«Երեւանի ավագանու ընտրությունները քաղաքական են: Նախ օրենքով իսկ այդ ընտրությունները քաղաքական ուժերի, համամասնական ցանկերի միջեւ ընտրություն են, եւ ինչպես էլ փորձեն իշխանությունները սա շուռ տալ, ասել, որ դրանք ընդամենը քաղաքը կառավարելու տեղական ընտրություններ են, չի ստացվելու: Իրենց բնույթով դրանք քաղաքական ընտրություններ են:

Այս ընտրություններին մենք պետք է չնայենք իբրեւ ցանկերում առաջին տեղը զբաղեցրած անձերի մրցակցություն, ինչը փորձում են թելադրել իշխանությունները: Սպասվում է ընտրություն քաղաքական ուժերի միջեւ:
Երկրորդ, մենք նոր ենք դուրս եկել նախագահական ընտրություններից, մեր հասարակության մի զգալի հատվածը ակնհայտորեն իր դժգոհությունը, բողոքը, անհամաձայնությունն է արտահայտել գործող համակարգին, իշխող կուսակցությանը, եւ այս մթնոլորտը, բնականաբար, տեղափոխվելու է նաեւ Երեւանի ավագանու ընտրություններ»,- երեկ, «Պոստ Սկրիպտում» ակումբում խոսելով առաջիկա ընտրությունների մասին, ասաց ՀՅԴ խորհրդարանական խմբակցության քարտուղար Աղվան Վարդանյանը, որի անունը Երեւանի ավագանու ընտրություններում կուսակցության ցանկի երկրորդ տեղում է:

Ըստ նրա, աշխարհում կան բազմաթիվ օրինակներ, երբ երկրի մայրաքաղաքը ղեկավարում է ընդդիմադիր քաղաքական ուժը: Հակակշռման եւ զսպման մեխանիզմները, որ գործում են նման պարագայում, մրցակցություն են առաջացնում, քաղաքի կառավարումը դարձնում են ավելի արդյունավետ՝ իրենց հետ բերելով դրական փոփոխություններ։

«Այս ընտրությունների արդյունքում մենք վստահ ենք, որ Երեւանից սկսվելու են փոփոխություններն ամբողջ Հայաստանում: Այս ընտրություններում Դաշնակցության հիմնական կարգախոսն է «Երեւան, փոխիր Հայաստանը»,- նշեց բանախոսը:

ՀՅԴ-ն այս ընտրություններին մասնակցում է իր բոլոր ուժերը ներդնելով. «Ցավոք, ֆորմալ առումով նախորդ` խորհրդարանական ընտրությունների թղթի վրա գրված արդյունքներով մենք այսօր 5,5 տոկոսանոց կուսակցություն ենք: Վստահ եմ, որ Դաշնակցության իրական կշիռը ե՛ւ քաղաքական օրակարգերում, ե՛ւ քաղաքականության մեջ, ե՛ւ Ազգային ժողովում շատ ավելին է:

Մենք խնդիր ենք դրել այս ընտրություններում մեր իրական ազդեցությունը, կշիռն արձանագրել արդյունքներով: Ամեն ինչ անելու ենք, որ արդյունքները լինեն արժանահավատ, ոչ այնպիսին, ինչպիսին նախագահական ընտրությունների պաշտոնական արդյունքներն էին:

Մենք աշխատելու ենք ամենժամյա ռեժիմով, մեր բոլոր կառույցները ներառելով, բնականաբար վերածելով դա ե՛ւ քաղաքական պայքարի, ե՛ւ բնականաբար, որպես երկրորդ բաղադրիչ` քաղաքի արդյունավետ կառավարման հարցում մեր հնարավորությունների ցուցադրման»։

Ըստ Ա.Վարդանյանի, փորձելու են հասարակությանը ներկայացնել այն օբյեկտիվ իրական տարբերությունները, որ կան ՀՅԴ-ի եւ մյուս քաղաքական ուժերի միջեւ. «Մենք ունենք մասնագետների շատ մեծ թիմ` փորձառու, հեղինակություն ունեցող, ունենք սկզբունքներ, մենք մի անհատի կամ անձի կուսակցություն չենք, բոլոր պարագաներում պահել ենք մեր անկախությունն ու ինքնուրույնությունը, ունեցել ենք սխալներ, թերություններ, շեղումներ, բայց մեր հիմնական ծրագրային ուղղություններից չենք շեղվել:

Փորձելու ենք այս անգամ քաղաքացիներին համոզել, բացատրել, մատչելի, ընկալելի դարձնել իրական Դաշնակցության էությունը: Այո, մենք դժվարություն ենք ունեցել մինչեւ հիմա մեր քաղաքացիների մեջ հավատ, վստահություն ներշնչել: Վստահ ենք, որ քաղաքացիներին կարողանալու ենք համոզել, որ այս անգամ հավատան, վստահեն ու քվեարկեն Դաշնակցության օգտին»:

Կուսակցությունում այսօր էլ համարում են, որ ճիշտ են վարվել չմասնակցելով նախագահական ընտրություններին, քանի որ դրանց արդյունքները կանխորոշված էին, իսկ աշնանը հնարավոր չեղավ ընդդիմադիր դաշտում ձեւավորել միասնական օրակարգ եւ նաեւ միասնական թեկնածու: Ավագանու ընտրությունների պարագան այլ է:

«Նախագահական ընտրությունները միամանդատ ընտրություններ են, երբ, անկախ թեկնածուների քանակից, հաղթում է մեկը: Երեւանի ընտրությունները բազմամանդատ, համամասնական ընտրություններ են, որտեղ ամեն կուսակցություն ստանում է ըստ իր աշխատանքի:

Այնպես չէ, որ հաղթողը մեկն է, նա է ստանալու ամեն ինչ, իսկ մյուսները՝ ոչինչ: Նախագահական ընտրություններին չմասնակցելով մենք չենք ցանկացել վարկաբեկել ընտրական ինստիտուտը: Երկրում, եթե բան պետք է փոխվի, ապա այն պետք է փոխվի ընտրություններով:

Ավագանու ընտրություններն այլ են։ Բնական է, որ իրեն հարգող քաղաքական ուժը չի կարող չմասնակցել դրանց: Կարծում եմ, որ այս ընտրություններում մրցակցությունը շատ ավելի թեժ է լինելու: Վարչական ռեսուրսը թեեւ սկսվել է մեծ թափով կիրառվել, սակայն մեր խնդիրն է պայքարել դրա դեմ»,- հայտարարեց Ա.Վարդանյանը:

ՆԱԻՐԱ ԽԱՉԱՏՐՅԱՆ
«ՀԱՅՈՑՂ ԱՇԽԱՐՀ»

Որտեղ կլինի Րաֆֆի Հովհաննիսյանը՝ ապրիլի 9-ին

ՀՅԴ-ն դեռ չի որոշել՝ մասնակցե՞լ Սերժ Սարգսյանի երդմնակալությանը, թե՝ ոչ «Պոստ սկրիպտում» մամուլի ակումբում այսօր խոսելով ներքաղաքական իրավիճակի եւ Սերժ Սարգսյան-Րաֆֆի Հովհաննիսյան նամակագրության, դրա հետագա զարգացումների մասին, ՀՅԴ խմբակցության քարտուղար Աղվան Վարդանյանն ասաց. «Մենք ունենք մի իրավիճակ, որը պահանջում է հանգուցալուծում: Ինչ-որ մի բան տեղից շարժվել է: Մեզ համար հիմնականը այն լուծումներն են, որոնք փոփոխություններ կբերեն: Գործող իշխանությունը պակաս պատասխանատվություն չպետք է ունենա՝ իրավիճակից դուրս գալու համար»:

ՀՅԴի-ի առաջարկություններն արդեն բոլորը գիտեն. դրանք այն յոթը կետերն են, որ առաջարկվել էին դեռ նախագահական ընտրություններից առաջ: Ինչով կավարտվի այս ամենը, Վարդանյանը չի կանխատեսում. «Կապրենք՝ կտեսնենք»: ՀՅԴ-ն գնալո՞ւ է Սերժ Սարգսյանի երդմնակալության արարողությանը՝ նույնպես՝ «կապրենք՝ կտեսնենք»:

Լրագրողներից մեկն էլ հետաքրքրվեց՝ հնարավո՞ր է ՀՅԴ-ն մասնակցի Ազատության հրապարակում կայանալիք Րաֆֆի Հովհաննիսյանի երդմնակալության արարողությանը:

Վարդանյանը պատասխանեց.«Դուք ինձ կարո՞ղ եք ասել, թե ապրիլի իննին որտեղ կլինի Րաֆֆի Հովհաննիսյանը: Ես չգիտեմ, թե ապրիլի իննին ի՞նչ կլինի: Ընտրությունները ավարտվել են, դաշնակցությունն արել է հայտարարություններ: Մենք այն տեսակը չենք, որ միկրաֆոն տեսնենք, վազենք , գնանք դա օգտագործենք: Աբսուրդ կլինի, եթե մենք գնանք Ազատության հրապարակում ասենք մի բան, իսկ Րաֆֆի Հովհաննիսյանն այլ բան»:

Վարդանյանը նաեւ հիշեց մի միջադեպ՝ ՀՅԴ-«Ժառանգություն» հարաբերություններում. երբ Րաֆֆի Հովհաննիսյանը խոստացել էր իր ծրագիրը ներկայացնել, «Ժառանգությունից» ՀՅԴ-ին հարցրել էին՝ հնարավո՞ր է այդ օրը ցանկանան հարթակից ելույթ ունենալ: ՀՅԴ-ում տարակուսել էին՝ թե առանց Րաֆֆիի աելիքը իմանալո՞ւ… Աղվան Վարդանյանը նկատեց, որ դեռ Րաֆֆի Հովհաննիսյանի ասելիքն ու քայլերը իրենց համար հստակ եւ տեսանելի չեն. «Մենք այսօր էլ շարժման հետ ենք, ժողովրդի հետ ենք, և եթե ասելիք կունենանք՝կասենք»,-վստահեցրեց նա՝ հավանաբար նկատի առնելով Րաֆֆի Հովհաննիսյանի հետագա հնարավոր քայլերի տրամաբանությունը:

ՀՅԴ-ի խորհուրդը ՕԵԿ-ին` «Անհնար է նստած վազել, հարկավոր է ճիշտ երազել»

«Երազելը վատ բան չէ»,- այսօր «Պոստ սկրիպտում» մամուլի ակումբում պատասխանելով լրագրողներից մեկի հարցին՝ ասաց ՀՅԴ խմբակցության քարտուղար Աղվան Վարդանյանը՝ հիշելով Գարուշ Հարյանցի բանաստեղծության հետեւյալ տեղերը. «Անհնար է նստած վազել, հարկավոր է ճիշտ երազել»:

Այս համեմատությունը առաջացրեց լրագրողների ծիծաղը: Հիշեցնենք, որ այսօր մամուլի ասուլիսում Երեւանի ավագանու ընտրություններում ՕԵԿ համամասնական հորիզոնականը զբաղեցնեղ, Արաբկիրի նախկին թաղապետ Հովհաննես Շահինյանը հայտարել է, որ քաղաքային ընտրություններում հիմնական պայքարը գնալու է ՀՀԿ-ի նեւ ՕԵԿ-ի միջեւ, թեեւ այդ ընտրութուններին մասնակցում են նաեւ չորս ընդդիմադիր ուժեր: Հովհաննես Շահինյանը նաեւ գովասանքի խոսքեր էր հնչեցրել գործող քաղաքապետ, ՀՀԿ-ի քաղաքապետի թեկնածու Տարոն Մարգարյանի հասցեին:

«Թող մրցակցեն: Թող ՀՀԿ-ն ու ՕԵԿ-ը մրցակցեն: Ես վստահ եմ, որ այդ մրցակցությունը ՀՀԿ-ի եւ ՕԵԿ-ի միջեւ դուք բազմիցս տեսել եք»,- հեգնեց Աղվան Վարդանյանը՝ ի՞նչը նկատի ունեք հարցին առավել խրոխտ ձայնով պատասխանելով. «Նկատի ունեմ մրցակցությունը ՀՀԿ-ի եւ ՕԵԿ-ի միջեւ»: Վարդանյանը գտնում է, որ ՕԵԿ-ականի այդ գնահատականը բացարձակապես իրականության հետ կապ չունի՝ անկախ նրանից, թե ո՞վ եւ հիմա որտեղի՞ց է դա ասում: Նա հավանաբար նկատի ուներ այն, որ Հովհաննես Շահինյանը նախկին ՀՀԿ-ական է: Եթե Տարոն Մարգարյանն այսօր որեւէ թերություն չունի, ապա Վարդանյանի համար առնվազն անհասկանալի են ՕԵԿ-ի առաջին համարի հայտարարությունները, որ իրենք գալիս են հաղթելու եւ քաղաքապետարանը վերցնելու:

Ի դեպ, Աղվան Վարդանյանը ՕԵԿ-ի ցուցակի առաջին համարին՝ Արմեն Երիցյանին լավ է վերաբերվում եւ գտնում է, որ նա կառավարման համակարգում լավ է աշխատում: Ինչ մնում է Տարոն Մարգարյանին. «Տարոն Մարգարյանը ժամանակի պայմաններում եղել է շատ լավ թաղապետ Ավանում, կարծում եմ, որ այս ընտրություններից հետո ինքը նորից կարող է վերադառնալ եւ Ավանում լավ թաղապետ լինել»:

Նելլի ԳՐԻԳՈՐՅԱՆ
«ԱՌԱՎՈՏ»