ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը այսօր խորհրդարանում լրագրողների հետ զրույցի ժամանակ նշեց, որ ՀՅԴ-ն իր տեսակետները հայտնել է և կողմ է քվեարկելու 2017 թվականի բյուջեի նախագծին: Անդրադառնալով Դաշնակցության՝ ընտրություններին մասնակցելու ձևաչափին Ռուստամյանը նշեց, որ հակված են գնալ առանձին՝ինչպես միշտ է եղել:
«Ինչ-որ նոր բան չկա, որ մեզ ստիպի գնալ դաշինքով: Հետագայում կերևա, բայց քանի մի քիչ ժամանակ կա և դեռ հայտնի չէ ընդհանրապես՝ ով է հայտ ներկայացնելու, ինչ ծրագրերով և ովքեր են խաղի մեջ մտնելու դրա մասին խոսելը վաղ է»,- ասաց Ռուստամյանը: Ինչ վերաբերում է ՀՀԿ-ի հետ համագործակցությանը, Ռուստամյանը նշեց, որ ՀՀԿ-ի հետ համագործակցությունը կախված չի ո՛չ ընտրությունների հետ, ո՛չ էլ կառավարության ձևավորման գործընթացի հետ:
«Մենք այդ համագործակցության մասին հայտարարել ենք նպատակները հռչակելով և այդ նպատակների շուրջ է, որ մենք համագործակցում ենք: Դա կապված չի որևէ այլ ձևաչափի հետ»,- ասաց պատգամավորը, ապա հավելեց. «Մեր համագործակցության մեջ ժամկետներ չկան: Շատ հստակ արձանագված է համագործակցության ընդհանուր տրամաբանությունը: Այն հիմնականում վերաբերում է սահմանադրական փոփոխությունները կյանքի կոչելու պրոցեսներին: Սա մեծ գործընթաց է, որ պետք է տեղի ունենա հստակ ժամանակահատվածներով, որոնք արձանագրված են Սահմանադրության անցումային դրույթներում»:
Լրագրողները դաշնակցական գործչից հետաքրքվեցին, թե ինչ կարծիքի է Սերժ Թանկյանի հայտարարություններին /հիշեցնենք Սերժ Թանկյանը հայտարարել է թե Հայաստանում ընտրությունները թափանցիկ չեն և ինքը ապրիլին գալու է Հայաստան՝ ընտրական գործընթացներին հետևելու/:
«Ես շատ ուրախ եմ, որ Սերժ Թանկյանն էլ է ուզում մասնակցել ընտրություններին՝ որպես դիտորդ: Ես վստահ եմ, որ նա իսկապես կտեսնի, որ աննախադեպ ընտրություններ տեղի կունենան, որովհետև այն ինչ-որ մենք փոխել ենք ընտրական համակարգի մեջ նախադեպը չունի»,- ասաց նա:
Ըստ Ռուստամյանի՝ բոլոր այն խնդիրները, որոնք կապված էին իշխանությունների վերարտտադրության մեխանիզմները արմատախիլ անելու հետ դրանք կատարել են և այսօր իսկապես ունենք մի ընտրական համակարգ, որով կարող է թե՛ ընտրությունները անցնեն այնպես, որ իշխանությունները պահպանեն իրենց դիրքերը վերընտրվելով ոչ թե վերարտադրվելով, թե՛ նաև ընդդիմությունը կարողանա հաջողել ընտրություններում և իշխանափոխություն իրականացնել:
«Բոլոր այդ կեղծիքների դռները, որոնք որ մինչև հիմա բաց էին և հիմնականում դա կատարվում էր բազմակի քվեարկությունների միջոցներով դրանց դեմը առնող մեխանիզմները մենք ամրագրել ենք և այս ընտրությունները իսկապես աննախադեպ են լինելու»,-ասաց պատգամավորը: Ռուստամյանը կարևորեց նաև ան փաստը, որ ընդդիմության համար նախատեսվել է նվազագույն մանդատների քանակ և որ անկախ ընտրությունների արդյունքներից ընդդիմությունը խորհրդարանում կունենա մեկ երրորդից ոչ պակաս ներկայացվածություն:
«Մենք կունենանք մի նոր քաղաքական համակարգ, որ իշխանությունները զսպված են լինելու, որովհետև չի լինելու մեկը, որ ունենա այսօրվա նախագահի լիազորությունները: Սահմանադրորեն նախատեսված իշխանության երեք ճյուղերը տարանջատված են լինելու և ամենակարևորը ընտրությունները տալու են հնարավորություն՝ ձևավորելու ընդդիմություն իշխանություն իրար հակակշռող մի համակարգ, որը Հայաստանում երբեք չի եղել»,- ընդգծեց Ռուստամյանը:
Արմեն Ռուստամյանն ասաց, որ քաղաքականության մեջ ամեն ինչ հնարավոր է, այդ թվում` Գագիկ Ծառուկյանի վերադարձը քաղաքականություն: Պատգամավորը դա շատ նորմալ է համարում:
Երբ լրագրողները նշեցին, որ, ըստ Նաիրա Զոհրաբյանի, ընդդիմադիր ուժերը սպառել են «դեղատների վալերիանկայի պաշարները», Ռուստամյանը նշեց, որ իրենք նորմալ են վերաբերվում Ծառուկյանի վերադարձին, իսկ թե ովքե՞ր են «վալերիանկա խմում, թող իրենք որոշեն, թե ինչու են խմելու»:
«Դա նրանց գործն է, իսկ մենք բոլորի հետ համագործակցելու փորձ ունենք, այդ թվում` նաև պարոն Ծառուկյանի: Մենք որևէ խնդիր չենք տեսնում` նրա վերադարձի հետ կապված: Ընդհակառակը՝ բոլոր նրանք, ովքեր կարող են, ունակ են ազդել քաղաքական պրոցեսների վրա, ավելի լավ է` հրապարակ գան, քան մնան ստվերում»,- հայտարարեց Ռուստամյանը:
Հարցին` Սերժ Սարգսյանի հայտնի ելույթից հետո, երբ Ծառուկյանը հեռացավ, հիմա վերադառնալով` ունակ կլինի՞ ազդել քաղաքականության վրա, Ռուստամյանը պատասխանեց. «Դա ինքը կորոշի, պարոն Ծառուկայնի գործն է դա: Ես կարծում եմ, որ մենք պետք է անցած համարենք այն էտապը, որ որևէ մեկը որևէ տեղ գնալու համար պետք է որևէ մեկից թույլտվություն խնդրի: Ես համարում եմ` սա մեր մեծ ձեռքբերումն է, որ ցանկացած քաղաքական գործիչ, ցանկացած քաղաքական ուժ իր անելիքները ազատորեն պիտի որոշի: Այս պարագայում խոսքը վերաբերում է Գագիկ Ծառուկյանին էլ. նա է որոշելու, որովհետև իր որոշումը պետք է կայացնի ինքնուրույն, ազատորեն, որևէ ճնշումներից դուրս: Սա շատ ավելի կարևոր նվաճում է»:
Ըստ Ռուստամյանի` թե մինչև հիմա ի՞նչ է եղել, կողմերը պետք է մտածեն, վերլուծություն անեն, և ամեն մեկն ինքը պետք է իր արած հայտարարությունների համար պատասխան տա, թե ինչու էին դա հայտարարում, եթե որոշ ժամանակ հետո պետք է իրավիճակը փոխվեր, և այլ հայտարարություններ անեին, այդ մարդիկ պետք է իրենց հայտարարությունների տերը լինեն:
«Դաշնակցության տեսակետը, անկախ որևէ բանից, չի փոխվում, սա է ամենակարևորը: Մեր հայտարարություններում մենք մեզ չենք հակասում: Մեր նախորդ հայտարարությունը հաջորդին չի հակասում»,- ասաց նա:
Արմեն Ռուստամյանից հետաքրքրվեցին, թե ինչպե՞ս է ստացվել, որ կողմ է քվեարկել ԱԺ «Ժառանգություն» խմբակցության պատգամավոր Զարուհի Փոստանջյանի հեղինակած՝ «Ժողովրդի ապստամբության իրավունքի վերաբերյալ» օրենքի նախագծին:
«Դաշնակցության սկզբունքային մոտեցումն է, որ մենք կողմ ենք քվեարկում բոլոր նախաձեռնություններին, որ մտնեն օրակարգ և քննարկվեն, մենք դրան ենք կողմ քվեարկել»,- ասաց Ռուստամյանը:
Ըստ նրա՝ մարդիկ չեն հասկացել, որ վաղը նոր խորհրդարան է լինելու, նոր սահմանադրակարգ է լինելու, բոլոր նախագծերն ավտոմատ մտնելու են խորհրդարան` քննարկման, և իրենք այդ տրամաբանությամբ են գնում: «Ես ընդհանրապես չեմ հասկանում նրանց, ովքեր դեմ են քննարկում նրան, որ հարցը մտնի քննարկման: Մենք բովանդակությանը չենք քվեարկում, չէ՞»,- ասաց պատգամավորը:
Ռուստամյանը նշեց, որ հում վիճակով բազմաթիվ նախագծեր են բերվել քվեարկության, բայց կարևոր գաղափար է եղել, որը ճիշտ չի ներկայացվել, իսկ քննարկումների ժամանակ միս ու արյուն է ստացել, դարձել նորմալ նախագիծ:
«Մենք կողմ ենք, որ որևէ նախագիծ, որն ինչ-որ մի պատգամավորի մտքում ծագում է, մտնի ԱԺ, քննարկվի: Այդ քննարկման արդյունքում կա’մ կողմ լինեն, կա’մ դեմ լինեն, բայց դեմ լինել, որ ընդհանրապես չքննարկվի, ես դա չեմ հասկանում»,- շեշտեց նա:
Դիտարկմանը՝ ձեր կոալիցիոն ընկերները միշտ այդպես են անում, Ռուստամյանն արձագանքեց, որ Հանրապետականը գիտի ՀՅԴ-ի տեսակետը: «Մենք որևէ ձևով չենք կարող կաշկանդել որևէ հարցի քննարկումը, դա ճիշտ չէ»,- եզրափակեց պատգամավորը:
