ԼՂՀ Ազգային ժողովի «Դաշնակցություն» խմբակցության ղեկավար Դավիթ Իշխանյանը պնդում է, որ խոսակցությունները, թե Արցախի իշխանությունները պատրաստ են տարածքներ զիջել կայուն կարգավիճակ ստանալու դիմաց, իրականությանը չեն համապատասխանում:
«Հիմքեր չունենք՝ այդպիսի մեկնաբանություններ կամ ենթադրություններ տալու: Մամուլում շրջանառվող տեսակետներ են դրանք, եւ դրանց համապատասխան մեկնաբանություններ տալ ճիշտ չէ: Համենայն դեպս, մենք ոչ մի հիմք չունենք ենթադրելու, որ այդպիսի մթնոլորտ կամ կեցվածք կա, չկան նման խոսակցություններ»,- ասաց Դավիթ Իշխանյանը:
Դիտարկմանը, թե քառօրյա պատերազմից հետո լուրեր շրջանառվեցին, որ Հայաստանի նախագահը Ստեփանակերտում պատգամավորների հետ հենց տարածքների զիջման հավանականության հարցն է քննարկել, Դավիթ Իշխանյանն արձագանքեց. «Սերժ Սարգսյանը նման խնդիր չի քննարկել, եւ այդ քննարկման գործընթացի վերաբերյալ մամուլում տարածվեցին տարաբնույթ, իրականությանը չհամապատասխանող տեսակետներ: Դրանք մտացածին բաներ են»:
Նշենք, որ շատ քաղաքական վերլուծաբաններ կարծում են, որ իշխանական վերնախավը քննարկում է տարածքներ զիջելու հարցը:
Ի դեպ, Արցախի նախագահի մամուլի խոսնակ Դավիթ Բաբայանը հայտարարել էր, թե իրենք պատրաստ են փոխզիջման, որը պետք է լինի երկկողմանի եւ համարժեք:
aparaj.am
