Աղվան Վարդանյանը՝ սահմանադրական բարեփոխումների մասին
ԱԺ «Հայ Յեղափոխական Դաշնակցություն» խմբակցության քարտուղար Աղվան Վարդանյանը Tert.am-ի հետ զրույցում խոսելով սահմանադրական բարեփոխումների մասնագիտական հանձնաժողովի վերջնական եզրահանգումից, ըստ որի՝ առաջարկվում է անցում խորհրդարանական համակարգին, նկատեց, թե այլ կերպ չէր էլ կարող լինել, քանի որ հակադիր երկու նախագիծ չի կարող լինել:
Իսկ ներքին և արտաքին անվտանգության հետ կապված մտահոգությունների մասով ՀՅԴ պատգամավորը նշեց, որ մասնագիտական հանձնաժողովը կգտնի լուծումներ. «Խորհրդարանական համակարգն ունի բազմաթիվ տարբերակներ, բազմաթիվ լուծումներ, և կա միջազգային փորձ ու հեծանիվ չենք հայտնագործում»:
Ինչ վերաբերում է լայն կոնսոլիդացիայի բացակայությանը, ապա Աղվան Վարդանյանը նշեց, որ հանրաքվեն կորոշի՝ հասարակությունը կոնսոլիդացվա՞ծ է, թե՞ ոչ:
– Պարո՛ն Վարդանյան, սահմանադրական բարեփոխումների մասնագիտական հանձնաժողովը վերջնական եզրահանգում է կատարել և ընտրել խորհրդարանական մոդելը, ինչին կողմ էր նաև Դաշնակցությունը…
-Այստեղ նոր բան չկա, հաստատվել էր հայեցակարգը, որը խորհրդարանական համակարգ ուղղորդող հայեցակարգ է, ուղղակի ՀՀ Նախագահը երկու խնդիր էր առաջարկել, որ քննարկեն և լուծումներ գտնեն՝ մեկը անվտանգության պաշտպանողականության հետ կապված խնդիրն էր, մյուսը՝ կառավարման ներքին կայունության խնդիրը, և ես վստահ եմ, որ հանձնաժողովն այդ ուղղությամբ աշխատում է: Մյուս խոսակցություններին մենք անդրադարձել ենք, որ չի կարող լինել հակադիր երկու նախագիծ և տեղյակ էինք, որ հանձնաժողովն աշխատում է խորհրդարանական համակարգի նախագծի վրա:
-Իսկ Նախագահի արտահայտած մտավախությունները տվյալ համակարգով պայմանավորված ինչպե՞ս պետք է լուծում գտնեն:
– Նախագահն ասել է այո՛, պառլամենտական համակարգի պարագայում կան խնդիրներ, մտավախություններ կան, բայց խորհրդարանական համակարգն ունի բազմաթիվ տարբերակներ, բազմաթիվ լուծումներ, և կա միջազգային փորձ, ու մենք հեծանիվ չենք հայտնագործում: Բնականաբար մասնագիտական հանձնաժողովն աշխատում է նաև այնպիսի մեխանիզմներ դնել Սահմանադրության մեջ, որպեսզի այս մտահոգությունները հնարավորինս փարատվեն, և մենք համոզված ենք, որ այդ լուծումները կգտնենք:
-Շատերը պնդում են, թե լայն կոնսոլիդացիա չկա, այս պարագայում ի՞նչ կասեք, օրինակ՝ խմբակցությունների հիմնական մասն այդպես էլ առաջարկություններ չի ներկայացրել:
-Ես լայն կոնսոլիդացիա ասածն այդքան էլ չեմ հասկանում, մանավանդ մեր քաղաքական համակարգի պայմաններում՝ միշտ կարելի է իրավիճակից ելնելով այսօր մի բան ասել, վաղը՝ մեկ այլ բան, դա չի նշանակում լայն կոնսոլիդացիա, որ բոլոր քաղաքական ուժերը պետք է համակարծիք լինեն, կոնսոլիդացիայի խնդիրը գալիս է հանրաքվեի ժամանակ: Եթե առաջիկայում մասնագիտական հանձնաժողովը կավարտի Սահմանադրության տեքստի մշակումը, քննարկումները կավարտվեն, բնականաբար, այդ նախագիծը կգա խորհրդարան, խորհրդարանում երկար քննարկումներ կունենանք, և եթե մենք իսկապես պատրաստ լինենք հանրաքվեի, հանրաքվեն կորոշի՝ հասարակությունը կոնսոլիդացվա՞ծ է, թե՞ ոչ:
-Բովանդակային քննարկումները բավարա՞ր եք համարում, նույն հասարակության համար:
-Եթե դու ուզում ես քննարկել՝ քննարկում ես, մենք՝ Դաշնակցությունը, իր մասով ոչ միայն քննարկումներ ենք արել, այլ նաև նախաձեռնությամբ ենք հանդես եկել, առաջարկություններ ենք ներկայացրել, հանձնաժողովի հետ ենք քննարկումներ անցկացրել: Եթե մարդիկ կան, որոնք չեն ուզում քննարկել, թեև վերջերս նրանք թիվը էապես պակասել է՝ սա ուրիշ խնդիր է: Բայց կրկնում եմ, սա առաջին փուլն է, ներքին քննարկումները, մասնագիտական հանձնաժողովը, քաղաքական ուժերը: Կգա երկրորդ փուլ՝ բաց, հրապարակային, հանրային քննարկումներ:
