Այսօր էկոնոմիկայի նախարարի ժամանակավոր պաշտոնակատար Արծվիկ Մինասյանը մամուլի ասուլիս էր հրավիրել, որտեղ նա նշեց, որ ամփոփելու է իր պաշտոնավարման յոթ ամսիների ընթացքում կատարած աշխատանքները:

Նրա խոսքով՝ որպես ՀՅԴ ներկայացուցիչ կարևոր և սկզբունքային է լրատվամիջոցներին ներկայացնել հաշվետվություն իրականացրած գործունեության ու անելիքների մասին: Էկոնոմիկայի նախարարությունը միավորում է 13 գերատեսչություններ ու լիազորություններ, 30 հիմնարար ոլորտներ:

Արծվիկ Մինասյանի խոսքով անկախ այն բանից կլինի էկոնոմիկայի նախարարություն թե չի լինի, բոլոր դեպքերում կարևոր կլինեն դոնոր կազմակերպությունների հետ համագործակցության, ներդրումային քաղաքականության, ազատ տնտեսական գոտիների ուղղությունը, պետություն-մասնավոր համագործակցությունը, տնտեսության կյանքում պետության մասնակցությունը, ներդրողների աջակցության հայեցակարգի մշակումը, գործարար միջավայրի բարելավման, արդյունաբերական արտահանման քաղաքականության վերանայումը:

Նախարարը առանձնացրեց ապրիլյան պատերազմում զոհված զինծառայողների ընտանիքներին եկամտաստեղծ գործունեության մեջ ներգրավելու օրենսդրական նախաձեռնությունը, ասելով, որ այդ փաթեթն ամբողջությամբ պատրաստ է և գտնվում է կառավարությունում:

Նախարարը նշեց, որ իր պաշտոնավարման ժամանակ կադրային քաղաքականություն իրականացնելիս առաջնորդվել է պրոֆեսիոնալիզմի, հայրենասիրության և պատասխանատվոթյան սկզբունքներով: Նախարարությունը այդ յոթ ամիսների ընթացքում աշխատել է գերծանրաբեռնված:

«Էկոնոմիկայի նախարարությունը կարիք ունի ռեֆորմների»,- ասաց նախարարը: Արծվիկ Մինասյանը նշեց, որ տնտեսական քաղաքականության կենտրոնական հարցը մնում է տնտեսական դոկտրինի մշակման հարցը, որը կտա տնտեսական բոլոր ուղղությունների անելիքների մասին պատկերացումները: Հարցին, թե արդյո՞ք կա լարվածություն վարչապետի ու ՀՅԴ-ական նախարարների միջև, Արծվիկ Մինսյանը նշեց, որ չկա լարվածություն, չկա խնդիր, կա բնականոն աշխատանքային պրոցես:

«Վստահ եմ, որ թե ՀՅԴ ԳՄ-ն, թե ՀՀԿ ղեկավար մարմինը քաղաքական համագործակցության հուշագիրը կյանքի կոչելու պատրաստակամություն ունեն, թվացյալ լարվածությունը ավելի շատ առանձին հատվածների ցանկությունն է, քան իրականում կա: Ավելի լավ չէ՞, որ կառավարության նիստերը լինեն բաց բանավիճային»:

Նրա խոսքով՝ երբևէ իր և վարչապետի միջև լարվածություն չի եղել,ավելին, ինքը շնորհակալ է վարչապետին, որ նա հստակ տեսակետ ունի, թե ինչպես թեթևացնել գործարարների վրա դրված բեռը, ինչպես նվազեցնել վարչարարությունը: «Ես շարունակում եմ կատարել իմ պարտականությունները, հրաժարական տալու խնդիր չկա, այս պահին ես ժամանակավոր պաշտոնակատար եմ, կշարունակեմ աշխատել այնքան ժամանակ, մինչև նոր հրաման չլինի»,- ասաց Արծվիկ Մինասյանը:

Արծվիկ Միանսյանը անդադարձավ այն հարցին, թե ճիշտ է տեղեկությունն այն մասին, որ իրեն առաջակել են այլ ոլորտ ղեկավարել:

Արծվիկ Մինասյանը նշեց. «Այո, եղել է նման առաջարկ, ես որպես ՀՅԴ ներկայացուցիչ այդ հարցը քննարկման առարկա կդարձնեմ ՀՅԴ ԳՄ –ում, որից հետո կներկայացնեմ իմ մոտեցումները: Եթե կառավարության օրենքի նախագիծն ընդունվում է, ապա էկոնոմիկայի նախարարություն չի լինում այլևս, ինչը ինձ համար բնականաբար ընդունելի չէ, այդ մասին ես բարձրաձայնել եմ նաեւ կառավարության նիստի ժամանակ, ես դեմ եմ էկոնոմիկա բառը հանել անվանումից: Այո վարչապետը այդ նախարարի /վերափոխված էկոնոմիկայի-խմբ/. պաշտոնում այլ անձի տեսնելու ցանկություն է հայտնել, ես ամբիացիա չունեմ ամեն գնով պահպանել իմ դիրքը: Եթե կա այլ անձ, ով ավելի արդյունավետ կարող է իրականացնել այդ աշխատանքը, ապա խնդիր չեմ տեսնում, ես կարող եմ աջակցել նրան՝ հանուն տնտեսության զարգացման»:

Մինասյանը դրական է համարում, որ կառավարությունում ակտիվ քննարկումներ են ընթանում, գուցե որոշ պահեր հրապարակման համար չեն, այլ զուտ աշխատանքային են, բայց վարչապետի կողմից որեւէ անձի վիրավորելու միտում չկա, եթե կառավարության նիստում վարչապետի ու նախարարների միջև ակտիվ քննարկում կա, տեսակետների տարբերություններ և այլն, ապա դա միայն գովելի է, դրանից շահում է միայն հասարակությունը:

Հարցին, թե ճիշտ են տեղեկություններն այն մասին, թե վարչապետը չի ցանկանում աշխատել Դավիթ Լոքյանի հետ, Արծվիկ Մինասյանը հերքեց այդ տեղեկությունները:

«Նման բան չկա, այպիսի թեմա չկա, հարաբերությունները զուտ աշխատանքային են , անձնական սիմպատիա կամ անտիպատիա ուղղակի չկա»,- ասաց Արծվիկ Միանսյանը:

yerkir.am