի քարտուղարի այդ հայտարարության իմաստը:
-Շատ տրամաբանական է, այդտեղ որևէ արտառոց բան չկա, որովհետև Սերժ Սարգսյանը ենթադրում է ունենալ կոնսուլտացիաներ և դա ժամանակ է պահանջում, նորմալ գործընթաց է: Եթե ոմանք համարել են, որ իրենց պահանջների արդյունքում է նման հայտարարություն արվել, իրենց խնդիրն է: Եթե ուրիշ արդյունք չունեն արձանագրելու, այդ արդյունքը պետք է արձանագրեն, իրենց գործն է:
-Ի՞նչ ունեք առաջարկելու հանձնաժողովին:
-Այն, ինչ պետք է առաջարկենք, դրա մասին տեղյակ են նույն քառյակի մեր գործընկերները, որովհետև մինչև առաջարկությունները իշխանություններին ներկայացնելը, մենք մեր էթիկայի առումով համարեցինք ճիշտ, որ նախ քառյակի մեր գործընկերներին ներկայացնենք մեր մոտեցումները և այդ ներկայացումը տեղի ունեցավ: Դրա վերաբերյալ հետագայում հայտարարություն եղավ՝ քառյակի նիստի ամփոփումից հետո: Հիմա ավելի մանրամասն այդ փաստաթղթի հետ կապված կներկայացնենք ամբողջական ամփոփում այն ամենին, ինչ տեղի ունեցել է:
-Պարո՛ն Ռուստամյան, ԵՏՄ-ին միանալու պայմանագիրը երևի 1.5 ամսվա ընթացքում գա ԱԺ՝ վավերացման…
-Բարով գա:
-Նորից ԵՏՄ-ի հետ կապված, մնո՞ւմ եք ՀՅԴ-ի նախկին դիրքորոշմանը, այսինքն՝ այն, ինչ ասացիք անցյալ տարի սեպտեմբերի 3-ից հետո՝ ՄՄ-ի հետ կապված: Որ անվտանգության համակարգ, պաշտպանություն և այլն:
– Դաշնակցությունը միշտ իր որոշումները , որոնք հայեցակարգային նշանակություն ունեն, չի փոխում և էդպես հեշտ չի վերանայում, ի տարբերություն ոմանց: Եվ որոշ քաղաքական ուժերի: Սա է երևի, որ քաղաքական լայն շրջանակում որոշ ջղաձգումներ է առաջացնում:
-Դուք չջղաձգվողների թվո՞ւմ էիք: Այսինքն՝ ո՛չ առաջ եք ջղաձգվել, ո՛չ հիմա՞:
-Այո՛, իսկ Դուք ինչ-որ ջղաձգում եք տեսնո՞ւմ:
-Իսկ Ղարաբաղի հետ մաքսակետը ՀՅԴ-ին ջղաձգման չի՞ կարող հասցնել:
– Այդպիսի բան չկա, Դուք նման բան տեսե՞լ եք:
-Եթե լինի:
-Եթե լինի, ոչ միայն կջղաձգվենք, թույլ չենք տա, որ նման բան լինի: Այդ փաստաթուղթը կբերվի, Դուք էլ կտեսնեք, որ նման բան դրանում չկա:
