Եռյակ-ՀՅԴ հարաբերություններում լարվածությունն աճում է: Արդեն սկսել են փոխադարձ մեղադրանքներ հնչեցնել իշխանությունների հետ համագործակցելու կոնտեքստում:
Այս թեմայով զրուցեցինք ՀՅԴ խմբակցության քարտուղար Աղվան Վարդանյանի հետ, ով հավատացած է, որ որոշ ժամանակ կանցնի, կրքերը կհանդարտվեն, եւ ամեն ինչ իր տեղը կընկնի:
«Բոլոր քաղաքական ուժերն էլ հարաբերվում են իշխանությունների հետ, եւ դրա մեջ որեւէ գաղտնիք չկա: Այսօր նաեւ եռյակի քաղաքական ուժերից ոմանք են հարաբերվում իշխանությունների հետ, բնական է, որ հարցեր են քննարկում, հանդիպումներ են ունենում, եւ դրա մեջ որեւէ արտառոց բան չկա: Ուստի պետք չէ սեւեռվել Դաշնակցության վրա եւ փորձել Դաշնակցությանը մեղադրել»,-ասաց Աղվան Վարդանյանը՝ նշելով, որ ինքը հարաբերվելն ու հարցեր քննարկելը իշխանությունների հետ դատապարտելի չի համարում:
– Այդուհանդերձ, Դուք եռյակի ուժերի կողմից իշխանությունների հետ համագործակցություն տեսնո՞ւմ եք, որի տակ բացասական, պախարակելի ինչ-որ բան կարող է լինել:
– Ոչ: Նույնը իրենք կարող են մեր մասին ասել, եւ ես այդ հարցին պատասխանել եմ, որ մենք նույնիսկ սահմանադրական բարեփոխումների հարցում համագործակցության մեջ չենք: Մենք այս հարցում ունենք մեր պատկերացումները եւ դրանք շարադրում ենք: Կհամապատասխանի՞ Սահմանադրությունը մեր պատկերացումներին, մենք կասենք՝ այո, համաձայն ենք, չի համապատասխանի, կասենք, որ սա մեր երկրի առջեւ ծառացած խնդիրները չի լուծում, ուրեմն լուրջ չէ այդ ճանապարհով գնալը, եւ չենք գնա: Սա է մեր դիրքորոշումը, եւ մենք հետեւողականորեն այս տարիների ընթացքում պահպանել ենք մեր սկզբունքները: Մեզ համար զարմանալի եւ տարօրինակ է, երբ ուրիշներն են ժամանակի մեջ փոփոխում իրենց տեսակետներն ու սկզբունքները:
– Եթե Սահմանադրականի հարցը հանվի օրակարգից, հնարավո՞ր է, որ եռյակը նորից քառյակ դառնա:
– Դուք մեր սկզբունքը հրաշալի գիտեք. այն հարցերում, որտեղ քաղաքական ուժերը քննարկում եւ գալիս են համաձայնության, այդ համագործակցությունը միշտ էլ հնարավոր է: Դա չի նշանակում քարացած ձեւաչափ: Հիմա տեսե՛ք, նույն 12 կետերի հետ կապված, մենք ունեինք հստակ պայմանավորվածություն՝ քառյակով ամփոփելու եւ ներկայացնելու եզրակացությունը: Ցավոք, մեր գործընկերները գնացին այլ ճանապարհով՝ Դաշնակցության հետ չհամաձայնեցնելով իրենց քայլերը: Դա իրենց իրավունքն է: Աստված իրենց հետ: Վերջին երկու դեպքերը, երբ որ մեզ առաջարկում էին հրատապ լուծվող հարցերը քննարկել, մենք ասացինք, որ եթե մի հարց մեզ հետ չեք քննարկել, եթե մի փաստաթղթի ձեւավորմանը մենք մասնակից չենք եղել, հիմա բերել եք, որ ստորագրենք… Էստեղ նաեւ մի նուրբ պահ կա՝ ինչ-որ առումով փորձել քառյակի տպավորությունը վերականգնել: Եռյակի հանրահավաք եղավ, հանրահավաքում հայտարարվեց քառյակ, հաջորդ օրը եռյակը նիստ արեց, ասաց՝ եռյակ է, քառյակ չկա… այստեղ ներքին խմորումների հարց է: Բայց բերել մեզ ասել՝ այս թղթի տակ ստորագրեք, դա մեր ոճը չէ, որեւէ մեկը չի կարող մեզ հետ խոսել նման փաստի առաջ կանգնեցնելու ոճով:
– Այսինքն՝ ձեր (ՀՅԴ-ի) կարիքը զգացվո՞ւմ է եռյակում:
– Մեր կարիքը միշտ է զգացվում եւ զգացվելու է, եւ բոլորն են զգալու մեր կարիքը:
– Եռյակի հետ համագործակցության կամուրջներն այրված չե՞ն:
– Բնականաբար: Մի երկրում գործող քաղաքական ուժեր ենք, ի՞նչ կամուրջներ այրելու մասին է խոսքը: Կամուրջներ այրելու տպավորություն կարող են թողնել ընդամենը որոշ լրատվամիջոցներ, բայց դա էլ իրենց աշխատանքն է:
hraparak.am
