Հունիսի 3-6-ը Արցախում էին «Թեւանիկ» բարեսիրական խմբի ներկայացուցիչները: Նրանց ուղեկցում էր Արցախի Հանրապետության «Դաշնակցություն» խմբակցության պատգամավոր Ռիտա Մնացականյանը: Հերթական այցի ընթացքում «Թեւանիկ» խմբի կողմից Արցախի Ասկերանի շրջանի Լուսաձոր, Մարտակերտի շրջանի Պողոսագոմեր, Կիչան և Հայկաջուր համայնքների դպրոցներին են հանձնվել համակարգիչներ, տպիչ և այլ սարքավորումներ, սպորտային պարագաներ:
Դպրոցներն ընտրվել են ԱՀ կրթության, գիտության և սպորտի նախարարության հետ համատեղ, ծրագիրը շարունակական բնույթ է կրելու:
Համակարգիչներ և համապատասխան սարքավորումներ են տրամադրվել նաև Շուշիի տեխնոլոգիական համալսարանին:
«Թեւանիկ» խմբի պատասխանատու Իվետ Դանիելյանը նշել է, որ արդեն 4 տարի Արցախում աշխատանք են տանում, որին այս տարի միացել է նաև «Արմենֆոնդ»-ը: «Մենք աշխատում ենք տարբեր բնագավառներում օգտակար լինել Արցախի ժողովրդին: Այս միջոցառումն արել ենք, որովհետև մեր համար կարևոր է, որպեսզի Արցախում լավ մասնագետներ դաստիարակվեն և խրախուսվեն այն մասնագիտությունները, որոնք Արցախի համար կարևոր են»,- ասել է Իվետ Դանիելյանը: Նա նաև ավելացրել է, որ Սփյուռքը կիսում է արցախցու հոգսերը. «Ուրիշ տեղ ապրելը, ուրիշ երկնքի տակ ծնվելն արգելք չի հանդիսանում մեր առօրյայում մտահոգվել և կիսվել հայրենիքի հոգսերով: Ու ձգտում ենք համահայկական մտածողությամբ օժանդակել երկրի խնդիրների վերացմանը, ունենալ զարգացած և ուժեղ հայրենիք»:
Այցի ընթացքում իրագործվել է «Թևանիկ»-ի ծրագրերից ևս մեկը. որոշ բազմազավակ սոցիալապես անապահով ընտանիքների ցուցաբերվել է նյութական աջակցություն:
aparaj.am
