Թեպետ քաղաքական դաշտում բոլորն են խոսում առաջիկա խորհրդարանական ընտրություններից, բայց այդպես էլ անհայտ է, թե երբ կկայանա այն, ովքեր կմասնակցեն ու ինչպիսի ձեւաչափով: Իսկ արտահերթ խորհրդարանական ընտրություններ անցկացնելու հարցում նոր իշխանությունները կարծես կանգնած են խնդրի առաջ` ուշ անցկացնեն` վարկանիշի խնդիր կունենան« շուտ անցկացնեն` չեն հասցնի նախապատրաստվել: Այս եւ այլ հարցերի շուրջ «Իրավունքը» զրուցեց ՀՅԴ Գերագույն մարմնի անդամ, քաղաքագետ Արթուր Ղազարյանի հետ:
– Պարոն Ղազարյան, կարելի՞ է ասել, որ ժամանակն աշխատում է իշխանության դեմ, եւ եթե ընտրություններն այս տարի չկայանան, Նիկոլ Փաշինյանն ու իր թիմը չեն կարողանա հավաքել անհրաժեշտ հաղթական ձայների քանակը:
– Այդ տեսակետը չեմ կիսում, որովհետեւ այս փուլում մի մասն էլ ասում է, որ դեռեւս պետք է ժամանակ շահել, որովհետեւ իրականում, եթե ընտրություններին փորձում են լուրջ նախապատրաստվել, այսինքն` հնարավորինս արդար, գաղտնի, ժողովրդավարական ընտրություններ անցկացնել, ապա այն լուրջ նախապատրաստական աշխատանքների կարիք ունի: Ինչ վերաբերում է նրան, թե իշխանություններն իրենց վարկանիշը կկորցնեն, թե` ոչ, չեմ կարծում, որ այսօր կարելի է ինչ-որ գնահատականներ տալ: Այս պահի դրությամբ` իշխանությունն իր գործն է անում, կառավարության ծրագիրը հաստատվել է, ընտրական օրենսգրքի փոփոխություններն առաջնահերթ կարգով քննարկվում են, եւ զուգահեռաբար փորձում են կոռուպցիայի դեմ պայքարել, նախկին չարաշահումները բարձրաձայնել: Այս ամենով հանդերձ` իշխանությունները դեռեւս, չեմ կարծում, թե շտապողականություն պետք է հանդես բերեն:
– Ձեր կարծիքով` արտահերթ խորհրդարանական ընտրությունների անցկացման ողջամիտ ժամկետը ե՞րբ է:
– Երեւի թե, մեկ տարվա կտրվածքով պետք է լինի, բայց մինչ այդ պետք է քաղաքական դաշտը նախապատրաստել, ընտրական օրենսգրքի փոփոխությունները համաձայնեցնել քաղաքական այլ ուժերի հետ, որպեսզի հնարավորություն ընձեռվի արտախորհրդարանական ուժերին եւս նախապատրաստվել, եթե իսկապես ցանկանում ենք, որ ընտրությունները լինեն ժողովրդի ազատ կամարտահայտությամբ:
– Կան տեսակետներ, որ հիմնական նախընտրական պայքարը լինելու է Նիկոլ Փաշինյանի ՔՊ-ի եւ «Ծառուկյան» դաշինքի միջեւ: Ի՞նչ կասեք այս մասին:
– Դժվար է ասել, որովհետեւ դեռեւս քննարկումների փուլում է, թե «Ելք» դաշինքը հանդես կգա դաշինքով, այսինքն` նրանք կմիանան, թե` ոչ: Բացի այդ, չմոռանանք, որ խորհրդարանում կա նաեւ ՀՅԴ-ն, ՀՀԿ-ն, ինչպես նաեւ արտախորհրդարանական որոշակի ուժերում նոր-նոր վերադասավորումներ են տեղի ունենում, եւ ինչ-ինչ հանգամանքների բերումով` նրանք կարող են լուրջ հայտ ներկայացնել: Այն, որ դաշտը բաց է, շատ քաղաքական ուժեր կփորձեն, թեթեւակի սիրտ շահելով կամ իրենց գաղափարները ներկայացնելով, որոշակի էլեկտորատ իրենց կողմը քաշել:
– Ամեն դեպքում, չե՞ք կարծում, որ այսօր Նիկոլ Փաշինյանի թիմն ու «Ծառուկյան» դաշինքը միմյանց դիրքերը թուլացնելու խնդիր ունեն:
– Որպես քաղաքական ուժ, այսօր բոլորն էլ փորձում են պայքարի դուրս գալ, եթե արդեն դուրս չեն եկել: Իսկ ապագայում, թե ով ինչ տեղ է ցանկանում զբաղեցնել, չեմ կարծում, որ դրանք հիմա ուրվագծվում են կամ այսօր կարող են այնպիսի մարտավարական քայլերով առաջ գնալ, որ ընտրությունների ժամանակ հասնեն իրենց նպատակին` որոշակի տոկոս ձայն հավաքելով: Մի բան է միայն պարզ` այս պահի դրությամբ Նիկոլ Փաշինյանը վայելում է ժողովրդի լայն զանգվածների վստահությունը, իսկ վաղը-մյուս օրը ինչ կլինի, ոչ ոք չի կարող ասել` կապված է մի շարք հանգամանքներից, այդ թվում` արտաքին:
– Հետաքրքիր է` ՀՅԴ-ում սկսվե՞լ են քննարկումներ, թե ի՞նչ ձեւաչափով եք մասնակցելու ընտրություններին:
– Դեռեւս Ընտրական օրենսգրքի շուրջ են բանակցություններն ընթանում: Մեր տեսակետը պաշտոնապես հայտարարել ենք, որ երկու սկզբունքային հարց կա մեզ համար. մեկը միանշանակ համամասնական բաց ցանկն է, մյուսը, որպեսզի ընտրություններին բացառվեն ընտրակաշառքի, վարչական ռեսուրսների կիրառումը: Այս ամենը քննարկման փուլում է, եւ Ընտրական օրենսգրքի փոփոխություններից հետո, երբ Ազգային ժողովի կողմից այն կընդունվի, ըստ այդմ, նոր լայն թափով կմտնենք նախընտրական փուլ:
ՀՐԱՆՏ ՍԱՐԱՖՅԱՆ
iravunk.com