Ֆրանսիայի Սենատն այսօր՝ հկտեմբերի 14-ին ընդունել է Հայոց ցեղասպանության ժխտումը քրեականացնող օրինագիծը:
Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը մեզ հետ զրույցում նշեց, որ «Քաղաքացիություն եւ ազատություն» օրենքի բարեփոխված տարբերակին կողմ է քվեարկել 156, դեմ` 146 պատգամավոր:
Փափազյանի խոսքով, թուրքերը բավական ակտիվ աշխատանք էին տանում, որ խափանեն օրինագծի ընդունումը, սակայն դա նրանց չի հաջողվել. «Սա նշանակում է, որ Ֆրանսիայի խորհրդարանը վերջնական ընդունեց Հայոց ցեղասպանության ժխտումը քրեականացնող նախագիծը: Եթե լինի դիմում, հարցը կարող է քննարկվել նաեւ Սահմանադրական խորհրդում»:
Ավելի վաղ NEWS.am-ը հայտնել էր, որ Ֆրանսիայի Սենատը հետաձգել է Հայոց ցեղասպանության ժխտումը քրեականացնող օրինագծի քննարկումը: Ֆրանսիայի Սենատը հոկտեմբերի 12-ին, սկսել է քննարկել «Քաղաքացիություն եւ ազատություն» օրենքի բարեփոխված օրինագիծը, սակայն կեսգիշերն անց, քննարկումները դեռ չավարտած, նիստի նախագահը որոշել է քննարկումը հետաձգել երկու օով:
Օրինագծի 37-րդ, 38-րդ հոդվածները վերաբերում են Հայոց ցեղասպանության ժխտման քրեականացմանը:
Քննարկումներին հետեւել են Ֆրանսահայ կազմակերպությունները համակարգող խորհրդի (CCAF) համանախագահները՝ Արա Թորանյանն ու Մուրադ Փափազյանը:
Հատկանշական է, որ նույն իրիկունը՝ այն ժամերին, երբ ընթանում էին քննարկումները, Ծերակույտի նախագահը՝ Ժերար Լառշեն, ընդունել է Թուրքիայի Ազգային ժողովի նախագահ Իսմայիլ Քահրամանին, եւ այդ հանդիպմանը հաջորդել է Ծերակույտի ֆրանս-թուրքական բարեկամության խմբի ընթրիքը:
news.am