Արցախի ժողովուրդին լիակատար համերաշխութիւն ցոյց տալու եւ Լեռնային Ղարաբաղի սահմանագիծին վրայ Ատրպէյճանի զինուած ուժերու ռազմական գործողութիւնները դատապարտելու նպատակով՝ Աթէնքի մէջ Ատրպէյճանի դեսպանատան առջեւ
համախմբուեցաւ աթենահայութիւնը Կիրակի 3 Ապրիլի կէսօրուայ ժամը 12։30ին։ Բազմամարդ ցոյցը կազմակերպուեցաւ Հ.Յ.Դ. Յունաստանի Հայ Դատի Յանձնախումբի նախաձեռնութեամբ, նուազ քան 24 ժամուայ մէջ, արագօրէն համախմբելով մեր հայրենակիցները։ Հ.Յ.Դ. Երիտասարդական եւ Պատանեկան Միութեան անդամները, իրենց պարզած պահանջատիրական պաստառներով եւ Հայաստանի ու Արցախի դրօշակներով՝ գլխաւորեցին խաղաղ, բայց եռանդուն ցոյցը։ Համախմբուած ժողովուրդը արագօրէն արձագանգեց կազմակերպող մարմնի հրաւէրին, մեծով ու պզտիկով ներկայ գտնուելով եւ իր բարձրաձայնած լոզունգներով, խստօրէն դատապարտելով Ատրպէյճանի սանձազերծած ռազմական գործողութիւնները։ Մեր կողքին գտնուեցաւ նաեւ Յունաստանի Պոնտական Միութեան երիտասարդական խումբը, իր զօրակցութիւնը յայտնելով Արցախահայութեան։
Հ.Յ.Դ. Յունաստանի Հայ Դատի Յանձնախումբի պատասխանատու ընկերները, բարձրախօսով ժողովուրդին ուղղուելով, ներկայացուցին Ատրպէյճանի ռազմական յարձակման մանրամասնութիւնները, շեշտելով Արցախի հերոսական ժողովուրդի եւ զինեալ ուժերու դիմադրողականութեան ծաւալը։
Կարճ ժամանակ ետք, Ատրպէյճանի դեսպանութեան պաշտօնակատար մը, դրան մուտքին կանգնելով, ստանձնեց Ատրպէյճանի պետութեան ուղղուած բողոքի յուշագիրը՝ ժողովուրդի բարձրաձայն կրկնուող «Ղարաբաղը մերն է» պահանջքին տակ։ Յուշագրին մէջ կը պահանջուի Լեռնային Ղարաբաղի խաղաղ բնակչութեան դէմ յարձակումներու անյապաղ դադրեցումը եւ զինադադարի անմիջական կիրարկումը, ինչպէս նաեւ ԵԱՀԿ Մինսկի խումբի ծիրէն ներս շարունակուող բանակցութիւններու եւ որոշումներու լրիւ յարգումը։
Թեսաղոնիկէի մէջ
Նոյնպէս, Կիրակի կէսօրին, Թեսաղոնիկէի մէջ Հ.Յ.Դ. Երիտասարդական Միութեան «Սողոմոն Թեհլիրեան» խումբի կազմակերպութեամբ, հաւաք ու քայլարշաւ տեղի ունեցաւ, Արիստոտելեան հրապարակէն՝ Թեսաղոնիկէի ծովափնեայ տարածքի երկայնքին։
Այսպէս, Աթէնքի եւ Թեսաղոնիկէի մէջ, յոյն հասարակութեան մօտ բացայայտուեցաւ Ատրպէյճանի յարձակողապաշտ քաղաքականութիւնը եւ բարբարոսական արարքները։
Ազերիական անհեռատես ռազմասիրութիւնը դատապարտուած է մեռնելու։
Օտար պետութիւնները պարտին իրականութեան դէմ յանդիման կանգնելու եւ վերաքննելու իրենց որդեգրած անսկզբունքային դիրքորոշումները, որ հեռու են մարդկային իրաւունքներու եւ ժողովրդավարութեան յարգման սկզունքներէն։
azator.gr