ՀՅԴ Խորհրդաժողովը վերահաստատեց կուսակցութեան յանձնառութիւնը Արցախեան ազատամարտի արդիւնքների ամրագրման ուղղութեամբ.

ՀՅԴ Բիւրոյի հրաւէրով, Մայիսի 11-12, Երեւանի մէջ գումարուեց խորհրդաժողով, Արցախեան հարցի բանակցութիւնների ներկայ հանգրուանի իրադարձութիւնների լոյսի տակ:

Խորհրդաժողովը հրաւիրուել էր քննարկելու հրապարակուած այն առաջարկութիւնները կամ լուծումի տարբերակները, որոնք Մինսկի խմբի եռանախագահութեան կողմից յառաջիկայ շաբաթներին կարող են ներկայացուել բանակցող կողմերին:

Խորհրդաժողովին մասնակցում էին ՀՅԴ Բիւրոն, Հայաստանի Գերագոյն Մարմինը եւ Արցախի Կենտր. Կոմիտէն, ՀՅԴ համահայկական կառոյցի տարբեր շրջանների Կենտրոնական Կոմիտէներից ներկայացուցիչներ, ՀՀ եւ ԼՂՀ Ազգային Ժողովների ՀՅԴ խմբակցութիւնների անդամներ, ինչպէս նաեւ հրաւիրեալ այլ ընկերներ:

Արցախի հարցի խաղաղ կարգաւորման առնչուող տարբեր զեկոյցներ լսելուց, խորհրդաժողովին մասնակից մարմինների, ինչպէս նաեւ շրջաններից անհատ ընկերների տեսակէտներին տեղեկանալուց յետոյ, ժողովը բազմակողմանիօրէն քննարկեց հարցը:

Խորհրդաժողովը, Արցախեան ազատամարտի ներկայ հանգրուանին, նպատակայարմար գտնելով բանակցութիւնների ճամբով հարցի կարգաւորումը, առաջին հերթին հաստատեց, որ Արցախի վերամիացումը Հայաստանին Դաշնակցութեան համար ունի ծրագրային ու ռազմավարական արժէք: Խորհրդաժողովը վերահաստատեց Արցախեան բանակցութիւնների վերաբերեալ Դաշնակցութեան կեցուածքը բանաձեւող ՀՅԴ Բիւրոյի 20 Մարտ 2001թ. յայտարարութիւնը:

Մեկնելով այս սկզբունքային կեցուածքից, խորհրդաժողովը յստակացրեց բանակցութիւնների այս հանգրուանում առաջադրուած Արցախեան հարցի կարգաւորման զանազան տարբերակների նկատմամբ ՀՅԴ դիրքորոշման սկզբունքներն ու հիմնաւորումները, ինչպէս նաեւ ՀՅԴ կեցուածքը ներգործօն ու ազդու դարձնելու մարտավարութիւնը:

Խորհրդաժողովը հաստատեց, որ բանակցային գործընթացի առաջին իսկ փուլերից Դաշնակցութիւնը շեշտել է բանակցութիւնների գործընթացին հայ քաղաքական ուժերը ամբողջականօրէն մասնակից դարձնելու անհրաժեշտութիւնը£ Փաստօրէն բանակցութիւնների սեղանին վրայ դրուել է ոչ միայն Արցախի, այլեւ նոյնինքն Հայաստանի ու հայ ժողովուրդի ազգային անվտանգութեան ապահովման մեծ խնդիրը£ Իսկ ազգային այս աստիճան բախտորոշ հիմնահարցի կարգաւորման բանակցութիւններից յաղթական դուրս գալու համար, հայկական կողմը ամէն բանից առաջ եւ վեր պէտք ունի իր ներքին համախոհութեան, միասնական կեցուածքին, ինչպէս նաեւ ու մանաւանդ ներ¬քաղաքական կայունութեան ամրապնդումին£ Հետեւաբար, խորհրդաժողովը կարեւորութեամբ ընդգծեց, որ բանակցային գործընթացի արդիւնքում կատարուած տարբեր առաջարկութիւններն ու լուծումի տարբերակները, Հ.Հ. նախագահը պէտք է քննէ հայ քաղաքական ուժերի հետ եւ հասնի համադրուած մէկ ու միասնական կեցուածքի, որպէսզի հայկական կողմը ներքնապէս անխոցելի դիրքերէ ներկայանայ բանակցութիւններին: Խորհրդաժողովը նոյնպէս անհրաժեշտ գտաւ ԼՂՀ իշխանութեանց լիիրաւ մասնակցութիւնը բանակցութիւնների վճռորոշ փուլում:

Խորհրդաժողովը յանգեց այն եզրակացութեան, որ Դաշնակցութիւնը կողմ է արդար խաղաղութեան հաստատման ի խնդիր տարուող բանակցութիւններին, որոնց արդիւնքում ձեռքբերուած Արցախեան հարցի կարգաւորման որեւէ առաջարկ պարտի.

– Ապահովել Արցախի վերամիացումը Հայաստանի Հանրապետութեան կամ առնուազն Արցախի անկախութեան իրաւական ճանաչումը ամրագրող կարգավիճակ,
– Երաշխաւորել Արցախի եւ Հայաստանի ազգային անվտանգութիւնն ու պաշտպանունակութեան ապահովումը£
– Պահպանել Հայաստանի Հանրապետութեան գերիշխանութիւնը հայրենի տարածքների վրայ, ինչպէս նաեւ հաստատագրել Հ.Հ. ռազմավարական կարեւորութիւնը տարածաշրջանում:

Իր աշխատանքների աւարտին, խորհրդաժողովը շեշտեց Դաշնակցութեան այն խոր համոզումը, որ սխալ հաշուարկ են անում բոլոր նրանք, ովքեր կարծում են, թէ հայ ժողովուրդը, իր սոցիալ-տնտեսական ծանր վիճակի պատճառով, կարող է հրաժարուել իր 13-ամեայ պայքարի արդիւնքներից: Առ այդ` խորհրդաժողովը վերահաստատեց Հ.Յ.Դաշնակցութեան վճռակամութիւնը տէր կանգնելուª Հայ Դատի լուծման ճամբին` Արցախեան ազատամարտով արձանագրուած ձեռքբերումներին:

Հ.Յ.Դ. ՄԱՄԼՈՅ ԴԻՒԱՆ
Երեւան, 14 Մայիս 2001թ.