Ազգային ժողովի պետաիրավական հարցերի մշտական հանձնաժողովի նախաձեռնությամբ կազմակերպված «ԱԺ կանոնակարգ» օրենքի նախագծի վերաբերյալ աշխատանքային քննարկումների ընթացքում իր դիտարկումներն արեց ԱԺ ՀՅԴ խմբակցության ղեկավար Արմեն Ռուստամյանը:
Նրա խոսքով՝ կանոնակարգ օրենքը պետք է արտացոլի բոլոր այն լիազորությունները, որոնք նոր Սահմանադրությամբ տրվում են Ազգային ժողովին:
«Ես իսկապես համարում եմ, որ մենք մեր մոտեցումը պետք է իրար հետ ճիշտ ուղղությամբ տանենք: Սա չի կարող համարվել ԱԺ կանոնակարգի փոփոխություն: Այնպիսի տպավորություն է ստեղծվում, թե վերցրել ենք հինը և փորձել ենք հարմարեցնել մեր ունեցած նոր համակարգին»,- ասաց Ռուստամյանը՝ ընդգծելով, որ դա առիթ է տալիս, որ բազմաթիվ հարցեր առաջանան: ՀՅԴ-ականը նշեց, որ նոր ընտրվող խորհրդարանը լինելու է առաջնային մանդատ ունեցող միակ մարմինը, ինչը պետք է արտացոլված լինի կանոնակարգում.
«Իշխանությունը ծագում և ձևավորվում է այս մարմնով: Սա չի երևում, սա գլխավոր հարցն է, որ այս կանոնակարգով պետք է երևա: Այսինքն՝ ԱԺ-ի կանոնակարգով պետք է երևա Ազգային ժողովի բոլոր լիազորությունների իրացումը: Ընտրական օրենսգրքից հետո մյուս գլխավոր, կարևոր, համակարգաստեղծ օրենքն այս «ԱԺ կոնոնակարգ» օրենքն է, և մենք սրան պետք է լրջությամբ վերաբերվենք»:
Ռուստամյանը խորհուրդ տվեց ուսումնասիրել խորհրդարանական կառավարում ունեցող մյուս երկրների փորձը և հասկանալ, թե ինչ վերահսկողական լիազորություններ են տրված խորհրդարանին: Ռուստամյանը նշեց նաև, որ պետք է հստակեցվի գործիքակազմի ուղղությունները.
«Գործիքակազմի հիմնական ուղղությունները երեքն են. առաջնային մանդատ, որ ձևավորում է իշխանությունը, որը պետք է լինի միակ օրենսդիրը, ներկայացուցչական մարմինը, վերահսկողը: Այս ուղղությունները խորհրդարանի ատրիբուտիկան են»:
ՀՅԴ-ականը նշեց նաև, որ պետք է հստակեցվի ԱԺ մտնելուց հետո օրենքների ճակատագիրը:
«Երբ օրենքը մտնի ԱԺ, տերը խորհրդարանը պետք է լինի: Կառավարությունը կարող է բերել, բայց երբ գալիս է ԱԺ, տերը ինքն է, իսկ բացառիկ դեպքերում կառավարությունը կարող է անվստահություն հայտնել որևէ օրենքի նկատամամբ»,- ասաց նա: «ԱԺ-ն, իր բոլոր մարմիններով, լիարժեք վերհսկողություն իրականացնելու հստակ գործիքակազմ պետք է ունենա»,- ընդգծեց Ռուստամյանը:
