Ազգային ժողովի 4-րդ գումարման պատգամավոր, ՀՅԴ-ական Հրայր Կարապետյանը Tert.am-ի հետ զրույցում անդրադարձել է իր՝ Սանկտ Պետերբուրգում և ՌԴ հյուսիսային շրջաններում ՌԴ հյուպատոս նշանակվելուն և ի պատասխան հարցի, թե ո՞ւմ կողմից է եղել առաջարկը, հայտարարել է. «Ինձ առաջարկ է եղել իշխանությունների կողմից: Բնականաբար, սա այն պաշտոնն է, որ չի կարող առանց հանրապետության նախագահի հետ համաձայնեցվելու այսպիսի առաջարկ արվել: Քանի որ ես ոչ մի քաղաքական պաշտոն չեմ զբաղեցնում, ընդամենը համալսարանում դասախոս եմ աշխատել այս 1,5 տարիների ընթացքում, երբ Ազգային ժողովից դուրս եմ եկել և չեմ ցանկացել այլևս պատգամավոր ընտրվել, ազատ էի ընտրություն կատարելու հարցում, որովհետև գլխավոր հյուպատոսի պաշտոնը հայեցողական պաշտոն է»:

-Պարոն Կարապետյան, Սանկտ Պետերբուրգում և ՌԴ հյուսիսային շրջաններում գլխավոր հյուպատոս նշանակվելը ևս Ձեր ցանկությո՞ւնն էր, ինչպես Վահան Հովհաննիսյանի պարագայում:

-Ինձ առաջարկ է եղել իշխանությունների կողմից:

-Իշխանությունների ո՞ր թևի:

-Բնականաբար, սա այն պաշտոնն է, որ չի կարող առանց հանրապետության նախագահի հետ համաձայնեցվելու այսպիսի առաջարկ արվել: Քանի որ ես ոչ մի քաղաքական պաշտոն չեմ զբաղեցնում, ընդամենը համալսարանում դասախոս եմ աշխատել այս մեկուկես տարիների ընթացքում, երբ Ազգային ժողովից դուրս եմ եկել և չեմ ցանկացել այլևս պատգամավոր ընտրվել, ազատ էի ընտրություն կատարելու հարցում, որովհետև գլխավոր հյուպատոսի պաշտոնը հայեցողական պաշտոն է: Իհարկե՛, նաև խորհրդակցել եմ կուսակցության ղեկավարության հետ, նրանք էլ դեմ չեն եղել, և ես համաձայնել եմ աշխատել, մանավանդ որ պատգամավոր եղած տարիներին շուրջ 10 տարի Սանկտ-Պետերբուրգում աշխատել եմ միջխորհրդարանական վեհաժողովի պաշտպանության հանձնաժողովում, նաև եղել եմ հանձնաժողովի նախագահի տեղակալ, ինչպես նաև Հայաստանի խորհրդարանը ներկայացրել եմ ՀԱՊԿ-ի վեհաժողովում, ծանոթ եմ համայնքին, որպես ԱԺ նախկին փոխխոսնակ բազմաթիվ հանդիպումներ եմ ունեցել Սանկտ Պետերբուրգի հայկական համայնքի հետ, նրանք ինձ են ճանաչում, ես՝ իրենց: Այնպես որ, կարծում եմ, որ հավանաբար հաշվի են առել նաև այդ տարիների աշխատանքի իմ փորձը: Կարծում եմ, որ սա հարմար առիթ է իմ փորձը և փորձառությունը ծառայեցնելու մեր երկրի արտաքին քաղաքական մարտահրավերներին և ընդհանրապես մեր երկրին ու ժողովրդին:

-Վահան Հովհաննիսյանի դեպքում ինքը նշեց թուրքական լոբբինգի մեծ առկայությունը Գերմանիայում , այդ առումով ի՞նչ խնդիրներ եք տեսնում:

-Ճիշտն ասած, ես Վահան Հովհաննիսյանի փոխարեն չեմ կարող պատասխանել:

-Կոնկրետ Սանկտ-Պետերբուրգում Ձեր, այսպես ասած, առաքելության շրջանակներում:

-Դաշնակցությունն այն կուսակցությունն է, որի համար, անկախ նրանից, ընդդիմությո՞ւն է, թե իշխանության մաս, շատ կարևոր է երկրի և ազգի շահը: Մենք երբեք չենք մտածել այնպես, թե որքան վատ, այնքան լավ, մեզ համար այդ բոլշևիկյան կարգախոսը երբեք նշանակություն չի ունեցել: Արտաքին քաղաքականության մեջ բազմաթիվ մարտահրավերներ կան, որտեղ, այո, դաշնակցականներն էլ իրենց փորձառությամբ կարող են օգտակար լինել և իրենց ծառայությունները մատուցել ժողովրդին: Վահան Հովհաննիսյանի դեպքն էլ այս դեպքերից մեկն է: Կարծում եմ, այս խնդիրն էլ կլուծվի, և նա կնշանակվի Գերմանիայում ՀՀ դեսպան:

-Պարոն Կարապետյան, հիշո՞ւմ եք, Վահան Հովհաննիսյանի հասցեին քննադատություն հնչեց Արմեն Ռուստամյանի այն հայտարարության ֆոնին, որ այս ընդդիմությունը այդպես էլ չհասկացավ, որ իշխանափոխությանը հասնել հնարավոր չէ ընտրությունների միջոցով և դրա հետ կապված այն թեզն էր առաջ քաշվում, որ դաշնակցական տերմինաբանությամբ ասած՝ բջիջներով այլևս ներդրվում եք իշխանության մեջ…

-Ես արդեն պաշտոնապես դիվանագետ եմ, և չեմ կարող այդպիսի ներքին քաղաքական մեկնաբանություններ տալ, ես ձեռնպահ կմնայի և կարծում եմ, որ նման հարցերով լավ կլինի դիմեք պարոն Ռուստամյանին: Ես կարող եմ խոսել միայն տարածաշրջանային խնդիրներից, ես ոչ միայն Սանկտ Պետերբուրգի, այլև Ռուսաստանի հյուսիսային շրջանների գլխավոր հյուպատոսն եմ, Կալինինգրադի մարզից մինչև Արխանգելսկ, ուստի դիվանագիտական հարցերի շուրջ կխոսեմ, բայց ներքին քաղաքական հարցերի վերաբերյալ դիմեք պատկան մարմիններին;

-Իսկ Ձեր պաշտոնավարումն ու առաքելությունը ե՞րբ եք սկսելու: Ժամկետներ նշանակվա՞ծ են:

-Այո, եկող շաբաթ լինելու եմ տեղում, ներկայանամ հյուպատոսարան, նաև արդեն պրոտոկոլային հանդիպումներ սկսեմ ունենալ տեղում՝ նահանգապետերի, հայկական համայնքի ակտիվի հետ և այլն:

-Իսկ Մաքսային միությանը մեր անդամակցության վերաբերյալ ի՞նչ կասեք: Կար կարծիք, որ սա Հայաստանի ինքնիշխանության համար մասնակի կորուստ է և երեկ Հայաստանում ՌԴ դեսպան Վոլինկինը հայտարարեց, որ Հայաստանը ՄՄ մտնելով ինքնիշխանության կորուստ է ունենալու, ինչպես Ռուսաստանը և անդամ մյուս պետությունները:

-Ես չեմ կարծում, որ կա ինքնիշխանության կորուստ, որովհետև ոչ միայն այն պետությունները, որոնք այսօր Մաքսային միություն են կազմել, այլև բազմաթիվ այլ պետություններ, օրինակ՝ Հնդկաստանը, Չիլին և այլն, դիմել են Մաքսային միության անդամ դառնալու համար և, կարծում եմ, այս ցանկը դեռ կշարունակվի։ Եվ բացառում եմ, որ այդ երկրներից որևէ մեկը իր ինքնիշխանությունը հարցականի տակ է դնում, այդ թվում և՝ Հայաստանը: Ուղղակի Ձեզ հայտնի պատճառներով, այդ մասին շատ է խոսվել, այսօր Հայաստանի ազգային-պետական շահերից է բխում, որպեսզի Հայաստանը մաս դառնա Մաքսային միությանը: Փաստարկները բազմաթիվ են՝ սկսած անվտանգության խնդիրներից, վերջացրած տնտեսական ու սոցիալական խնդիրներով: Ու կարծում եմ՝ եղած որոշումների մեջ ամենաճիշտ խնդիրը սա էր:

tert.am