Տավուշի մարզում ՀՅԴ ԳՄ ներկայացուցիչ Աղվան Վարդանյանը, ԳՄ անդամ Աշոտ Փափազյանն ու ԳՄ կազմակերպական լիազոր մարմնի անդամ Արտակ Սարգսյանը հանդիպեցին կուսակիցների ու համակիրների հետ, մասնավորապես` եղել Այրումում, Բաղանիսում, Կողբում, Իջևանում: Քննարկումներ ծավալվեցին երկրի առջև ծառացած խնդիրների, մարդկանց սպասելիքների վերաբերյալ:
Աղվան Վարդանյանն իր խոսքում անդրադարձավ Հայաստանի 25-ամյա անկախ պետականությանը, ՀՅԴ-ի քաղաքական ուղեգծին: Նրա խոսքով` քաղաքական ուժերի ու կուսակցությունների, իշխանության և ընդդիմության հանդեպ կա անվստահություն, և մարդիկ շատ հաճախ իրենց հույսը չեն կապում քաղաքական ուժերի հետ, բայց աշխարհում այլ մեխանիզմ չկա` երկիրը կառավարելու, որովհետև ղեկավարման մեկ ձև կա` ընտրություններ, որին մասնակցում են քաղաքական ուժերը` իրենց մարդուժով, իրենց ծրագրերով, գաղափարներով, և, կախված նրանից, թե ով է իշխանության ղեկին, այդպիսին էլ լինում է երկրի վիճակը:
Այրումի բնակիչներից մեկը մտահոգված էր քաղաքի զարգացման` կառավարության նախատեսած ծրագրերի արդյունավետությամբ: Նա ասաց, որ բնակչությունը իրազեկված չէ, թե ինչ ծրագիր է իրականացվում քաղաքում, և որ ծրագրերի արդյունավետության խնդիր կա: «Կարող է 2-3 միլիոնանոց ծրագիր իրականացվել, բայց` անարդյունավետ, բայց բավական է 10-15 հազար դոլար ներդրում արվի ճիշտ ուղղությամբ, և մարդիկ կսկսեն շնչել»,- ասաց Այրումի բնակիչը:
Աղվան Վարդանյանը նշեց, որ ուրախ կլինեն, որ դաշնակցական նախարարների գործունեությունը լինի մանրադիտակի տակ, որովհետև վստահ են նրանց գիտելիքներին ու կարողություններին, խղճին ու ազնվությանը: Նա հավելեց, որ դաշնակցական նախարարներից երկուսի` էկոնոմիկայի նախարարի ու տարածքային կառավարման նախարարի գործունեությունը կապված է բնակչի բարձրացրած` այդ կարգի հարցերի հետ:
Թե’ Այրումի, թե’ Բաղանիսի, թե’ Իջևանի բնակիչները բարձրացրեցին աշխատատեղերի ու համայնքների խոշորացման հետ կապված մտահոգություններ: Ի պատասխան, Աղվան Վարդանյանն ընդգծեց, որ համայնքների խոշորացումը ժամանակի պահանջ է, և փոքր երկրում 930 համայնք ունենալը ճիշտ չէ, այդպես հնարավոր չէ օպտիմալ կառավարում իրականացնել, իսկ համայնքների միավորումը պետք է ճիշտ կատարել` և’ աշխարհագրական, և’ պատմական, և’ հոգեբանական, և’ սոցիալ-տնտեսական առանձնահատկությունների առումով:
Բնակիչները մտահոգված էին, որ համայնքների միավորումը հավասարաչափ չի տեղի ունենում` մի տեղ երկու գյուղ է միավորվում, մել այլ տեղ` 6-7 գյուղ: Բաղանիսի բնակիչներից մի քանիսն էլ, որպես կոմպրոմիսային լուծում, առաջարկեցին ընտրել միջհամայնքային համագործակցության մոդելը:
ԳՄ ներկայացուցիչները եղան նաև Կողբի գեղարվեստական դպրոցում ու ծանոթացան սաների աշխատանքներին:
Իջևանում ԳՄ ներկայացուցիչները հանդիպեցին ՀՅԴ Իջևանի կառույցի անդամների հետ: Քննարկվեցին նոր դիմումագրերը, կուսակցաշինության վերաբերող մի շարք հարցեր: Նշվեց, որ կուսակցությունն ակտիվորեն մասնակցելու է առաջիկա ՏԻՄ ընտրություններին:
