Գնաճն առկա է, հարցն իշխանության օրակարգում է: Tert.am-ի հետ զրույցում այս մասին ասաց ՀՅԴ Բյուրոյի քաղաքական ներկայացուցիչ, ՀՅԴ խմբակցության ղեկավար Արմեն Ռուստամյանը:
«Գնաճը որոշակի առումներով օբյեկտիվ պատճառներ ունի, բայց նկատի ունենալով այն, որ բյուջեով սոցիալական խնդիրների լուծում չենք նախատեսել, պետք է կառավարությունը միջոցներ գտնի և ունի այդ հնարավորությունը, որ գնաճը կարիքավոր խավերի վրա չանդրադառնա: Մենք սոցիալական պետություն ենք և սոցիալապես անապահով խավերը պետք է զգան պետության հոգածությունը»,- նշեց Արմեն Ռուստամյանը:
Գնաճի դեմ հիմնական պայքարը, ըստ պատգամավորի, կառավարությունը նախատեսել է տնտեսական աճը, տնտեսության արագընթաց զարգացումը: Նրա խոսքով՝ գնաճը չի ազդի նրանց վրա, ովքեր վարձատրվում են:
Կարիքավորի պարագայում, Արմեն Ռուստամյանի խոսքով, կամ սպառման նվազագույն զամբյուղ և եթե մարդը չի կարողանում գնել նվազագույնը, որովհետև չունի համապատասխան աշխատավարձ, ուրեմն պետք է պետությունը աջակցի նրանց տարբեր ծրագրերով:
«Մենք կանենք ամեն ինչ, որ կառավարությունը տրամադրի այս ռեսուրսները, սա կառավարության պարտավորությունն է»,- նշեց նա:
Դիտարկմանը, թե «Ելք»-ը թանկացումների դեմ երթ է նախաձեռնում, հնարավո՞ր է, որ ՀՅԴ-ն էլ մասնակցի որպես մտահոգ ուժ, Արմեն Ռուստամյանն արձագանքեց այսպես. «Քաղաքական կամք ու քաղաքական լուծումներ է ենթադրում թանկացումների դեմ պայքարը: Մեր նպատակն այն չէ, որ գնաճից առաջացող դժգոհությունը բերենք ներքին ցնցումներ առաջացնենք: Սա կարող է սրել այդ հարցը: Մենք խնդիրն այն է, որ հարցը լուծվի, ոչ թե օգտագործվի, բողոքների դեմ պետք է կոնկրետ քայլեր ձեռնարկել»:
Ռուստամյանն ասաց, որ «Ելք»-ը ընդդիմադիր կուսակցություն է և բնական է, որ բողոքները, դժգոհությունները պետք է դառնան այդ ուժի օրակարգի մի մասը: Ըստ նրա՝ իրենց իրավունքն է ընտրել պայքարի նման ձևը: Ամեն դեպքում, ըստ նրա, հանրահավաքներով հնարավոր չէ գնաճի դեմ պայքարել, «պետք են շատ ավելի լուրջ գործիքներ կիրառել, և առաջին հերթին տնտեսական կառավարման ծրագրերի հետ առնչվող գործիքներ»:
«Իշխանության մեջ գտվող ուժն այդ ճանապարհով չպետք է գնա: Իշխանությունն ունի լծակներ, հնարավորություններ, որոնք պետք է իրացնի, լուծի խնդիրները, որպեսզի դժգոհությունը ընդդիմության դաշտում նվազի: Եթե որոշակի դժգոհություն մնացել է, ապա ընդդիմության իրավունքն է դա օգտագործել»,- ասաց նա:
Պատգամավորը նշեց, որ լուծումը ամբողջական բարեփոխումների գործընթացում է: «Մենք համոզված ենք, որ այն ծրագիրը, որը մենք կառավարության մեջ լինելով հաստատել ենք Ազգային ժողովում, և պետք է իրականացնենք մինչև 22թ.-ը, եթե կյանքի կոչվի, վստահ եմ, որ կլուծվեն նաև այս խնդիրները»:
Ա. Ռուստամյանը շեշտեց, որ իրենց նպատակը գնաճից առաջացող դժգոհությունից ներքին ցնցումներ առաջանցելը չէ: «Այդ կերպ, ընդհակառակը, ավելի կարող է այդ հարցը սրվել: Մեր խնդիրն այն է, որ հարցը լուծվի, ոչ թե հարցն օգտագործվի: Այդ բողոքները չպետք է օգտագործել, պետք է բողոքների դեմն առնելու կոնկրետ քայլեր կատարվեն»,- ասաց ՀՅԴ խմբակցության ղեկավարը:
tert.am
«Կառավարությունը պարտավոր է միջոցներ գտնել». Արմեն Ռուստամյան
Վերջին շրջանում գնաճի ահագնացող ծավալների մասին անգամ չլռեց իշխող ՀՀԿ-ի կոալիցիոն գործընկեր ՀՅԴ-ն, որն իր Բյուրոյի տնտեսական հետազոտությունների գրասենյակի միջոցով հայտարարություն էր տարածել, որում խոսվում էր բենզինի շուկայում հակամրցակցային համաձայնության մասին: Ինչեւէ, գնաճի մասին օր օրի ավելի աղմկոտ դարձող խնդրի վերաբերյալ օրերս ՀՀ նախագահ Սերժ Սարգսյանը անցկացրել էր խորհրդակցություն` հանրապետությունում առանձին ապրանքատեսակների գների բարձրացման եւ դրա հետեւանքների հնարավոր մեղմմանն ուղղված լուծումների քննարկման նպատակով եւ տվել կոնկրետ հանձնարարականներ: Այս ամենի վերաբերյալ, ինչպես նաեւ քաղաքական մի քանի հարցերի շուրջ «Իրավունքը» պարզեց ԱԺ ՀՅԴ խմբակցության ղեկավար ԱՐՄԵՆ ՌՈՒՍՏԱՄՅԱՆԻ տեսակետը:
«ԿԵՆՍԱՊԱՀՈՎՄԱՆ ՆՎԱԶԱԳՈՒՅՆ ԶԱՄԲՅՈՒՂԸ ՊԵՏՔ Է ԱՊԱՀՈՎՎԻ»
– Պարոն Ռուստամյան, մինչ ՀՀ վարչապետը գտնվում է արձակուրդի մեջ, ՀՀ նախագահն է գնաճը մեղմելու վերաբերյալ խորհրդակցություն անցկացնում: Այս ամենից կարելի՞ է նաեւ որոշակի քաղաքական եզրակացություններ անել:
– Չեմ կարծում, որ ցանկացած նման երեւույթից հեռուն գնացող եզրակացություններ անելը ճիշտ է: Վստահ եմ, որ հարցն օրակարգում, իսկապես, գոյություն ունի, որովհետեւ գնաճի փաստն առկա է: Դրա վերաբերյալ մեր մոտեցումը ժամանակին արտահայտել ենք, եւ անձամբ ես առիթ ունեցել եմ դրա մասին խոսել: Գնաճը, որոշ առումներով նաեւ օբյեկտիվ պատճառներ ունենալով, նկատի ունենալով նաեւ այն հանգամանքը, որ բյուջեով հատուկ սոցիալական ուղղվածության խնդիրներ չենք նախատեսել, ուստի` կառավարությունը պարտավոր է միջոցներ գտնել եւ ունի այդ հնարավորությունը, որպեսզի այդ գնաճը առավել կարիքավոր խավերի վրա չանդրադառնա: Ի վերջո, մենք սոցիալական պետություն ենք, որի գլխավոր պահանջներից մեկն էլ այն է, որ սոցիալապես անապահով խավերը պետք է զգան պետության հոգածությունը: Կարծում եմ` սա է ասել ՀՀ նախագահը, ինչը մենք լիովին պաշտպանում ենք:
– Կառավարությունն այսօր ի՞նչ հնարավորություն ունի` գնաճը մեղմելու, որ չի օգտագործում:
– Բացի այն, որ, բնականաբար, կառավարությունը նախատեսել է դրա դեմ հիմնական պայքար, պետք է լինի նաեւ տնտեսական աճ, արագընթաց զարգացում, որովհետեւ մեկը մյուսով է պայմանավորված: Գնաճը չի ազդի այն անձանց վրա, ովքեր անհրաժեշտ աշխատանքի դիմաց վարձատրություն ունեն: Ըստ էության, աղքատության կամ դժվար կարիքավոր վիճակում գտնվելու չափանիշը վաղուց ասել ենք, որ կենսապահովման նվազագույն զամբյուղն է, որը պետք է ապահովի պետությունը: Մարդիկ պետք է իրենց նվազագույն անհրաժեշտը կարողանան ձեռք բերել, ինչի համար պետք է ունենան այդքան եկամուտ: Իսկ եթե այդ եկամուտը չի ապահովվում աշխատավարձով, ուրեմն` պետք է պետական տարբեր ծրագրերով խնդիրը լուծվի: Սա է մեր հիմնական պահանջը եւ, որպես սոցիալիստական կուսակցություն, վաղուց ի վեր մենք սրա ջատահովն ենք եղել: Այնպես որ, կանենք ամեն ինչ, որպեսզի կառավարությունն այդ ռեսուրսները տրամադրի, ինչը պարտավոր է կատարել:
– Կառավարության մաս է նաեւ ՀՅԴ-ն…
– Այո՛, եւ մենք էլ, ներսում լինելով կանենք ամեն ինչ, որպեսզի այդ պարտավորությունը կառավարությունը լիարժեք իրականացնի:
«ՉԵՄ ԿԱՐԾՈՒՄ, ՈՐ ՀԱՆՐԱՀԱՎԱՔՆԵՐՈՎ ԿԱՐԵԼԻ Է ԳՆԱՃԻ ԴԵՄ ՊԱՅՔԱՐԵԼ»
– ՀՅԴ-ն, որպես գնաճով մտահոգված քաղաքական ուժ, հնարավո՞ր է մասնակցի «Ելքի» նախաձեռնած երթին` ընդդեմ թանկացումների:
– «Ելքի» իրավունքն է պայքարի այդ ձեւը ընտրել, բայց չեմ կարծում, որ հանրահավաքներով կարելի է գնաճի դեմ պայքարել: Պետք են շատ ավելի լուրջ գործիքներ եւ առաջին հերթին` կառավարության ծրագրերի հետ առնչվող գործիքներ: Եվ, բնականաբար, նման լուծումները ենթադրում են քաղաքական կամք: Կարծում եմ` այդ դաշտում է պետք փնտրել լուծումը: Մեր նպատակն այն չէ, որ գնաճից առաջացող դժգոհությունը ներքին ցնցումներ առաջացնի, որն ընդհակառակը` ավելի կարող է հարցը սրել: Եղած բողոքները ոչ թե պետք է օգտագործվեն, այլ այդ բողոքների դեմն առնելու կոնկրետ քայլեր կատարվեն:
– Կարծում եք` «Ելքի» այս նախաձեռնության նպատակը ոչ թե լուծումներ գտնելն է, այլ սոցիալական բո՞ւնտը:
– «Ելքն» ընդդիմադիր դաշինք է, բնականաբար, իրենք պետք է դժգոհությունները, բողոքները դարձնեն իրենց քաղաքական օրակարգի հարց: Իսկ իշխանության մեջ գտնվող կուսակցությունները, կառույցները այդ ճանապարհով չպետք է գնան: Իրենք ունեն լծակներ, հնարավորություններ, եւ դրանք պետք է իրացնեն` խնդիրները լուծելու համար, որպեսզի դաշտում դժգոհությունը քչանա: Բնական է, որ եթե կան դժգոհություններ, ընդդիմությունը պետք է այն օգտագործի: Այս ամենին ես զարմանքով չեմ նայում, բնականոն գործընթաց է իշխանություն-ընդդիմություն հարաբերություններում: Եթե նրանք նաեւ հրապարակային առաջարկներ էլ ներկայացնեն, մեզ համար օգտակար կլինի, որ մենք էլ մեր ծրագրերի մեջ դրանք ի նկատի ունենանք:
– Իսկ խնդրի լուծման համար, ՀՅԴ-ն որպես իշխող քաղաքական ուժի կոալիցիոն գործընկեր, որեւէ առաջարկ արե՞լ է:
– Իհարկե, մենք լուծումները տեսնում ենք ամբողջական բարեփոխումների գործընթացի մեջ, որը ոչ միայն քաղաքական է, այլ նաեւ վերաբերում է տնտեսական, սոցիալական հարցերին: Մենք համոզված ենք, որ այն ծրագիրը, որը կառավարության մեջ լինելով` հաստատել ենք Ազգային ժողովում, պետք է իրականացվի մինչեւ 2022 թվականը, եւ լուծումները հենց այդ ծրագրի մեջ ենք տեսնում: Իսկապես, եթե այդ ծրագիրը կյանքի կոչվի, վստահ եմ, որ այդ գործընթացը բերելու է բոլոր այս խնդիրների լուծմանը:
Ո՞ՒՄ Է ՏԵՍՆՈՒՄ ՀՅԴ-Ն ՀՀ ՆԱԽԱԳԱՀԻ ՊԱՇՏՈՆՈՒՄ
– Ի դեպ, բավական քիչ ժամանակ է մնացել ՀՀ նախագահի ընտրությանը: Ինչո՞ւ է ՀՅԴ-ն հապաղում թեկնածուի անուն տալու հարցում:
– Մենք առայժմ այդպիսի քննարկումներ չենք անցկացրել, ու դեռ դրա ժամանակը կգա: Չենք հապաղում, ամեն ինչ իր ժամանակն ու ընթացքն ունի: Սահմանադրության պահանջն է, որ նախագահը չպետք է լինի որեւէ կուսակցությունից: Պետք է լինի անձ, որը կարողանա համազգային միասնությունը մարմնավորել: Տեսականորեն պետք է լինի արժանի մարդ, որը կկարողանա գործել նոր համակարգով, որովհետեւ թեպետ «նախագահ» անունը պահպանվելու է, բայց նրա լիազորությունները բոլորովին այլ են լինելու: Ընդ որում` նա մեկ անգամ պետք է նախագահ դառնա` 7 տարով, այլեւս չի կարող լինել, ինչը նախատեսված է Սահմանադրությամբ: Նախագահն, ըստ էության, պետք է դառնա համայն հայության նախագահը, որովհետեւ ունենք հսկայակական Սփյուռք: Ժամանակին մենք մտածում էինք, որ նախագահի ընտրության փուլում, այս կամ այն կերպ ներգրավվի նաեւ Սփյուռքը: Եվ այդ հարցը դեռ մեր օրակարգում է: Այդ խնդիրը չկարողացանք սահմանադրական փոփոխությունների այս փուլում լիարժեք իրականացնել` ապահովելով Սփյուռքի մասնակցությունը նախագահի ընտրության ժամանակ: Բայց ապագայում անպայման առաջարկելու ենք մեխանիզմներ, հնարավոր տարբերակներ այդ հարցում: Հիմա ունենք այն, ինչ ունենք, եւ կարծում եմ` նոր նախագահը այդ առումով եւս պետք է նախանձախնդիր լինի, որ ապահովի հաջորդ նախագահի ընտրության ժամանակ Սփյուռքի մասնակցությունը: Սա մնում է մեր հիմնական ակնկալիքը նոր նախագահից, իսկ մնացած հարցերը ընթացքում կլուծվեն:
ՀՐԱՆՏ ՍԱՐԱՖՅԱՆ
iravunk.com
