Դեկտեմբերեան վերջին օրերին մեծ բաւարարութեամբ ու ոգեւորութեամբ էինք ընդունում խմբագրութիւն առաքւած տասնեակներով ծրարւած ու փոստով առաքւած Ամանորի տօների կապակցութեամբ ձեռագրային մակագրւած քարտեր-բացիկները: Այլապէս՝ ամէն-ամէն ինչի նման, Նոր տարւայ աւանդոյթներն էլ «ֆէյսբուքայնացւելու» հոլովոյթ են ապրում՝ անոգի, բայց, այնուամենայնիւ, օրինաչափ…

* * *

Ու այսպէս՝ 2012 թ.-ին հրաժեշտ տալուն եւ դա 2013-ով փոխարինելուն, ահա, հաշւած ժամեր են մնացել: Ժամեր, որոնք ամէն ոք փորձում է օգտագործել նաեւ խորհելու, վերյիշելու, գնահատել-արժեւորելու եւ մէկ խօսքով՝ ամփոփելու անցածը, իր լաւ ու վատով, դրական-բացասականով, ձեռքբերում-կորուստներով: Եւ այս ամէնը՝ անհատական, ընտանեկան, հասարակական-համայնքային, ազգային-պետական եւ ի վերջոյ՝ միջազգային-համամարդկային բոլոր մակարդակներում:

Տարին ամփոփելու թերեւս ամենաշնորհակալ վերաբերմունքը կը լինէր այն, որ անցեալի բոլոր գումարելիներն ու բացթողումները չսեպւեն որպէս ինքնանպատակ անցողիկ երեւոյթներ, այլեւ՝ գնահատւեն որպէս անխուսափելի փորձաշրջան ու փորձաքարեր՝ գալիքում գումարելիների քանակն ու որակը բարձրացնելու, իսկ բացթողումները նւազագոյնի հասցնելու համար: Տայ Աստւած, որ անհատականից ընդհուպ մինչ համամարդկային մակարդակներ, 2013 թւականը արգասաւորւի ըստ թւարկածի…

* * *

…. Քանզի վերջին տարիներին ու յատկապէս Ամանորի օրերի մաղթանքներում ամենաշատ օգտագործւածն ու ընդգծւածը ոչ այլ ինչ է եղել, եթէ ոչ՝ խաղաղութիւնը: Խաղաղութիւն՝ նոյն վերոգրեալ բոլոր մակարդակներում:

Եւ հաւատացած ենք, որ 2013-ի շեմին բոլոր մաղթանքներում եւս ամենաընդգծւածը լինելու է միեւնոյն խաղաղութեան վերականգնումն ու պահպանումը՝ Երկիր մոլորակի այն բազմաթիւ կէտերում, որոնցում ամենօրեայ բախում-պատերազմների աննախադէպ ու անասելի արհաւիրքներ են պատահում եւ որոնց մասին գրեթէ ամենժամեայ ողողմամբ ու հեւքով տեսնում-լսում ենք, արդէն մարդկային խիղճն ու միտքը բթացնող յաճախականութեամբ: Իսկ համաշխարհային տնտեսական ճգնաժամ կոչւող երեւոյթը, որը պատճառ-հետեւանքային օրինաչափութեամբ արդիւնքն է վաղուց ի վեր անարդար հիմքերի վրայ ձեւաւորւած-ղեկավարւած՝ դրամատիրական հասարակարգերի առաջացմամբ, աւելիով է խոցելի դարձնում նոյն՝ առանց այն էլ համաշխարհային խախուտ խաղաղութիւնը:

* * *

Ահաւասիկ, թող որ դէպի մշտապէս տենչալի խաղաղութիւն ու արդարութիւն տանող արահետի մեկնարկային ազդանշան հադիսանայ երրորդ հազարամեակի 13-րդ տարին, ուր լքւած բարոյականութիւնն ու մարդկային վեհ գաղափարները վերարժեւորւած ու վերաիմաստաւորւած՝ նոր ուղի կը հարթեն շփոթահար ու բարոյալքւած համաշխարհային հանրութեան առջեւ:

«ԱԼԻՔ»ի խմբագրական
31 Դեկտեմբեր 2012